الأسرة المضطربة هي الأسرة اللي فيه تضارب في أدوار أفراد العيلة فيها، مش كل واحد بيقوم بدوره الطبيعي سواءً كان أب أو أم أو أطفال، تلاقي الزوجة بتعامل جوزها كأمه أو العكس، تلاقي مثلًا واحد من الأطفال عايش دور الطبيب النفسي اللي أهله حطوه فيه لما بيحكوا له مشاكلهم، وده بيكون لأسباب كتيرة منها خلافات الأهل المستمرة قصاد ولادهم وصراع الأهل المستمر على السلطة وإنه يبقى الطرف الأقوى والأقرب للأطفال واللي كلامه يمشي من غير مراعاة لصحة الأطفال النفسية ومشاعرهم.
صفات وعلامات الأسر مضطربة:
- الأهل بيقللوا من بعض ومن ولادهم، وينتقدوا باستمرار وهما متخيلين إن ده تشجيع، ولكن بيحصل العكس. والطفل أوقات كتير بيحس بعدم الانتماء وإنه محتاج يكون people pleaser أو دائم السعي لرضا غيره عشان يفضل محبوب.
- ما بيعبروش عن مشاعرهم ومش مسموح لأطفالهم التعبير براحة عن اللي حاسينه وبالتالي الطفل بيحس بالذنب ناحية المشاعر الفطرية الطبيعية.
- بيسيئوا لبعض نفسيًا وجسديًا ومعتمدين على التهديد والوعيد لتنفيذ أوامرهم ما بين بعض.
- مفيش خصوصية أو استقلالية بين أفراد الأسرة.
- ممارسة العنف اللفظي والجسدي.
- وجود سلوكيات إدمانية عند أحد الوالدين أو كليهما زي إدمان الأكل أو الجنس أو المخدرات أو الكحوليات أو الإباحيات.
أدوار بيختارها الطفل في الأسرة المضطربة:
الأسر غير السوية أو المضطربة بيضطر الأطفال فيها إنهم يختاروا أدوار مختلفة ليهم في محاولات منهم إنهم يقدروا يحسوا بالانتماء والقبول جوا الأسرة وده بيحصل باختلاف شخصياتهم وردود أفعالهم للظروف المحيطة بيهم.
فيه طفل بيقرر إنه يختار دور “الضحية” وطفل تاني يختار دور “المنقذ”:
- الضحية: دايمًا بيختار يلعب الدور ده عشان يريح نفسه من أي مسؤوليات ويقدر يحس بأهميته باهتمام اللي حواليه وهو مغلوب على أمره، اللي مستسلم وحاسس دايمًا ب”عدم الاستحقاق”.
- المنقذ: وهو اللي بيحمّل نفسه مسؤولية اللي بيحصل لأفراد عيلته من حواليه وبيحاول يرضي الكل أو يحل مشاكلهم وده كمان بيأثر على صحة الطفل النفسية جدًا بالسلب لإنه بيلعب في الحالتين دور مش بتاعه.
عشان كده، احنا كأهل لازم نركز إن مهما كانت خلافتنا، الأطفال ما يكونوش طرف فيها وإني ما ألجأش لطفلي كأنه طبيبي النفسي اللي مطلوب منه يسمع مشاكلي ويساعدني في حلها مهما كان سنه، عشان ما يضطرش يلجأ لدور المنقذ أو الضحية.
فلو حاسّين إن علاقاتكم في البيت كأفراد أسرة علاقة مضطربة وغير سوية، أيًا كان السبب في إيه أو في مين، مهم إنكم تلجأوا كأسرة لمتخصص يساعدكم في حل الخلافات وإعادة توزيع الأدوار وتشكيل شكل الأسرة السوي اللي من أهم الأساسيات لتربية أطفال أسوياء وبصحة نفسية سليمة.
المصادر:
التعليق باستخدام حساب فيس بوك