محتويات المقال
كلنا بتجيلنا فترت نقول على نفسنا مكتئبين، بس هل اللي عندنا بيكون اكتئاب فعلًا؟
منظمة الصحة العالمية قالت إن الاكتئاب هو: اضطراب نفسي بيمنع الإنسان من أداء وظائفه كما يجب.
وقالت إن تعداد المصابين بالاكتئاب في العالم بيزيد عن 350 مليون فرد، بس علشان الاكتئاب لسة بيعتبر وصمة ومش بيتعامل معاملة الأمراض التانية، ناس كتير ما بيعترفوش إنهم مصابين بيه وبالتالي مش بيسعوا إنهم يتعالجوا منه.
إيه الفرق بين الاكتئاب وتقلبات المزاج العادية؟
الاكتئاب بيخلي الإنسان يشعر بالحزن الدائم لمدة إسبوعين أو أكتر، وبيعطل قدرة آداء الفرد في محل العمل أو المدرسة أو البيت.
10 طرق للتخلص من التفكير الزائد “Overthinking”
إيه علاج الاكتئاب؟
أول طريق العلاج من الاكتئاب هو الاعتراف بيه، وتناول علاجاته اللي دكاترة الصحة النفسية بيوصفوها للمريض، بالإضافة للدعم النفسي والمشاركة من الآخرين، وده تحديدًا اللي هنتكلم عنه في المقال ده.
التأمل علاجك البديل للتخلص من الاكتئاب
لو ليكي صديقة بتعاني من الاكتئاب، خليكي واثقة تمامًا إن مرضها مش ذنبك ولا بإيدك تعالجيها لوحدك، لكن كل اللي عليكي إنك تدعميها، إزاي؟
أفكار لدعم صديقتك المصابة بالاكتئاب:
- شجعيها على الالتزام بعلاجها اللي طبيبها وصفه لها، فكريها دايمًا بمواعيد الأدوية.
- اسمعيها، بس بدون ما تنصحيها ولا تحكمي عليها ولا تديها آراء، مجرد سماعك وتفهمك لكلامها ده دعم في حد ذاته، وحسسيها إنك مهتمة إنك تفهميها وتفهمي مشاعرها.
- خلي عندك طاقة إيجابية، وفكريها طول الوقت هي كويسة أد إيه، وقيمتها كبيرة إزاي عندك وعند المحيطين بيها.
- ساعديها، لو في مهام معينة تقدري تساعديها بيها إعملي كده، لو مش عارفة تساعديها إزاي، إسأليها.
- ابعديها عن القلق والتوتر، اعمليلها روتين يساعدها على الإحساس بالتحكم أكتر في حياتها ومهماتها، زي روتين للوجبات والأدوية والرياضة والنوم والمهام المنزلية.
- دليها على أماكن ومجتمعات تساعدها، زي مجموعات الدعم، أو أي هيئات ومؤسسات بتدعم المصابين بالاكتئاب.
- شاركيها الأنشطة الروحية، لأن الإيمان والقرب من ربنا من الحاجات اللي بتساعد في العلاج من الاكتئاب، فتقدري تصلي معاها أو تسمعيها قرآن بصوت قارئ هي بتحبه.
- شاركيها، مش بس أنشطتها، خليها هي كمان تشاركك في أنشطتك، فمثلا لو بتمارسي الرياضة في مكان معين خليها تيجي معاكي، لكن لو رفضت متجبريهاش.
- احفظي سرها، مش معنى إنك بتدعميها وهي مرتاحة لدعمك، إن ده يخليكي تحكي للناس عنها أو عن كلامها أو حالتها.
- طمنيها طول الوقت إنك جاهزة لأي مساعدة أو طلب هي هتحتاجه، حتى لو الطلب ده إنها تتصل بيكي تعيط بس، طمنيها إن الأيام دي هتمر.
وافتكري دايمًا إن اللي بتعمليه ده مهما كان مرهق عليكي، لكن هو فعل نبيل جدًا عمره ما هيضيع، لا في الدنيا ولا في الآخرة.
المصادر:
التعليق باستخدام حساب فيس بوك