محتويات المقال
رجيم قرطاي واحد من أحدث أشكال الرجيم اللي بدأ ياخد شهرة واسعة على مستوى العالم، واللي ابتكر الرجيم ده هو الدكتور التركي كنعان قرطاي، واللي اتسمى عليه الرجيم. سبب شهرت رجيم قرطاي هو إنه رجيم سهل جدًا، مفيش فيه لا كميات ولا حساب للسعرات الحرارية، وبيحتوي على نسبة بروتين عالية وده اللي بيوفر شعور رائع بالشبع لمتبعينه.
الفطار في رجيم قرطاي
أهم وجبة في نظام قرطاي هي وجبة الفطار واللي لازم تحتوي على الأقل على بيضتين، وممكن تزودي حسب رغبتك، وكمان يكون طبيعي يعني زي ما بنقول بيض بلدي، وما يكونش مستوي قوي.
ليه وجبة الفطار مهمة قوي كده في رجيم قرطاي؟
الموضوع مرتبط بالتمثيل الغذائي، لإن وجبة الفطار الغنية المشبعة لها ميزة إنها بتحافظ على معدلات منخفضة من الأنسولين في الدم. وبالتالي، الجسم بيستخدم الدهون المتراكمة فيه كمصدر طاقة، ومن هنا بيجي نزول الوزن. على العكس، لو أهملتي وجبة الفطار، الجسم هيتأقلم ويترجم تصرفك في عدم مدّه بالغذاء إنه بيتم تجوعيه، فيدافع عن نفسه ويوقف حرق الدهون المتراكمة في الجسم.
أساسيات رجيم قرطاي
- شرب المياه مش أقل من 8 لـ 10 كوبايات على أقل تقدير علشان تساعدي على التخلص من السموم المتراكمة في الجسم.
- التمارين مهمة وأقل شكل للتمارين هو المشي مش أقل من 40 دقيقة.
- التوقف تمامًا عن شرب أي مشروبات غازية حتى لو “دايت” أو “لايت”.
- الأكل يكون قليل الملح، وبينصح باستخدام الملح البحري أو ملح الهملايا الضخري لما فيهم من معادن، بس بكميات قليلة علشان المياه ما تتحبسش في الجسم، وتزودي الخل في أكلك.
- أسلوب الطبخ المفضل في النوع ده من الرجيم هو الطبخ البطيء على مدة زمنية طويلة، علشان يفضل الأكل محافظ على قيمته الغذائية.
- التوقف عن الأكل بعد الساعة 8 مساءً.
- ممنوع تمامًا عيش القمح والأرز الأبيض أو الأسمر والبطاطس والقلقاس.
- مسموح أكل عين الجمل واللوز والبندق والسوداني كتعويض عن العيش وللشعور بالشبع.
- استخدام حصة واحدة فقط وبشكل معتدل من الفواكه المسموحة.
- الفطار لازم يكون فيه بيض ومكسرات وورقيات خضراء زي الجرجير والخس.
- اليوم فيه وجبتين أو تلاتة في اليوم بس لازم يكون الفرق بين الوجبة والتانية مش أقل من 5 ساعات.
المسموح في رجيم قرطاي
- برغل وجزر ني بس بكمية محسوبة.
- الفواكه المجففة اللي مؤشر الجلايسيمي بتاعها منخفض زي الخوخ والمشمش.
- فواكه طازة زي التفاح والكمثرى والفراولة.
- فراخ طبيعية يعني زي ما بنقول بلدي أو تربية بيوت، مش بتتغذي على أي أكل صناعي. والبيض البلدي والبسطرمة.
- الزبادي البيتي أو البلدي. وكوباية لبن يوميًا والمياه الفوارة.
- القهوة التركي أو النسكافيه بلاك أو إسبريسو. المهم تكون خالية من المبيض والنكهات.
- زيت السمسم أو البندق أو الزيتون أو اللوز أو الزبدة أو السمن البلدي.
- سلطة وخضروات مطبوخة وبقوليات بس بشكل محدد ولحوم وأسماك.
- مسموح بشرب الشاي والمشروبات العشبية بس طبعًا بدون سكر، وحتى بدون سكر دايت، علشان منع تحفيز البنكرياس
- لإفراز الأنسولين.
ممنوعات رجيم قرطاي
- ممنوع تمامًا أي شكل من أشكال السكريات الصريحة والخفية وحتى السكر الدايت.
- ممنوع الجزر المسلوق لإن مؤشره الجلايسيمي بيعلى جدًا لما يستوي هو والبطاطس والرز.
- ممنوع العنب والتين والبطيخ والشمام.
- ممنوع أي شكل من أشكال اللحوم المصنعة، والبيض الأبيض اللي مصدره مزارع مش بتأكّل الدواجن أكل طبيعي.
- المشروبات الغازية والمشروبات الدايت والزبادي المحلى بالفاكهة أو العسل.
- الحبوب المطحونة.
معدل تخسيس رجيم قرطاي
أغلب اللي اتبعوه كان معدل خسارتهم للوزن بتتراوح من 5 لـ 7 كيلو في أسبوعين، وده معدل ممتاز. بجانب إنه حسب الإحصائيات إن ده معدل خسارة غير قابل للرجوع، طالما هتحافظي على اتباعك للنظام ده.
مميزات رجيم قرطاي
- أسهل نظام غذائي ممكن تقابليه.
- مش هتحسي بأي جوع وانتي بتتبعيه.
- مش محتاجة تحسبي سعرات.
- بيساعد على التخلص من السموم وتجنب العديد من الأمراض.
- بيساعد على التخلص من العديد من مشاكل الجهاز الهضمي.
- بيساعد على تحسين وظائف البنكرياس.
- بيساعد على خسارة الوزن في فترة زمنية قصيرة.
- بيصنف كنظام غذائي صحي لأنه بيمنع السكر بأشكاله وجميع أنواع الأكل المصنع.
تجربتي مع أكلات الرجيم: أهم منتجات اشتريتها وانا باعمل دايت
عيوب رجيم قرطاي
- خلوه تقرييًا من الكاربوهيدرات، وده ممكن يسبب على المدى الطويل بعض المشاكل الصحية.
- قد يسبب نقص في فيتامين B اللي متوفر بكثرة في الخبز الأسمر.
- نظرًا لقلة استهلاك الكربوهيدرات في النظام ده، أوقات بيحس متبعينه في الأول بشعور بالضعف والتعب والدوخة.
- قلة استهلاك الفواكه ممكن يسبب مشاكل زي جفاف البشرة وتساقط الشعر بسبب نقص الفيتامينات. علشان كده، بينصح بتناول مكملات غذائية لتعويض النقص ده.
- زيادة استهلاك الدهون في النظام قد يهدد بزيادة الكليسترول في الدم، وده بيتطلب منك تعملي تحليل لنوع الكليسترول ده إذا كان مفيد أو ضار.
هي دي تفاصيل قرطاي اللي محتاجة تعرفيها قبل ما تبدأي. بس لو كنتي بتعاني من أي مشاكل صحية، لازم وضروري وقبل ما تبدأي فيه إنك تستشيري طبيبك.
التعليق باستخدام حساب فيس بوك