محتويات المقال
الفتة هي الأكلة الرسمية في أكلات عيد الأضحى ،اللي مفيش بيت في مصر ما بيعملهاش بطريقته ونكهته الخاصة. يمكن يكون العيد الكبير هو واحد من الأعياد الغنية جدًا بأشكال وألوان من الأكلات المميزة اللي كلها بتعتمد على مكون رئيسي واحد وهو طبعًا اللحمة. عشان كده، أنا بحب أسميه عيد الأكيلة، من كتر الأطباق المتنوعة اللي بيتميز بيها، لكن تفضل الفتة المصرية بالخل والتوم متربعة على عرش أكلات العيد الأضحى. النهارده اختارت لكم 3 طرق لعمل الفتة منها طريقة عمل الفتة المصرية الشهيرة، وطريقتين تانيين جداد ومختلفين، طريقة فتة السجق الشرقي وطريقة فتة الريش الضاني.
-
الفتة المصرية بالخل والتوم
الفتة المصرية – أكلات عيد الأضحى – المصدر thehappyfoodie
مقادير عمل رز الفتة
- 2 كوب رز مصري مغسول ومتصفي
- 1 معلقة كبيرة سمن بلدي أو زبدة
- ملح وفلفل أسود
- 1 ورقة لورا
- 2 فص مستكة
- 2 ونص كوب مرقة اللحمة أو ماء
طريقة سلق اللحمة
- 1 ك لحمة كندوز من الموزة (أو رقبة ضاني بالعظم)
- ملح وفلفل أسود
- جوزة الطيب
- حبهان وورق لورا
- 4 فصوص مستكة
- 2 بصلة مكعبات
- 2 عود كرفس
- 1 جزرة مقطعة مكعبات
- ماء
طريقة عمل صلصة الفتة
- 5 فصوص توم مفرومين
- 1/2 كوب خل
- 2 معلقة كبيرة صلصة طماطم
- 2 كوب عصير طماطم طازة
- 1 كوب مرقة لحمة
- 1 معلقة صغيرة سكر
- ملح وفلفل
- 1 معلقة صغيرة سبع بهارات
- 2 معلقة صغيرة كزبرة
- 1 معلقة صغيرة كمون
- سمن بلدي أو زبدة
- مكعبات عيش بلدي متحمص في الفرن مع شوية من التوم المفروم ورشة ملح وفلفل أسود وزيت نباتي
طريقة عمل الفتة المصرية بالخطوات
- لعمل الرز: في حلة على النار، شوحي المستكة مع السمنة أو الزبدة لحد ما تدوب تمامًا، ضيفي الرز وحمصيه كويس وضيفي المرقة أو المياه للرز مع الملح والفلفل وورق الورا.
- سيبي الرز يغلي وبعدها هدّي النار وسيبيه يستوي على نار هادية.
- لسلق اللحمة: في حلة كبيرة على النار، ضيفي اللحمة والخضراوات: البصل والجزر والكرفس مع الفلفل الأسود والحبهان، اللورا والمستكة وشوحي كل المكونات على نار متوسطة لمدة 5 دقايق.
- ضيفي المياه وسيبي المزيج يوصل لدرجة الغليان. بعدها هدي النار وسيبي اللحمة تغلي غليان بطيء على نار هادية لحد ما تستوي تمامًا وضيفي الملح بعد ما تبدأ اللحمة تدخل في السوا.
- لعمل الصلصة: في كاسرولة على النار، شوحي التوم في السمنة أو الزبدة لحد ما ياخد لون ذهبي فاتح، ضيفي الخل والصلصة وعصير الطماطم والمرقة وقلبي كل المزيج مع بعض كويس.
- تبلي الصلصة بالبهارات والملح والفلفل مع رشة من السكر لتقليل حموضة الطماطم والخل، غطي الصلصة وسيبيها تتسبك ويتركز طعمها.
- لتقديم الفتة: في بايريكس، رصي العيش المحمص واسقيه بمرقة اللحمة وشوية من الصلصة، وبعدين ضيفي طبقة من الرز المطبوخ وفوقيه باقي الصلصة وقطع اللحمة بعد ما تحمريها في شوية من السمنة أو الزبدة، ورشي عليها شوية من الفلفل الأسود وجوزة الطيب.
