من بين كل برامج التوك شو الترفيهية أخيرا برنامج منهم قرر يهتم بحياة الأمهات وأحوالهم وانطلق من خلال قناة مدرستنا تحت عنوان “جروب الماميز” واللي بيتعرض من السبت لـ الأربعاء، من الساعة 8 لحد 10 مساءً، وكمان على قناتهم على اليوتيوب، الميزة في البرنامج هو مقدمة البرنامج إنها أم من قلب الحدث لذلك مع كل كلمة بتتقدم مابيكونش في تنظير أو كلام مش واقعي، ياسمين نور الدين بتدخل القلب من أول لحظة، مع كلامها عن موضوعات حقيقي بتمس حياة الطلبة زي تقسيم الوقت والمذاكرة، و تغذية الأطفال في الدراسة، اتكلمنا معاها أكتر واستمتعنا بالحوار معاها..
عرفينا بنفسك ؟
ياسمين نورالدين، إعلامية مصرية، اشتغلت منتج فني لأفلام وثائقية وبرامج توك شو وكتبت دراما ثم أصبحت مذيعة راديو وتليفزيون. أم لبنتين، ورغم اني في الأساس خريجة هندسة القاهرة لكن درست في أكاديميات مصرية وأجنبية فنون الإعلام عشان أبدأ مشواري الإعلامي
إيه أكتر قصة أم أثرت فيكي؟
كل القصص مهمة ومؤثرة وفريدة وخاصة جدًا، كل ست باختلاف ظروفها هي بطلة في مكان ما في حياتها وحياة اللي حواليها، أنا بحترم كل الستات ومش تحيز لو قلت لك إن الستات المصريات مفيش زيهم في العالم كله، الست المصرية اللي عمرها ما وقفت ظروف اقتصادية أو مجتمعية قدامها ودايما تلاقيها بتحقق أكتر من توقعات كل اللي حواليها
لكن بيفضل دايما في ذهني نموذج منى وأحمد اللي ما ينفعش ننساها، منى ست بسيطة كانت ساكنة في الدويقة وبعدين نقلت في الإسكان الجديد اللي وفرته الدولة لسكان المناطق الخطرة، أخدت أولادها وراحت رغم الخلافات مع زوجها واعتراضه على حماسها ورغبتها في تحسين حياتهم عشان تعيش هي وأولادها حياة كريمة، وتم الطلاق ونزلت تشتغل لأول مرة في حياتها بعد الطلاق عشان أولادها يقدروا يكملوا تعليمهم لغاية لما ابنها أحمد طلع الأول في الثانوية العامة على مدرسته بمجموع دخله كلية الطب اللي كانت بتحلم له بيها وبيحلم بيها كمان أحمد، الست دي ما كانش عندها أمارة لنجاحها ونجاح إبنها لكن هي كانت واخدة قرار النجاح ليها ولأولادها اللي في منهم دلوقتي بيرسم وفي منهم اللي بينشد، والحقيقة بشوف دي قصة ملهمة بتدل على نجاح الدولة وقوة وشطارة المرأة المصرية.
إيه اللي بيفرق برنامج جروب الماميز عن أي برنامج أمهات تاني؟
لما بتكوني عايزة تفضفضي لحد، أو تتكلمي عن شيء بيقلقك أو عايزة تعرفي رأي علمي يبعدك عن الحيرة اللي ساعات الأم بتحس بيها، أول حاجة هتعمليها انك هتكلمي أصحابك، هتدخلي على جروب الأمهات عشان تعرفي خبرتهم، وهي دي طبيعة العلاقة بيني وبين المشاهدات، إحنا برنامج تفاعلي حقيقي، بنتابع اللي بيتقال في الجروبات وبنجاوب إجابات علمية عن طريق متخصصين، بنحكي مواقف بتحصل لنا وعيشناها. دة غير بقى إننا البرنامج الوحيد اللي بيتكلم عن تعليم أولادنا ومشاكل الدراسة والمدارس وبنوصل أصوات الأمهات للمسؤولين.
هل بتشاركي في الإعداد؟
أنا في الأساس من فريق تطوير المحتوى للقناة وأكيد بيحصل اجتماعات وتواصل مستمر مع فريق الإعداد وبنحاول نطور المحتوى طول الوقت. كمان أنا أم وبناتي في التعليم دة غير إني على تواصل دائم مع ناس كتير لذلك بعض الموضوعات بتتم مناقشتها بناءً على طلبي لإني شايفة إهتمام من الأمهات بالموضوع دة أو لإني لاحظت وجود معلومات مغلوطة وهنا بقى يكون دورنا المهم في تصحيح المفاهية والتوعية مبكرًا ومانسمحش بانتشار الإشاعات
هل فيه أمهات من الضيوف بقى فيه معاهم علاقة شخصية وبقيتوا أصحاب؟
كتير جدًا من ضيوفي بنتبادل أرقام التليفون وحساباتنا على السوشال ميديا حتى يستمر التواصل بيننا ودي حاجة بتسعدني جدًا وأكتر كلمة بتسعدني لما ضيفتي تقول لي انها اتكلمت في الفقرة بمنتهى الراحة وكأننا أصحاب من زمان، ودة الحمد لله حصل مع ناس كتير
اقري كمان: سيبك من انستجرام: دي أمومتي الحقيقية في 2020
إيه دور السوشيال ميديا في البرنامج؟
البرنامج محقق نجاح كبير على السوشال ميديا وخصوصًا ان فريق السوشال ميديا الخاص بالبرنامج فاهم أهداف البرنامج وعارف الجمهور المستهدف وعارف يوصل له ازاي. وبالتالي دايما بيكون تقسيم الفقرات ونشرها بصورة مستمرة. ومن أهم المهام اللي بيقوم بيها الفريق العظيم دة هي متابعة الأسئلة اللي بتيجي على الصفحة والتواصل مع فريق الإعداد عشان يجاوب على كل الاسئلة بشكل دقيق وبسرعة كمان.
شوفي كمان: جروب Mom circle: جديد علشانك دعم راحة بالي لكل الأمهات
ياسمين نور الدين
إيه أكتر مسلسلات مؤخرًا لفتت نظرك لقضايا الأمهات؟*
أعمال فنية كتير بتكون فيها الأم موجودة لكن كتير بحس بالمغالاة ودة مش غلط في الفن لكن لازم نبقى واعيين بالمغالاة ونبقى عارفين ان مش شرط كل حاجة نشوفها في فيلم أو مسلسل يبقى بتعبر عن الواقع. ولكن رمضان الماضي كان في مسلسل اجتماعي مهم جدًا من وجهة نظري لانه بيحكي مشاعر وأحداث جيلنا من الأمهاب والأباء. وهو مسلسل ولاد ناس. قدر يعبر عن أفكار مختلفة بمشاهد من الحياة وبمواقف يومية بنشوفها فعلًا مع أولادنا
من خلال تجربتك في البرنامج إيه أهم القرارات الحديثة اللي في صالح الأمهات؟*
مصر فيها حركة حاليًا لتمكين المرأة وتمتعها بكل حقوقها والمساواة بينها وبين الرجل ولكن الجديد انها نابعة من الدولة مش حركات نسوية زي ما متعودين نشوف. ودة سهل أمور كتير في حياة الستات المصريات. دة غير ان السيدات فعلًا أثبتوا جدارة وأخدوا مكانهن ومكانتهم عن استحقاق
ازاي بتوفقي بين شغلك وأمومتك؟
الحل السحري في الجدول، في جدول في البيت ملتزمين بيه كلنا، وبناتي عارفين مسؤولياتهم وبيقوموا بيها من واقع احساسهم بيها مش بسبب ان ماما هتزعق، وده مريح ليا وليهم، إحنا أصحاب وبنحكي لبعض كل أسرارنا، بحاول دايما ألاقي أوقات مشتركة واهتمامات مشتركة.
في الوقت اللي هما بيذاكروا فيه بكون أنا كمان بقرأ أو بذاكر لشغلي، والوقت اللي بيروحوا يلعبوا رياضة بخلي دة وقت الرياضة الخاص بيا، حياتي ماشية بالتوازي معاهم، في بعض الأوقات اللي بيكون فيها الشغل ضاغط عليا أو جدولي زحمة بحاول أعوضهم في الاجازات بس هما كمان فخورين بشغلي وبيشجعوني عليه طول الوقت.
إزاي جات لك فرصة تقديم برنامج جروب الماميز؟
أنا من فريق تطوير المحتوى في القناة واتولد البرنامج ده على إيدي ولكن ترشيحي جاء في الشهر الثالث لصدوره وخصوصًا ان ليا تجارب إذاعية وتليفزيونية سابقة.
برنامج جروب الماميز غير إيه في ياسمين؟
بقيت بتمنى أكون قادرة أغير في اللي بيشوفني ويسمعني، أتمنى أكون أثرت فيهم، في علاقتهم بنفسهم وبالاخرين وأخص بالذكر هنا علاقتهم بأولادهم لأن هو دة المهم في حياتنا. الأم المصرية بتلف في فلك اسمه بيتها وأولادها وبقول دة بكل فخر ودة مايقلش أبدًا منها لكن بالعكس بيزيدها عظمة.. وبحاول دايما أطبق اللي بيقوله المتخصصين في فقرات البرنامج عشان دة تطوير للذات مهم جدًا إني أطبقه على نفسي قبل ما أطلب من غيري تطبيقه.
التعليق باستخدام حساب فيس بوك