محتويات المقال
في فصل الشتاء طبيعي الجو في العموم باردة، إلا انه فيه أيام بشكل عام بيكون البرد قارص فعلا بشكل غير محتمل،وده اللي بيحسه الناس اللي ساكنة في أماكن مفتوحة أو مرتفعة، البرد القارص ده في حد ذاته بيؤثر على نشاطك وصحتك، علشان كدة مع بعض في المقال ده هنتعرف على طرق التعامل سهلة وفعالة في التعامل مع الجو البارد:
طرق التعامل مع البرد القارص
اقفلي الستائر والأبواب
بليل يعني على المغرب اتعودي تقفلي الستائر والأبواب، ده بيساعج على الحفاظ إن الغرفة تفضل دافية، لكن ده طبعا مش معناه إنك تستغني عن تهوية الغرفة كل فترة علشان كمان تحافظي على نسبة الأكسجين فيها.
اشربي دايما مشروبات ساخنة
شرب السوايل أو المشروبات الساخنة مهم جدا بجد، لأنها تقدر تمدك بالدفء بسرعة وتزود من مناعتك، وبنرشح لك المشروبات التلاتة دول لأن نتيجتهم سريعة فعلا :
- الشاي الأخضر.
- الجنزبيل.
- القرفة.
المشروبات دى كلها غنية بالعناصر الغذائية المهم للجسم واللي أهمها الفيتامينات ومضادات الأكسدة اللي بتزود من مناعة الجسم.
زودي عدد طبقات الملابس
لو ما حستيش بالدفء زودي عدد طباقات الملابس اللي إنتي لابساها واختاريها تكون خفيفة بدل قطعة واحدة تقيلة، واختاريها تكون ماسكة على الجسم علشان تمنع وصول الهوا البارد لجسمك.
مارسي نشاط بدني رياضي
مينفعش خالص في الشتا تجيبي البطانية وتلفي نفسك لفة المحشي وتقعدي على الكنبة متكتكة، كدة إنتي هتقضي شتاء تعيس، لأنك هتلاقي نفسك عمالة تاكلي وتشربي وبعد الشتاء ما يخلص مش هتحبي اللي هتشوفيه لما تفكي البطانية من عليكي، علشان كدة لازم تقومي تتحركي، شوية تمارين حتى في البيت هتفرق معاكي جدا، حتى لو قومتي بترتيب بيتك هتلاقي نفسك اتدفيتي.
البسي لكلوك في البيت، وبوط مبطن في الشارع
واحدة من أكتر طرق التعامل مع الجو البارد إنك تلبسي لكلوك مبطن فرو في البيت، هيدفي رجلك جدا جدا، وإنك تشتري بوط مبطن برضه للخروج هيفرق معاكي كتير في الشعور بالبرد، موضوع الصوابع السقعانة ده عذاب بجد، ودي تعتبر واحدة من أسهل الطرق للسيطرة على برودة صوابع القدم.
دفي البيت
لو كنتي بتعاني أو حد من أفراد أسرتك من بعض الأمراض زي أمراض القلب والرئة،فلازم تعرفي إن أفضل درجة حرارة تكون في البيت هي 18 درجة مئوية، وده على أقل تقدير، ولازم تحرصي على إن غرفة النوم تفضل في المعدل ده طول الليل، مع طبعا إرتداء قطع ملابس كافية، فالبرد عدو أصحال الأمراض دي.
البسي دايما شال أو كوفية
لما تيجي تخرجي إتأكتدي من لبس شال أو كوفية ولفيها كويس حوالين أنفك وفمك ورقبتك، علشان تمنعي وصول الهوا البارد لجسمك.
اعملي كل يوم شوربة
خلي دايما الشوربة طبق رئيسي على وجبة الغدا والعشا، وحتى كسناكس هيكون حلو جدا، هي مغذية أوي وبتدفي، جربي أنواع مختلفة، زي مثلا شوربة الشوفان، وشورية الفريك، طبعا اساسي شوربة العدس والخضار، وخلي دايما الليمون إضافة أساسية على الشوربة علشان تزود من قيمتها الغذائية.
نامي كويس
النوم الكافي واللي بيعتبر معدله من 6 ساعات لـ8 ساعات بيفرق جدا في نقطة الشعور بالبرد، احرصي إن فترة النوم دي تكون طول الليل، منها هتتجنبي العايش مع برودة الليل، وهتكوني نايمة ومتدفية في سريرك.
بلاش الأولاد يلعبوا برة البيت
في أيام البرد، تجنبي الخروج في أماكن مفتوحة مع الأولاد وده لحد ما الجو يستقر، علشان مهما كان مناعة الأطفال مش دايما قوية، والتعرض للهواء البارد يعتبر خطر حقيقي عليهم، فحاولي تتجنبي ده.
أتمنى تكون النصايح دي تفرق معاكي في مواجهة البرد الأيام دي.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك