فقرة السوبر ماركت اللي كلنا تقريبًا بنزعل جامد بعدها، نغلط الغلطة من هنا وناخدهم معانا السوبر ماركت ونندم بعدها أشد الندم على منظرنا وبريستيجنا اللي بقى في الأرض بسبب الفضايح والشبطة. أنا دلوقتي جاية لك من قلب الحدث، هاقول لك على شوية Tips يساعدوكي لتقليل الفضايح، لو قررتي تجمدي قلبك وتاخدي حبوب الشجاعة وتاخدي أطفالك معاكي السوبر ماركت.
نصائح لنوبات الغضب
- أول وأهم نصيحة هي إنك ما تاخديش الولاد معاكي السوبر ماركت. بجد لو عندك فرصة ما تاخديش أطفالك اللي سنهم صغير أقل من 3 سنين معاكي، يبقى ما تتردديش ثانية.
- لكن لو اضطريتي واخدتيهم، يبقى لازم قبل ما توصلوا تكوني متفقة معاهم (لو سنهم يسمح وهيفهموكي) على اللي هتعملوه في السوبر ماركت واللي هتشتروه وعلى عدد الحاجات اللي مسموح لهم يشتروها.
- ممكن كمان تعملي ليست بالحاجات اللي هتجيبوها واحدة ليكي وواحدة لابنك\بنتك، وتطلبي منهم يدوروا معاكي على اللي هتشتروه منها تحمّليهم المسؤولية، وكمان تلهيهم ويتشتتوا عن طلباتهم.
- لو بدأتي تدي لطفلك مصروف، وبدأ يفهم في قيمة الفلوس، يبقى تدي له قبل ما تروحوا مصروفه أو مبلغ متفقين عليه وتسيبي له حرية الاختيار يصرفوا ازاي وفي إيه. ولو طلب حاجات أكتر من الفلوس اللي معاه، ارفضي بحزم وطيبة.
- لو طفلك لسه مش مستوعب الخطوات اللي فوق وبيشبط في كل اللي قدامه وبيعيط وممكن يدخل في نوبة غضب، ممكن تعملي معاه خدعة بسيطة، بإن كل ما يشبط في حاجة تقولي له: الله! حلوة فعلًا، بس النهارده هنشتري لك حاجة واحدة، تعالي نصورها عشان لما نيجي تاني ما ننساش نجيبها. عشان تحاولي تهديه بإنك موافقة ومستعدة تجيبيها وتشتتيه بالتصوير. وفي نفس الوقت، يحس إنك فاهماه سامعاه وهتلبي له طلباته، فما يضطرش للعياط والصريخ عشان يضغط عليكي.
- اتأكدي قبل ما تروحوا السوبر ماركت إن ابنك\بنتك مش جعان أو عايز ينام، عشان ما يكونش معرض أسرع للدخول في نوبة غضب.
- خلّي معاكي دايمًا في شنطتك سناك خفيف يسليه وانتم في رحلة الشوبينج في السوبر ماركت، وكمان ممكن تخلّي دايمًا معاكي لعبتين صغيرين بيحبهم، ومش قدامه طول الوقت يكون مشتاق للعب بيهم، تساعد في تشتيت انتباهه عن المغريات اللي قدامه.
شاركينا انتي كمان في التعليقات، لو عندك خدعة بتستخدميها مع ولادك، تتجنبي بيها فضايح السوبر ماركت.
اتصرف ازاي لما ابني يدخل في نوبة غضب؟
التعليق باستخدام حساب فيس بوك