محتويات المقال
من التحديات اللي بتواجه الأمهات هي نوبات بكاء الرضع، اللي بتبدأ بشكل ملحوظ من عمر أسبوعين لحد ما تهدى على عمر الشهر الرابع، بس اللي بيحصل إن نوبات بكاء الأطفال الرضع مع التعب الصحي والنفسي وقلة النوم والإحساس بالإرهاق والضغط بتبقى جحيم حقيقي للأمهات. علشان كده، جيبنا لك 10 نصائح ذهبية هتساعدك جدًا في التغلب على نوبات البكاء وتخليها تعدي بهدوء، النصائح دي هي:
10 نصائح للتغلب على نوبات بكاء الرضع
-
القماط أو Swaddle
المميز في الحركة لف الرضيع حديث الولادة لفة القماط إنها حتى لو بان قدامك إنه متكتف، بس هو في الحقيقة بيرجع له إحساس إنه لسه في الرحم واللي هو أكثر بيئة هادية ومريحة له ويعرفها جدًا. العالم الخارجي بالنسبة له مكان جديد ومزعج. علشان كده، القماط مريح لأعصابه وبيساعد على وقف نوبة بكاء الرضع.
-
غيري طريقة شيله
من الحاجات اللي بتسبب نوبات بكاء الأطفال الرضع الغازات اللي فعلًا بتكون مؤلمة جدًا، أمعائه لسه بتتحرك وبيتعلم الرضاعة، فبطنه بتكون مليانة غازات، أفضل طريقة علشان تريحه إنك ما تشيليش طفلك على كتفك، شيليه نايم على دراعك كأنه نايم على بطنه، الضغط ده بيريح أمعائه وبيساعد إن الغازات تخرج وبالتالي وقف نوبة البكاء.
هنل ممكن تشوفي دليلك الوافي للتعامل مع القيء عند الرضع
-
شغلي الضوضاء البيضاء White Noise
من الحاجات اللي ممكن تكون جديدة عليكي إن طفلك لما كان في رحمك، كان سامع كل أحشائك اللي إنتي مش سامعاها بس هي بالنسبة له صوتها عالي جدًا. الأصوات دي مألوفة له جدًا ومريحة. لما يخرج للحياة، سماعه للنوع ده من الأصوات بيريّح أعصابه وبيرجع له شعور الأمان. علشان كده، لو شغلتي جنبه صوت مروحة، أو غسالة صحون، أو دش المياه أو حتى المكنسة الكهربائية. هتلاحظي إن الأصوات دي بتسكته وبتجذب انتباه وبترجع له الهدوء من تاني وفيه تطبيقات بتوفر الأصوات دي علشان تشغليها في أي وقت.
-
استخدمي التتينة
في حركة غريزية موجودة عند كل الرضع وهي المص. علشان كده، التيتينة أو حتى الرضاعة سواء طبيعية أو صناعية بتساعد على تهدئتهم في نوبات البكاء.
-
طفي الأنوار
من الأمور المثيرة لتوتر الرضع هي الأنوار الساطعة، لإنها معاكسة جدًا للطبيعة اللي كان عايش فيها في رحمك، علشان كده حاولي تخلي الأضواء في مكان وجوده هادية. استعيني بالستائر التقيلة وأباجورة هادية أو وناسة هيكون تأثيرها لطيف عليه.
بلاش تحتاري في أكلات البيبي .. 5 أفكار لأكلات الرضع: بيبي فوق 6 شهور
-
غيري مكانك
من التصرفات اللي تقدر تساعدك في تهدئة نوبة بكاء إنك تغيري مكانك، يعني لو قاعدة في أوضة، غيّريها، ادخلي المطبخ أو البلكونة أو حتى لو فيه إمكانية للخروج والتمشية، لمدة ربع ساعة هتلاقي إنها بتهدي طفلك جدًا.
-
خلّي حد تاني يشيله
أوقات من كتر ما بتكوني انتي تعبانة ومضغوطة جدًا، شعورك ده بينتقل لرضيعك، وبالتالي بيحس بنفس إحساسك. علشان كده، لو حد تاني في البيت عندك شاله وهو أكيد مش تعبان زيك، ده بيساعد على عودة الهدوء تاني لطفلك.
-
تدليك لجسمه
أثبتت الدراسات إن الرضع حديثي الولادة بيهدؤوا جدًا بملامسة جلدهم لجلد الأم. علشان كده، لو خدتي خطوة المساج دي هتحسي إنه بيهدى جدًا، بس لو استخدمتي أي زيوت للمساج ده، من المهم تستشيري الطبيب علشان تتأكد إن مفيش أي تأثير سلبي عليه.
-
كرّعيه:
من الحاجات اللي ممكن تهملها الأمهات الجدية أو تعتبرها دقة قديمة هي النقطة دي، اللي كتير مش واخدين بالهم إن فكرة الرضاعة جديدة على طفلك وهو لسه مش بيعرف يرضع صح، فاللي بيحصل إنه بيمتص هوا في نفس وقت الرضاعة اللي بيتجمع في بطنه وبيسبب وجع بيخلي نوبة البكاء تبدأ من جديد.
-
اتأكدي إنه بيرضع:
أوقات في الرضاعة الطبيعية بيكون الثدي مفيش فيه كمية اللبن الكافية لإشباع الرضيع وده بيخليه يدخل في نوبة بكاء. علشان كده، من المهم تتأكدي من تدفق اللبن عندك علشان يقدر يرضع بهدوء.
النصائح اللي فاتت هتساعدك جدًا في التغلب على نوبات بكاء رضيعك. مفيش أي داعي إنك تترددي في طلب المساعدة، وجود طفل رضيع طبيعي جدًا بيخلق ضغط عليكي. علشان كده، أرجوكي اطلبي المساعدة وحاولي ترتاحي على قد ما تقدري.
المصادر
www.webmd.com
www.parents.com
www.irishtimes.com
التعليق باستخدام حساب فيس بوك