محتويات المقال
الأحذية القطيفة والشمواه من أهم القطع اللي بتدينا لوك مختلف خاصة في الشتاء، سواء كانت حذاء عادي أو بوت، عمرها ما بتفشل أبدًا إنها تبقى الأشيك والأجمل، بس زي كل حاجة حلوة في الدنيا بتكون محتاجة اهتمام كبير علشان نحافظ عليها، في المقال ده هنتعرف على أسهل الطرق لتنضيف الأحذية الشمواه والحفاظ عليها وازاي ممكن ننضفها من غير ما تبوظ أو شكلها يتغير.
ملابس الـOversize تسيطر على موضة هذا الشتاء
- أهم حاجة في تنضيف الأحذية الشمواه إنك ما تستخدميش مياه في التنضيف أبدًا، لأن المياه الأثر بتاعها بيفضل موجود، وشكل الحذاء بيتغير تمامًا.
- وتاني حاجة مهمة إنك تحطي ورق مقوي جوه الحذاء قبل ما تبدأي في تنضيفه عشان الشكل ما يتغيرش ويبقى مجعد.
إيه الأدوات اللي ممكن أستخدمها في التنضيف ؟
-
فرشاة تنضيف:
ودي موجودة في السوق ومخصصة لتنضيف الأحذية الشمواه والقطيفة، طيب لو مش موجودة؟ فرشاة أسنان قديمة أو أي نوع من الفرش اللي أليافها ناعمة هتقضي الغرض، ولما تستخدمي الفرشاة اتأكدي إنك بتنضفي في اتجاه الألياف بس، وما تحركيش الفرشاة في اتجاهات مضادة على السطح عشان شكل الحذاء ما يتغيرش.
-
ممحاة:
فيه في السوق مساحات مخصصة للأحذية الشمواه لإزالة البقع الخفيفة عن طريق فركها شوية بالمساحة، لو مش موجودة أو متوفرة ممكن تستخدمي أستيكة قلم رصاص.
هتنفع ؟ آه هتنفع بس خدي بالك إنك تفركي بالراحة وتزودي شوية لو البقعة صعبة.
بالفيديو: طريقة تنظيف البوتجاز بسهولة
-
الخل الأبيض أو الكحول:
دول بيكونوا مفيدين في حالة البقع الأصعب اللي مش بتطلع بالفرشاة أو الممحاة، وده لأنهم مش بيسيبوا أثر كمان على الأحذية، اسكبي شوية خل أو كحول على منشفة صغيرة وافركي بيها البقعة، وبعد ما تخلصي سيبي الحذاء لغاية ما ينشف تماما، عدي عليه مرة تانية بالفرشاة تحسبًا لأي أثر موجود.
-
ماكينة حلاقة قديمة:
غريبة صح؟ ماكينة حلاقة قديمة ممكن تساعدنا إننا نرجع المظهر الجديد والأنيق للحذاء مرة تانية عن طريق إزالة الوبر الخفيف اللي ممكن يطلع من القماش، بعد كده بنستخدم الفرشاة لإزالة أي خيوط زيادة.
وأخيرا بعد كل التمشيط والمسح والفرك ده ممكن الحذاء يبقى شكله باهت شوية عشان ترجعي مظهره جديد افركيه كله بمنشفة عليها كحول أو خل أبيض وبعدين سيبيه ينشف تماما، وبعدها عدي عليه بالفرشاة الناعمة وشكله هيرجع جديد تاني.
ولو حسيتي إن محاولاتك ممكن تبوظ الحذاء، فمن الأفضل إنك توديه لمحل مختص في تنضيف الأحذية اللي من النوع ده.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك