محتويات المقال
طبعًا كلنا عارفين فوائد الفازلين للجلد وللشعر وقد إيه بيكون حل سريع للترطيب وللحفاظ على نعومة البشرة وخصوصًا في فصل الشتا، بس في الحقيقة الفازلين ليه استخدامات تانية كتير هنتكلم عليها في المقال ده.
إزالة المكياج
ممكن تستخدمي الفازلين عشان تشيلي بيه المكياج كمستحضر آمن على البشرة وبيحافظ على ترطيبها، هتجيبي قطن وتحطي عليه شوية فازلين قليل وتمسحي بيه بقايا المكياج وبعدين تغسلي وشك.
تطويل الرموش
الفازلين يعتبر من المستحضرات الآمنة اللي ممكن تستخدميها لو حبيتي تطولي رموشك، ممكن تجيبي فرشة ماسكارا نضيفة وتحطي عليها فازلين وتحطيها على رموشك قبل النوم على طول.
تلميع الجلود
ممكن تستخدمي الفازلين في تلميع الشنط أو الجزم أو الجواكت المصنوعة من الجلد، هتجيبي شوية فازلين صغيرين وتدهنيهم على الشنطة أو الجزمة وبعدين تشيليه بقماشة نضيفة.
خلع الخاتم الضيق
لو فيه خاتم ضيق لبستيه ومش عارفة تخلعيه، ممكن تدهني شوية فازلين حوالين الخاتم وتحوالي تطلعيه براحة.
تهدئة البشرة من حروق الشمس
ممكن تتعرض البشرة في الصيف لحروق الشمس اللي ممكن تكون مؤلمة جدًا ، ممكن تدهني الفازلين على أماكن البشرة اللي فيها حروق الشمس عشان يهدي المناطق المصابة ويساعد على ترطيبها وممكن تستخدميه لطفلك كمان.
عمل المخمرية
المخمرية تعتبر من المستحضرات التجميلية المشهورة والآمنة اللي بتدي ريحة لطيفة جدًا للجسم، وممكن تعمليها في البيت بفازلين ومكعب مسك وتخلطيهم مع بعض وتحطيهم في عبوة وتستخدميهم في تعطير جسمك.
الوقاية من التهاب الحفاضات
الفازلين بيعمل عازل بين البلل وجلد الطفل وبعد تغيير الحفاض لابنك أو بنتك ممكن تحطي طبقة رقيقة من الفازلين.. ويفضل إنك تستخدمي النوع المخصص للأطفال وكمان تستشيري دكتور الأطفال الخاص بيكي لو الفازلين مناسب لبشرة طفلك.
علاج تشققات الكعبين
تشققات الكعب من المشاكل اللي بنواجها في فصل الشتا والفازلين يعتبر أفضل علاج ليها، قبل النوم هتغسلي رجلك كويس أوي وتحطي الفازلين عليها وتلبسي شراب وتكرري كل ليلة وفي خلال أيام بسيطة هتحسي بفرق.
سكراب للجسم
ممكن تستخدمي الفازلين في عمل سكراب غير مكلف في البيت، هتحتاجي شوية فازلين ومعاهم ملح البحر الخشن أو سكر بني وممكن تحطي شوية نقط من أي زيت عطري عشان يدي ريحة لطيفة للجسم وتستخدميه في تقشير الجسم.
حماية البشرة من الصبغة
لو بتعملي صبغة في البيت وخايفة إن الصبغة تيجي على ودنك أو الجبهة ممكن تدهنيهم بالفازلين عشان يعمل طبقة عازلة ويحمي بشرتك من الصبغة اللي ممكن توصلها.
التعليق باستخدام حساب فيس بوك