محتويات المقال
في حالة إنك قررتي تتخذي الرضاعة الطبيعية وسيلة التغذية الأساسية لرضيعك يبقى هنا لازم تعرفي إن اللي بتاكليه وبتشربيه بيوصل لطفلك عن طريق اللبن. علشان كده، هنتكلم معاكي النهاردة عن مشروبات الرضاعة الطبيعية وتأثيرها عليكي وعلى طفلك في الفترة دي.
المياه
من الحاجات اللي بتسببها الرضاعة الطبيعية العطش. علشان كده، حتى لو انتي من النوع اللي مش بيشرب مياه كتير، أو بتنسي تشربي، الرضاعة الطبيعية هتخليكي تحسي بالعطش أكتر من أي وقت فات. علشان كده، مهم جدًا إنك تحافظي على وجود مصدر للمياة قريب من إيدك وتشربي باستمرار.
الحلبة
رغم فوائد الحلبة الغير عادية إلا إنها بتقابل بالرفض من الأمهات على أساس إنها بتسبب رائحة غير محببة للجسم، وبتكون حجتهم إن أصلًا الرضاعة كفاية في نقطة روائح الجسم، بس الحقيقية انتي تقدري تتغلبي عليها عن طريق إنك تعمليها زي الشاي الكشري، اللي هو تحطي معلقة حلبة في مج وتصبي المياه عليها مع عودين قرنفل وتغطيها لحد ما الحبوب حجمها بتضاعف، الحبوب طعمها حلو بس تجنبيها لو مش بتحبي ريحة الحلبة تظهر بقوة عليكي.
شوفي هنا اعرفي كل فوائد الحلبة وازاي تستفيدي منها من غير أضرارها
اللبن
خلينا نعترف إننا جيل بيعاني من علاقة غير إيجابية مع اللبن رغم كل محاولات أمهاتنا إن العلاقة دي تكون أحسن من كده. وده حرفيًا بيأثر على بنية العظام اللي بتبان قوي في فترة الحمل، اللبن مصدر أساسي للكالسيوم ومواد غذائية كتير بتفقديها وقت الرضاعة، اللبن يقدر يعوضها، لو مش بتحبيه حاولي تشربيه متقلب مع أي نوع فاكهة وقللي السكر على قد ما تقدري علشان زيادة الوزن.
الينسون
من المشروبات الحلوة جدًا لينا احنا كستات ومهدئة جدًا للأعصاب، وفوق كل ده هي من المشروبات اللي بتساعد على إدرار اللبن جدًا، حاولي تشربي منها يوميًا بديل للشاي.
البابونج
اسمه أوقات الشيح البابونج أو زهر الكاموميل، بجانب إنه من أقوى الأعشاب المطهرة ومستخدم بشكل واسع جدًا كغسول في حالة وجود التهابات مهبلية، وفي نفس الوقت لو جسمك فيه التهابات داخلية هيكون ده اختيارك الأول للعلاج، إلا إنهم لاقوا إن من مميزات استخدامه إنه مدر للبن ومهدئ جميل جدًا ليكي ولطفلك.
الجنزبيل/ زنجبيل
فوائد الجنزبيل تكاد تكون ما لهاش عدد، ومن ضمنها تزويد لبن الرضاعة، بس خلي بالك وانتي بتتعاملي معاه، لإنه أيوة هيديكي نشاط وطاقة وهيعلى الحرق جدًا عندك، بس الزيادة فيه قد تسبب تعب في معدتك، فلو مش هتستخدميه بصورته الطبيعية وهتجيبيه مجفف، يبقى ربع معلقة صغيرة مقدار كافي جدًا ليكي مرة واحدة في اليوم.
شوفي هنا كل اللي عايزة تعرفيه عن فوائد الجنزبيل
العصائر الطبيعية
من الحاجات المهمة جدًا إنك تركزي فيها جزئية إن جسمك يكون مترطب وبعيد عن الجفاف اللي بدوره بيأثر على إدرار اللبن. علشان كده، شرب العصائر الطبيعية قليلة السكر مش العصائر المعلبة اللي مليانة سكر هتساعدك على زيادة اللبن. وفي نفس الوقت هتبعد عنك شبح الإمساك وزيادة الوزن.
الشوربة
فيه ناس مش بتحب فكرة الشوربة في حد ذاتها، وفي ناس تانية وجود الشوربة دي شيء أساسي، شوربة الفراخ أو اللحمة لا تتخيلي قد إيه بتكون مليانة مواد غذائية محتاجها جسمك جدًا لأنه بيفقدها في لبن الرضاعة باستمرار، وفي نفس الوقت هي بتوفر لك شعور بالشبع بسعرات حرارية قليلة جدًا وبالتالي بتساعدك على التخلص من الوزن الزائد.
تقدري تقولي إن دي أهم مشروبات هتحتاجي توفريها لنفسك خلال اليوم في فترة الرضاعة الطبيعية، ونصيحة دايمًا جدتي كانت بتقولها وتوارثتها أجيال الأمهات في العيلة هو شرب الملوخية، بس قللي التوم طبعا لأنه هيسبب لك ولطفلك انتفاخات، فصين توم صغيرين كفاية، وبالهنا والشفا ليكي ولرضيعك.
مشروبات لازم تشربيها بحذر
المشروبات الغازية
الأبحاث لاقت إن شربك للمشروبات الغازية الدايت من مرتين لتلات مرات في الأسبوع مش بيكون لها تأثير سلبي على لبن الرضاعة، وتقدري تستخدميها كواحدة من المشروبات المنعشة ليكي وخليكي حريصة إنها تكون دايت لتقليل نسبة السكر اللي داخلة دمك.
القهوة أو الشاي
لو انتي من عشاق الكافيين وبتعتبريه درع الحماية الأول والدافع الأساسي ليكي في اليوم مش هاقدر أقول لك غير عندك حق، بس فيه مشكلة بسيطة بندفع تمنها غالي لو بنرضع طبيعي هو إن الكافيين بتسرب للبنك وبالتالي رضيعك هيشرب كافيين هو كمان. وده شيء هيصعب عليه النوم ويسبب نوبات من التوتر ليه. علشان كده، حاولي تكتفي بكوب أو اتنين على أقصى تقدير في الفترة الصباحية، علشان طفلك يقدر يحصل على قسط كافي من النوم خلال الليل.
ولو عايزة أفكار مختلفة للشوربة هتلاقيها هنا.
المصادر:
www.healthxchange.sg
www.medela.com
www.healthline.com
www.babycentre.co.uk
التعليق باستخدام حساب فيس بوك