محتويات المقال
“دخلت على بنتي وابن عمها لقيته رافع هدومها وبيكشف على جسمها بسماعة الدكتور اللعبة. زعقت لهم همّا الاتنين. بس بعدها بيومين لقيتهم بيلعبوا نفس اللعبة. أعمل إيه وأعاقبهم ازاي؟” مين فينا ما سمعتش المشكلة دي من حد من قرايبها أو أصحابها أو حتى واجهناها بنفسنا وساعتها بنحتار نتصرف ازاي نعاقب ولا نتجاهل عشان ما يركزوش أكتر؟ في المقال ده، هنقول لك عن أسباب الألعاب الجنسية اللي الأطفال بتلعبها والتصرف الأنسب اللي تقدري تعمليه في الحالة دي.
إيه هو اللعب الجنسي عند الأطفال وليه بيلعبوا الألعاب دي؟
كل ما الطفل بيكبر، وبالتحديد بداية من سن سنتين لسن 6 سنين، بيتطور عنده الفضول الجنسي واللي بيكون في صورة فضول لاكتشاف أجزاء وأعضاء جسمه أو أجسام أصحابه واخواته زي بالظبط ما بيكون بيكتشف رأسه أو يده أو رجله وغيره. ومن هنا بييجي فضولهم لتجربة الألعاب الجنسية زي لعبة الدكتور أو لعبة عريس وعروسة.
في لعبة الدكتور مثلًا واحد من الأطفال بيمثل أنه الدكتور والطفل التاني بيكون المريض. ويبدأ الدكتور يكشف لبس التاني عشان يعرف يكشف عليه ودا المشهد اللي بيفزع الأمهات لما بيشوفوه.
وفيه أشكال تانية للعب الجنسي زي مسك الطفل لأعضاءه التناسلية أو يستخدم عروسة أو مخدة. واللي كتير مننا ما يعرفهوش إن اللعب الجنسي دا غالبًا بيكون حب استطلاع بسبب طبيعة السن مش أكتر، والموضوع ما يقلقش إلا في حالات معينة. بس مش معنى إنه طبيعي إننا مش هنتدخل وننتبه له.
طيب إيه العلامات اللي تخليني أقلق من اللعب الجنسي للطفل؟
- لو بيحصل من أطفال أكبر من 7 سنين وبصورة متكررة حتى بعد الكلام معاهم بخطورة اللعبة دي.
- لو الطفل مجبر إنه يلعبها من طفل أكبر منه ومش في نفس سن الاستكشاف.
- لو ما فيهوش علامات اللعب البريء العفوي وبدأ يظهر تصرفات جنسية خاصة بالكبار.
- لو بدأتي تلاحظي علي رسومات طفلك إن فيها تعبير عن أوضاع جنسية أو إنه بيتكلم كتير في نفس الموضع بصورة تقلق.
لو لاحظتي حاجة من العلامات دي، لازم تتأكدي إن طفلك ما اتعرضش لتحرش جنسي أو اتعرض إنه شاف مشاهد جنسية بأي طريقة، وبننصحك في الحالة دي إنك تلجأي لأخصائي نفسي للأطفال.
أتصرف إزاي لما اشوف حد من أطفالي بيلعب ألعاب جنسية؟
- الهدوء: رد فعلك الهادي، اللي من غير مبالغة، دا أهم وأول حاجة في تصرفك. مهم إن الطفل ما يخافش وما يحسش إنه عمل جريمة أو عار. انتِ مش محتاجة من طفلك غير إنه يعرف الصح من الغلط في الموقف دا.
- الأسئلة: اسألي الطفل بهدوء وبجدية وبصوت مش عالي أسئلة بسيطة تساعدك في فهم الصورة زي:
- كنت بتلعب إيه يا حبيبي؟
- عرفت اللعبة دي منين؟
- حد غصبك تلعبها قبل كده؟
- بتلعبها مع مين تاني؟
- الشرح: انتهزي الفرصة واتكلمي مع ابنك عن خصوصية جسمه وأهمية إنه يحافظ عليه وإيه المسموح إنه يظهر من جسمه هو أو غيره وإيه مش مسموح وإيه اللمسات المسموحة وإيه لا، وليه اللعبة دي غلط.
- عينك عليهم: لازم تراقبي لعب الطفل مع أصحابه وقرايبه ويكون قصاد عينك. ولازم تفرقي في النوم بين الأطفال على نفس السرير ولو اضطروا للنوم جنب بعض يبقى بأغطية سرير منفصلة.
وأخيرًا بننصحك بالتربية الجنسية لطفلك من بدري وإنك تعرفيه المعلومات المناسبة لسنه وأهمية الحفاظ على خصوصيته وبنفكرك إنك عشان تحمي طفلك لازم دايمًا تكوني سابقة العالم اللي حواليه بخطوة وتتكلمي معاه في أي حاجة ممكن يشوفها أو يتعرض لها عشان يكون واعي ومتطمن وعنده المعرفة اللي تحميه.
عشان تعرفي أكتر عن التربية الجنسية للأطفال شوفي المقال ده.
التعليق باستخدام حساب فيس بوك