محتويات المقال
بنسمع كتير عن البوليميا.. بس إيه هي البويليميا دي؟!
البوليميا نيرفوزا أو البوليميا أو النهام العصابي أو الشره العصبي.. شكل من أشكال اضطرابات الطعام الرخمة وساعات بتكون خطيرة على حياة الإنسان.. عادة، الشخص إللي عنده بوليميا بياكل كميات أكل كبيرة binge eating وعنده نهم شديد للطعام cravings وبيفقد السيطرة على نفسه في الأكل وبعد ما بياكل كتير بيحاول يتخلص من تأثير الأكل ده بوسائل غير صحية تماما علشان يتخلص من السعرات الحرارية إللي أخدها لإنه خايف يتخن.
من الطرق دي: ااستخدام الملينات بإفراط، استخدام أدوية التخسيس، التمرين العنيف لفترة طويلة جدًا ممكن تأذي الجسم، يعمل ريجيم قاسي جدًا.. يصوم عن الأكل لفترات طويلة وأخيرًا يحاول يحط صباعه في بقه علشان يتقيأ (يرجّع الأكل)
الشخص المصاب بالبوليميا عادة بيكون مهووس بفكرة شكل جسمه ووزنه عالميزان.. وممكن يكون بيلوم نفسه وبيشتم نفسه لما ياكل وعنيف مع نفسه وعنده مشكلة قديمه مع صورة الجسد وقد يكون بيتعرض للتنمر على جسمه أو طريقة أكله..
البوليميا ساعات بتكون رخمة وصعب الشفاء منها.. لكن العلاج النفسي وتناول نظام غذائي صحي ولعب الرياضة باعتدال ممكن يكون سبب في الشفاء منها.
الأعراض:
مريض البوليميا بيكون عنده كتير من الأعراض دي:
–مهووس بشكل جسمه ووزنه عالميزان.
–عنده خوف دائم من إنه يتخن.
–بياكل بكميات كبيرة جدًا في المرة الواحدة.
–إحساس إنه مش عارف يسيطر على كمية ولا نوعية الأكل إللي بياكلها.
–بعد الأكل بتجلد نفسك جدًا وبتعمل الطرق إللي قلنا عليها في المقدمة علشان تتخلص من السعرات الحرارية إللي في الأكل.
–حدة البوليميا بتتعرف من عدد المرات إللي حاولت تتخلص فيها من الأكل على الأقل مرة في الأسبوع لمدة 3 شهور متواصلة.
إمتى نروح لدكتور؟
لو المرض تملك مننا والبوليميا بقت أسلوب حياة وبدأنا نتأزم نفسيًا ووزننا يزيد ولقينا نفسنا بنعمل كل الحاجات المذكورة فوق بشكل ملحوظ والموضوع خرج عن السيطرة ومش عارفين نساعد نفسنا لوحدنا.
مخاطر البوليميا
البوليميا بيكون ليها مخاطر نفسية ومخاطر عالجسم منها:
–تقدير ذات منخفض وجلد ذات ومشاكل في العلاقات.
–الجفاف الشديد إللي ممكن يؤذي الكلى.
–مشاكل في القلب..
–مشاكل كتير في السكر ومقاومة الإنسولين.
–جميع مشاكل الجهاز الهضمي.
–لخبطة في الدورة الشهرية.
–مشاكل في التبويض والخصوبة.
–تسوس الأسنان لو حصل قيء متكرر.
– إمكانية إدمان على الكحول والتدخين والمخدرات والإباحيات (سلوك إدماني واحد بيجر سلوك إدماني تاني).
–القلق النفسي والإكتئاب.
–إمكانية التفكير في الإنتحار لاقدر الله.
مستنيين تعليقك أو سؤالك في خانة التعليقات تحت المقال..
التعليق باستخدام حساب فيس بوك