اتفقنا إن الصيام للحامل، في شهر رمضان، ما دام صحتها كويسة، تمام. لكن السؤال هو إمتى نقول إن الحامل فعلًا صحتها كويسة؟ عشان نوفر عليكي، جمعنا لك أشهر 10 حالات لو عندك حاجة منهم، فانتي ما ينفعش تصومي لأن الصيام في الحالة دي هيأثر عليكي وعلى حالتك الصحية، ياللا بينا نشوف أهم أسباب تمنع الحامل من صيام رمضان، وبتحتاج إنك لازم تفطري فورًا.
أسباب تمنع الحامل من صيام رمضان
- ارتفاع ضغط الدم.
- الإصابة بمشاكل المسالك البولية.
- لو انتي حامل في الشهور الأولى من الحمل.
- بترجعي طول الحمل.
- وزن الجنين قليل.
- لو عندك سكر حمل.
- لو حامل في توأم.
- تسمم الحمل.
- قلة السائل الأمينوسي.
- الإصابة السابقة بجلطات الأوعية الدموية.
ارتفاع ضغط الدم
طبعًا مش محتاجين نقول إن ارتفاع ضغط الدم ده المقدمة الكلاسيكية لتسمم الحمل، ودي واحدة من المضاعفات اللي بتتفاجيء بيها سيدات كتير في الثلث الأخير من الحمل. فلو كنتي بتعاني من ضغط الدم المرتفع عمومًا. أو اتفاجأتي إنه بيحصل لك خلال حملك وما كانش بيحصلك قبل كده، فالصيام في الحالتين هيؤذيكي لأن الحالة هتستلزم جرعات أدوية معينة على مدار اليوم.
الإصابة بمشاكل المسالك البولية
أكتر مشكلة بتطارد كل الستات الحوامل تقريبًا هي الأملاح، مع ضغط الجنين على المثانة، وشوية تفاصيل تانية، بتبدأ سيدات كتير تعاني من الأملاح والتهابات المسالك البولية مرة أو أكتر خلال فترة الحمل. فلو انتي من السيدات اللي عندك نسبة أملاح زيادة، أو صديد في البول، الصيام مش هيكون اختيار موفق لأنك في الحالة دي هتكوني محتاجة تشربي مياه كتير على مدار اليوم.
لو انتي حامل في الشهور الأولى من الحمل
الشهور الأولى من الحمل بيكون فيها معاناة كبيرة غالبًا، قيء وشعور بالقرف، ودوخة، ورغبة دائمة في النوم، وأحيانًا مشاكل متعلقة بالهبوط وضغط الدم عادة بيكون في النازل. لذلك من البديهي، إنك لو من الناس اللي بتعاني خلال الشهور التلاتة الأولى فالانقطاع عن الأكل والشرب لفترات طويلة ممكن يعرضك للإصابة بالهبوط والإعياء.
بترجعي طول الحمل؟
مش كل الستات شعورها بالرغبة في القيء بيخلص مع الشهور الأولى من الحمل. فيه ستات للأسف “حملهم وحش” ودول بيفضلوا من أول شهر لآخر شهر تعبانين، وعندهم رغبة في القيء. في الحالة دي لما تفضل الست الحامل لأكتر من 15 ساعة بدون أكل وشرب، هتتعرض للجفاف، وهتحس بحالة من التعب العام والإعياء.
وزن الجنين قليل؟
صحيح الجنين بياخد احتياجاته منك مهما كانت حالتك الصحية. لكن لو حالتك الصحية واصلة لمرحلة إن الدم اللي واصل للجنين أصلًا فيه مشكلة، ففي الحالة دي، محتاجة تاكلي وتشربي على فترات متقطعة. وكمان تاخدي أدوية معينة تساعد على وصول الغذاء للبيبي من خلال المشيمة، وده برضو هيتطلب منك إنك تفطري.
لو عند سكر حمل
لو عندك سكر في العموم، أو لو عندك سكر حمل، مش هينفع توقفي أكل وشرب لفترة طويلة لأنك محتاجة أدوية معينة عشان تظبطي نسبة الجلوكوز في الدم.
لو حامل في توأم
حامل في توأم يعني محتاجة تغذية مضاعفة ومعرضة لخطر الإجهاض والولادة المبكرة بشكل أكبر. لذلك محتاجة تفكري أكتر من مرة لو حامل في توأم ومقررة تصومي.
تسمم الحمل
تسمم الحمل ده عبارة عن احتباس للسوائل والأملاح في جسم الست، وبيحظر على المرأة الحامل صيام شهر رمضان في حالة الإصابة بتسمم الحمل.
قلة السائل الأمينوسي
في الحالة دي هتكوني محتاجة مياه كفاية، في جسمك، ودي اشارة إنك مش بخير يعني ما ينفعش تصومي.
الإصابة السابقة بجلطات الأوعية الدموية
الجلطات مش حاجة سهلة أو تحتمل هزار، لو كان ليكي تاريخ سابق مع الجلطات، فانتي مش مطلوب منك تصومي لأنك محتاجة أدوية معينة في أوقات معينة وكمان محتاجة سوايل كفاية في جسمك.
التعليق باستخدام حساب فيس بوك