محتويات المقال
الوقت الخاص أو الكواليتي تايم quality time أو الـspecial time أو أيًا كان بنسميه إيه، ده أداة من أهم أدوات التربية الإيجابية اللي بتساعدنا كتير قوي في تقوية العلاقة بيننا وبين ولادنا وفي نفس الوقت بتطمنهم إننا موجودين ومهتمين بيهم.
إزاي اقضي كواليتي تايم صح مع ولادي؟
الوقت الخاص لكل طفل على انفراد أنا دايمًا باقول عليه سحر وحلّال العقد. أهم حاجة ما يكونش الوقت ده عبارة عن حبس انفرادي وننزل علي العيال بسيل من النصائح والتوجيهات ونفكّرهم بأخطائهم اللي من أيام الهكسوس ونقول لهم “يالّا نحل المشكلة”. لا، ده مش وقت حل مشاكل خالص. ده وقت اعتبروا فيه إنكم اتنين أصحاب خارجين يضحكوا ويهزّروا مع بعض شوية وبس، ويكون بعيد عن الشاشات.
مدة الوقت الخاص
حسب توصيات مؤسسة التربية الايجابية بأمريكا، الوقت الخاص بيتقسم حسب السن:
| من سنتين لـ6 سنين | 10 دقايق كل يوم |
| من 7 – 12 سنة | نص ساعة في الأسبوع |
| من 13 سنة فيما فوق | مرة واحدة في الشهر |
المصدر: positive discipline association
كيفية قضاء الـQuality Time
الوقت ده بنعمل فيه أي حاجة احنا وولادنا نحبها ونبقى مبسوطين ومرتاحين واحنا بنعملها.
طيب نلعب إيه مع ولادنا عشان أنا ما باعرفش ألعب ومش باحب اللعب؟
جربوا كده ترجعوا عيال مع العيال والله هتتبسطوا وهتلاقوا عالم آخر تهربوا فيه من ضغوط دنيتكم.
هاقول لكم شوية أمثلة باعملها مع ابني هو 8 سنين ونص دلوقتي وأنا بدأت معاه من سنتين ونص
- أي ألعاب يدوية puzzle, blocks, lego, coloring, drawing
- ممكن تعملوا كيك مع بعض
- ممكن تعملوا play dough بيتبسطوا بيه جدًا على فكرة
- لعبة تبادل الأدوار أو التمثيل:
وده من أكتر اللعب المحببة لقلبي، بدأتها مع ابني من أول ما دخل حضانة وكنت باخلّيه يمثل إنه هو المُدرسة وأنا أمثل إني هو وأفضل أعمل في حاجات غلط عشان أشوف رد فعله لإنه بيكون بيقلد اللي مدرسته بتعمله فأعرف هي بتتعامل معاه ازاي.
- تشغلوا أغاني وترقصوا
- تجروا ورا بعض استغماية وتزغزغوا بعض (الطفل الحركي بيحب اللعب ده جدًا)
- تقروا قصة أو تحكوا لبعض حواديت (منها برضه نعرف إيه اللي بيدور في دماغهم)
- السنة دي علّمت ابني لعبة الشايب وUNO وmonopoly وبقينا نلعبهم وبيتبسط جدًا
- شطرنج لفوق ٦ سنين
وأخيرًا الأفكار ما بتخلصش وأنا متأكدة إن ولادكم هيطلعوا بأفكار تانية كتير تفرحهم وتفرحكم.
شوية الوقت الحلو اللي هنقضيه مع ولادنا ده هو اللي بيطمنهم إنهم مهمين وموجودين ومتشافين وهيفضل محفور في قلوبهم وقلبنا طول العمر.
المصدر:
positive discipline
التعليق باستخدام حساب فيس بوك