محتويات المقال
النوم أكتر حاجة بتفتقدها الأمهات، وسط ليالي طويلة من الأرق، وللأسف المشكلة مالهاش حل مباشر، لأن الأمهات لو لاقوا علاج الأرق، هيظبطوا إزاي قلة النوم بسبب الصحيان الكتير للولاد كل شوية؟ المشكلة إن اضطرابات النوم سبب رئيسي من أسباب السمنة وخصوصًا في منطقة البطن، بنتكلم عن لخبطة هرمونات ومشاكل في التركيز والأداء وبالتالي صبر قليل وخلق ضيق طول الوقت. طبعًا الناس هتبدأ تدور على طريقة للنوم بسرعة، سواءً من خلال حبوب منومة أو تقنيات تساعد على النوم لكن الحل مش في كل ده. الحل الحقيقي في فهم أعمق لعملية النوم وده اللي هنشوفه من خلال 10 معلومات مثيرة عن النوم عند الرجالة والستات!
5 نصائح لـ علاج النوم الخفيف عند الرضع
الشخير للجميع
واحد من كل اتنين في العالم بيشخر.. يعني يا انتي يا جوزك يا حد من أولادك ضروري هيكون بيشخر بالليل وهو نايم ورغم إن وجهات النظر السايدة بتقول إن الرجالة بتشخر أكتر من الستات لكن في الواقع الدراسات بتقول إن الستات اللي بتشخر نسبتهم كبيرة لكن ما بياخدوش بالهم. لكن الحقيقة برضو إن الدراسات أثبتت بعد كده إن فعلًا الرجالة بتشخر أكتر من الستات. فيه دراسة واسعة النطاق أكدت إن 59% من الذكور بيشخروا مقابل 41% من السيدات ودي حاجة لها علاقة باختلافات توزيع الهرمونات والدهون بين جسم الستات والرجالة.
الشراب حلو
لبس الشراب أثناء النوم مش دايمًا غلط، رغم إن الأسطورة بتقول غلط تنام وانت لابس شراب، لكن المفاجأة إن الأبحاث أظهرت إنك لو بردانة ولبستي شراب، ده هيساعدك تنامي بشكل أسرع، لأن تدفئة القدم بتزود توسع الأوعية الدموية في الإيدين والقدمين وبالتالي بيقل الوقت اللي بيستغرقه النوم لأن المخ وقتها بياخد إشارة إن ده وقت النوم. وبالتالي بيعيد توزيع الحرارة في جميع أنحاء الجسم بطريقة ناجحة استعداد لرحلة نوم مريحة. لذلك البسي شراب وانبسطي.
اغفي يا فوزية
الغفوة ضرورية جدًا ليكي كأم مرهقة، لو حاسة إنك مش قادرة تفتحي عينك ومش فايقة يبقى غفوة الطاقة مش رفاهية، الدراسات بتقول إن فيه حاجة اسمها غفوة الطاقة (ودي عبارة عن غفوة بتاخديها في الفترة من 12:30 الظهر لـ 2 لمدة 10لـ 20 دقيقة، بتغمضي عينيكي وبتسترخي في جو هادي وبتظبطي المنبه وبتحاولي تسترخي حتى لو هتبدأي تنامي، الفكرة إنها بتدخلك في المرحلة الأولى والتانية من النوم لكن مش بتسمح لك تدخلي في مرحلة النوم العميق. ده بيخليكي فايقة، المهم تلتزمي بالوقت المحدد لإنك لو سرحتي في النوم ممكن تصحي تعبانة أكتر من قبل الغفوة.
اتّاوبي براحتك
لو بتتاوبي كتير فده مش معناه إنك عاوزة تنامي بالضرورة، خاصةً لو ده بيحصل الصبح أو على مدار اليوم. التثاؤب من الأعراض الكلاسيكية للتعب، لكن كمان له أسباب تانية زي إنك شوفتي حد بيعمل كده فهتعملي كده زيه لأنه معدي، أو لأنك حاسة بملل شديد أو لأن دماغك سخنت جدًا فبتتاوبي لأن ده شبه عملية التبريد للدماغ وجدران التجويف للجيوب الأنفية.
الستات أنشط من الرجالة
الساعة البيولوجية بتشتغل عند الرجالة بشكل مختلف عن الستات، يعني الساعة البيولوجية عند الستات بتتظبط أبكر من الرجالة، بمعنى تاني الستات بتميل إنها تنام بدري وتصحى بدري أكتر من الرجالة!
طبقي ولا يهمك
الستات اللي بتطبق، الأداء بتاعهم بيكون أفضل من الرجالة اللي بتطبق. الدراسات بتقول إن السيدات بيقدموا أداء أفضل من الرجال في حالة عدم النوم!
لو عندك أرق، ممكن تكوني بتعاني من الاكتئاب. عندي اكتئاب ومش عايزة آخد مضاد اكتئاب
العافية للستات
الناس اللي نومها ملخبط، لو راجل قدام ست والاتنين نومهم ملخبط.. الست بتقدر تتعافى بشكل أسرع من الحرمان من النوم.
حرّصي من اضطرابات النوم
اضطرابات النوم عند السيدات أكتر من الرجالة بسبب أعراض صحية زي الدورة الشهرية والحمل وانقطاع الدورة. وبالتالي المخاطر الصحية المرتبطة بقلة النوم أعلى عند الستات منها عند الرجالة بنتكلم عن مشاكل صحية زي أمراض القلب والسكر من النوع التاني والاكتئاب وزيادة الوزن وخدي بالك كويس قوي من الأخيرة.
خدي بالك
مشاكل النوم آثارها مش سهلة وبتكون واضحة جدا ومش بتفرق أبدًا بين راجل وست زي ما الأداء السليم والصحة الكويسة مش بتختلف نتايجهم عند الراجل أو الست. لأن تظبيط الشغل أهم من الشغل فتظبيط بيئة النوم أهم من النوم نفسه، لازم تستثمري في غرفة نومك إنها تكون مريحة هادية وجوها مريح، نومك بالليل هو بوابتك ليوم ناجح فيه إنجاز أكبر ومتاعب وإرهاق أقل وبالتالي ضغط أقل. شوفي أجمل ديكورات غرف نوم
المصدر
Sleep
التعليق باستخدام حساب فيس بوك