محتويات المقال
الانتقال من البوتي إلى التواليت مرحلة مهمة جدًا، صحيح بتحسي بإنجاز عظيم لما ابنك/بنتك يتعودوا يتخلوا عن الحفاضات ويبدأوا يطلبوا يعملوا حمام في “البوتي” أو “القصرية” لكن بتلاقي نفسك فجأة لسه متورطة لإن القصة ما انتهتش والمفروض بعد ما عودتي ابنك/بنتك يقضوا حاجتهم في البوتي وعديتي مرحلة أخطاء البوتي ترينينج، هتبدأي تشرحي إن المرحلة اللي بعد كده هي التواليت ودي ناس كتير بتتصور إنها سهل لكن للأسف أحيانًا بتكون في صعوبة خلع الحفاض.
لو انتي من الناس اللي لسه ما بدأتش البوتي ترينيج بننصحك إن البداية تكون مع التواليت مباشرة أولًا هيوفر عليكي تعب كتير جدًا له علاقة بالتنضيف. ثانيًا هيعود الطفل مباشرة على إن قضاء الحاجة في الحمام مش في أي مكان، وهيخلي تركيزه أعلى في الحاجة الجديدة اللي بيتعلمها لإنه مش قدام ألعاب في غرفته أو قدام التلفزيون أو أي حاجة تانية تلهيه وده بيخلي الأمور صحيح صعبة في الأول لكن أسهل فيما بعد.
في المقابل، بعض الأطفال بيكونوا مرعوبين من التواليت وبيتخيلوا مخاوف كتير جدًا. وعشان كده، بيكون الحل في البوتي كحل وسط، ووسيط للانتقال من الحفاض للتواليت. وفي المقال ده، مجموعة نصايح هتخليكي تنجزي المهمة في وقت قياسي وبنجاح.
محتاج تعود
هتحتاجي تفهمي ابنك/بنتك إن البيبي اللي بيعمله في البوتي مكانه الحمام، وإنك إنتي وباباه وإخواته بتدخلوا التواليت عشان تعملوا نفس الشيء اللي هو بيعمله في التواليت وكل مرة تدخلي الحمام تفهميه وتشرحي له إن الكيكي واليورن أو أيًا كان الاسم اللي بتقولوه مكانه جوه التواليت مش البوتي.
وداعًا للحفاض
من الخطوات الأساسي اللي هتخلي ابنك/ بنتك يحسوا إنهم خلاص كبروا وعدوا المرحلة القديمة بننصحك ما تاخديش خطوة الحفاض البانتي غير لما تكوني فعلًا ناوية بتدأي تدريب البيبي على خلع الحفاض والانتقال للتواليت بدل البوتي والحفاض العادي.
بقينا كبار خلاص!
الطفل محتاج يرتبط بأجواء التواليت عشان كده لازم تحافظي على قاعدة مهمة جدًا وهي إن البوتي ما تخرجش بأي شكل من التواليت، عشان يرتبط في دماغه بشكل عملي إن الحمام مكانه التواليت ويبدأ يحس إنه زي إخواته الأكبر منه وكل الناس اللي بتدخل المكان ده وبالتالي يعمل زي ما بيعملوا.
اقرأي أيضًا: أحسن طريقة للرد على أسئلة الأطفال المحرجة
قاعدة مبهجة
من الأسرار اللي بتسرّع عملية تعود الطفل على التواليت بدل البوتي إنه يحبه. ومفيش حاجة هتشجعه وتحمّسه أكتر من قاعدة تواليت شكلها جميل باللون اللي هو بيحبه، تقدروا تنزلوا تتسوقوا وتخليه يختارها بنفسه، وفي الوقت ده، هيكون متحمس جدًا إنه يجربها.
طقوس رائعة
مش هتصدقي السعادة والحماس اللي على وش ابنك/بنتك لما يحس إنه في طقوس مرتبطة بالحمام زي إننا نشد السيفون قبل ما نستخدمه لو مش نضيف، ونشد السيفون بعد لما نخلص عشان نسيبه نضيف. ده بيخليه عاوز ينجز عشان يوصل للمرحلة دي في أوقات كتير.
التواليت للجميع
من أهم الخطوات عشان تخلي ابنك/بنتك يتعودوا على التواليت إنك تدخليهم التواليت في أماكن مختلفة وتستغلي رغبة الاستكشاف عندهم، أي مكان عام تروحوه، مول، بيت قرايب، أصدقاء، جيران، أي مكان خلي ابنك/بنتك يدخلوا التواليت هناك.
التطهير والسيت أولًا
من الطقوس الممتعة والمهمة جدًا بما إنك هتدّخلي الطفل أماكن عامة إنه يطهر المكان، إزازة بخاخة صغيرة معاكي فيها مطهر هتقضي الغرض وهتخليه يتعلم إنه لازم ينضف المكان كويس ويستخدم سيت التواليت البلاستيك “الغلاف البلاستيك الدائري” لإن المكان العام مش أمان نستخدمه.
التشجيع والتذكير
الموضوع مش سهل لكن مش مستحيل، اوعي وسط التعب تنسي تعملي فرح لما تلاقيه التزم بالتواليت، هيصي وكافئيه.
الصبر طيب
ما تنسيش إنك بتعلمي الطفل حاجة لعمره كله، مش معلومة هيمتحن فيها وبعدين ينساها، ما تزهقيش ولا تملي، الموضوع بينتهي في لحظة لكن أكيد محتاج صبر.
اتبسطوا
ما تنسيش لما يتعود إنك تحتفلي بيه بتورتة بسيطة تحسسه إنه عمل شيء رائع، استمتعوا بكل خطوة مع بعض بحب وفرحة.
اقرأي أيضا تجربتي: حكاية ابني مع حساسية الطعام
التعليق باستخدام حساب فيس بوك