كل الأمهات سمعوا مؤخرا على مناقشات بخصوص تصريح وزيرة التضامن الاجتماعي اللي قالت فيه: “من الوارد فتح الحضانات
المرخصة بعد أسبوعين حال إيجاد وتنفيذ السبل الاحترازية والنظافة اللازمة، إلا إذا ساءت الأوضاع بسبب فيروس كورونا
المستجد فسيتم تأجيل القرار.“
فيديو التصريح
وبما إني أم عندي طفلة كانت بتروح حضانة لحد يوم الإعصار، لما شفت الفيديو ده جه في بالي10 أسئلة أعتقد إنها هتيجي على
بالي بقية الأمهات اللي عندهم أطفال في سن الحضانة:
1. يا ترى إيه الإجراءات الاحترازية اللي ممكن تتاخد في الحضانات؟
واتخيلت إن كل حضانة هتجيب في مدخلها جهاز تعقيم، والمدرسات والعاملات هيلبسوا كمامات، وهيقللوا كثافة الفصول
والباصات، والكحول والكلور مكملين معانا طبعًا.
2. هل زهقنا وحبستنا في البيت طول الشهور اللي فاتت ممكن تخلينا نحسبها غلط وننزل الأطفال الحضانة؟
كل الأمهات جابت بعد آخرها بشوية، وأغلب الأطفال بقوا يتوتروا من مجرد فكرة الخروج من البيت، وكتير من المعلومات اللي
خدوها في الحضانة قبل كده قربوا ينسوها، فهل الحاجات دي هتضغط علينا ولا هنفضل صامدين؟
3. الأطفال اللي اتعودوا على القعدة في البيت وعدم الخروج نهائيًا، هيتأقلموا مع نزول الحضانة تاني ازاي؟
حاسة إننا هنعيد الدراما بتاعت أول مرة نروح الحضانة، وأغلبنا ما بقاش مستحمل الشحتفة دي.
4. هل ممكن أأجل نزول بنتي الحضانة لحد شهر 9؟
أنا شخصيًا بافكر في القرار ده، على أما أشوف نتائج فتح الحضانات، بس بردو خايفة ما ألاقيش مكان في الحضانة اللي كان
مسجلين فيها، وخايفة أصحاب بنتي ينزلوا من بدري وياخدوا على بعض تاني وهي تتأخر عنهم وده يأزمها أكتر.
5. يا فندم لو كل طفل سخن هيتعزل إسبوعين في البيت، مفيش حضانة في مصر هتشتغل.
من قرارات الحضانات في الفترات العادية إن أي طفل حرارته ترتفع ما يجيش الحضانة لحد ما يخف، ولو سخن في الحضانة
بيطلبوا من الأهل ياخدوه البيت، طيب ودلوقتي؟ أي حرارة هتبقى اشتباه كورونا – لا قدر الله – ومطلوب عزل أسبوعين، وطبعًا
راحت مصاريف نص شهر كده.
6. إزاي هنوفّق بين نزول الحضانات وأزمة أماكن المستشفيات حاليًا؟
قبل كده أي طفل كان بيتعب كنا بنجري بيه على المستشفى. دلوقتي ده مش متاح بسبب تكدس المستشفيات، وبسبب الخوف من إنه يكون دور تعب عادي بس لما يروح المستشفى يتعدي لا قدر الله.
7. خناقات جروب “الماميز” واللي عنده معزة يربطها والسلام عليكم ورحمة الله وبركاته.
إذا كانت الخناقات قبل كده بتقوم عشان طفل “باس” زميلته أو بنت خدت توكة صاحبتها، فدلوقتي الخناقات هتبقى على مين
اللي عدى التاني، ومين اللي عنده أعراض بس مخبي وحسبي الله ونعم الوكيل.
ده إحنا هنشوف أيام لوز والله!
8. ينزلوا الحضانة ولّا نكمل أونلاين؟
كتير من الحضانات اشتغلت فترة أونلاين، وأكيد لاحظنا إن مدى تفاعل الأطفال واستيعابهم مش زي نزول الحضانة نهائي، فهل
فعلا نقدر نكمل أونلاين في عمر تأسيسي زي ده؟ ولا هنختار أخف الضررين؟
9. هل الوظائف هتضغط على الأمهات بالنزول للشغل بحجة إن الحضانات فتحت ولّا هتسيب الخيار لكل أم؟
10. إزاي نعرف إن اختيارنا صح وما نرجعش نلوم نفسنا على أي نتيجة؟
قولوا لي إيه الأسئلة اللي جت في بالكم تاني..
أهم حاجة أقدر أوجهها للأمهات بالخصوص ده، إن ياريت ما نحكمش على بعض، لا اللي مش هتنزل أطفالها الحضانة خايفة
وقلقانة على الفاضي. ولا اللي هتنزلهم مستبيعه ومش فارق معاها صحتهم وسلامتهم، كل أم عندها ظروفها ومبرراتها في الموقفين
وهي الوحيدة اللي تقدر تقرر المناسب لها، وكلنا في ظروف صعبة حاليًا فمحتاجين نكون واقفين في ضهر بعض وندعم بعض
ومانكونش عبء وضغط على نفسياتنا.
بنتمنى للكل الصحة والسلامة.
التعليق باستخدام حساب فيس بوك