محتويات المقال
الكام سنة الأخيرة بقينا نسمع كلمة “فرط الحركة” كتير، وبقى فيه خلط بين الطفل الشقي والحركي اللي بيحتاج يكون بيتحرك كتير. فرط الحركة هو اضطراب من اضطرابات النمو العصبية نتيجة عن نقص كمية هرمون الدوبامين في قشرة الجزء الأمامي من المخ اللي بيسهل للخلايا تنفيذ توصيل الإشارات والتواصل بين أطراف الدماغ. في المقال ده، هنقول لكل أم ازاي تعرف الفرق بين إذا كان طفلها شقي وامتى تشك إنه عنده فرط حركة ومحتاجة تستشير دكتور متخصص.
الفرق بين الطفل الحركي واللي بيعاني من فرط الحركة
الحركة:
الطفل الشقي فعلًا بيتحرك كتير، لكن الحركة بتكون بهدف، يعني بيطلع فوق الدولاب عشان يقلد سبايدر مان مثلًا أو عشان عايز يجرب لعبة جديدة. بس في نفس الوقت، بيتشغل بالألعاب ويركز فيها وبيجي له وقت في اليوم طاقته بتخلص وبيهدا.
الطفل فرط الحركة بيتحرك حركة عشوائية طول الوقت ومن غير أي هدف وما عندهوش وقت للهدوء ولا التركيز على لعبة معينة لفترة.
تنفيذ الأوامر:
الطفل الشقي مع حركته الكتير، بيكون سامعك جدًا ومركز في اللي بيتقال له وبينفذ اللي بيتطلب منه بسهولة.
لكن طفل فرط الحركة مش بيستجيب للأوامر بسهولة، وبيلاقي صعوبة في تنفيذها.
طبيعة ونوعية النوم:
الطفل الشقي بينام في آخر اليوم بصورة طبيعية ومتواصلة، ولعدد ساعات كبير يعني أقل من سبع سنين بينام من 10-12 ساعة في اليوم، وأكبر من سبع سنين بينام من 8-10 ساعات يوميًا.
أما طفل فرط الحركة بيكون نومه مضطرب ومتقطع وغير متواصل.
العنف:
طفل فرط الحركة اوقات بيخرج منه تصرفات تبان عنيفة زي إنه يبوظ اللعب بتاعته ويكسرها أو يتصرف بعنف مع أخواته أو يضربهم، وبيكون عنده صعوبة في السيطرة على غضبه وانفعالاته، فبتزيد الشكوي منه.
لكن الطفل الشقي في الغالب بيكون popular، وحواليه أصحاب كتير.
المدرسة:
ودي بقى من أهم النقط لإن أوقات في مدارس أو حضانات بتستسهل وتقول إن الطفل عنده فرط حركة وتشتت انتباه. وأوقات تانية الأهل هم اللي بيرفضوا إنهم يتقبلوا الفكرة وبيتخيلوا إنها شقاوة عادية.
فمهم نعرف إن الطفل الشقي غالبًا بيكون ذكي وبيركز جدًا حتى في عز حركته ومستواه الدراسي متقدم.
أما طفل فرط الحركة بيكون انتباهه متشتت ومستواه الدراسي أقل عن زمايله.
وفي النهاية، فرط الحركة كل ما كان اكتشافه بدري، كل ما كان علاجه أسهل وبيتعالج عن طريق علاج سلوكي ببرنامج متخصص، عشان يزود من تركيز الطفل وانتباهه، وكمان علاج دوائي عشان يزود من هدوء الطفل.
التعليق باستخدام حساب فيس بوك