ممكن تشوفي هنا .. امتى الأطفال ينفع يشوفوا ذبح الأضحية؟
-
طريقة عمل فتة السجق الشرقي
طرق لعمل الفتة – أكلات عيد الأضحى – المصدر whensuecooks
الفتة دي مبتكرة جدًا ومختلفة، وتنفع للناس اللي عايزة تاكل وصفة غنية ولذيذة بس من غير غلبة ووقت طويل، زي الوقت اللي بتاخده عمل الفتة العادية وخصوصًا سلق اللحمة. السجق غني بالنكهة والبهارات اللذيذة وما بياخدش أي وقت في الطبخ. كمان الوصفة دي مزيج بين النكهة المصرية والنكهة اللبنانية للفتة لإنها بتتقدم مع صوص من الزبادي والطحينة جربوها هتدعولي.
المقادير
- 2 كوب رز مصري مطبوخ (بنفس الطريقة السابقة)
- 700 جم سجق شرقي مقطع قطع كبيرة
- 1 بصل متقطع شرايح
- فلفل ألوان شرايح
- 2 معلقة صغيرة سبع بهارات
- 1 معلقة كبيرة توم مفروم
- 1 معلقة صغيرة كزبرة ناشفة
- 1 كوب عصير طماطم
- 1 معلقة كبيرة صلصة طماطم
- 1 كوب مرقة خضار أو مياه
- ¼ كوب خل أبيض
طريقة عمل صلصة الزبادي
- 300 جم زبادي
- ¼ كوب طحينة
- 1/2 كوب كزبرة خضرا مفرومة
- 1 معلقة صغيرة توم مفروم
- ملح وفلفل
- زيت نباتي
- عيش بلدي أو لبناني محمص للتقديم
طريقة عمل فتة السجق الشرقي
- لعمل صلصة الزبادي: اخلطي كل المكونات مع بعض وسيبيها في التلاجة لحد وقت التقديم.
- في طاسة على النار، شوحي السجق مع معلقة من الزيت النباتي. ضيفي التوم المفروم وشوحيه لحد لونه ما يبقى ذهبي. ضيفي عليه البهارات كلها لحد ما تتحمص وتظهر ريحتها، وبعدين ضيفي الخضراوات: البصل والفلفل الألوان.
- ضيفي الخل الأبيض والصلصة وعصير الطماطم وشوية من المياه لو احتاجتي، وسيبي الصوص يتسبك على نار هادية والسجق يستوي تماما لمدة 15 دقيقة.
- جمعي الفتة: في طبق التقديم، رصي طبقة من العيش المحمص، وعليها شوية من صلصة الزبادي ورشة كزبرة خضرا، وبعدها طبقة من الرز الأبيض وعليها خلطة السجق، وعلى الوش طبقة تانية من صلصة الزبادي والكزبرة الخضرا.
-
فتة الريش الضاني بالنعناع
طرق لعمل الفتة – المصدر johngregorysmith
نوع تاني مفتكس جدًا من الفتة، خفيفة ولذيذة وسهلة جدًا في تحضيرها وطريقة تقديم مختلفة للريش الضاني الشهيرة. الفتة دي ممكن تتقدم مع الرز و العيش المحمص، أو مع العيش فقط بدون رز حسب ذوقك.
المقادير
- 3 أكواب رز مصري مستوي بالطريقة السابقة (أو بسمتي)
- 6 قطع من الريش الضاني
- زبدة
مقادير تتبيلة الريش
- ملح وفلفل
- 1 معلقة صغيرة 7 بهارات
- 2 معلقة صغيرة نعناع مجفف
- 2 معلقة صغيرة من الكزبرة الناشفة
- 2 معلقة صغيرة توم مفروم
مقادير عمل طشة الكزبرة والنعناع
- 2 معلقة كبيرة زبدة
- 1 معلقة كبيرة توم مفروم
- 2 معلقة صغيرة كزبرة ناشفة
- 2 معلقة صغيرة نعناع مجفف
- ¼ كوب خل أبيض
- 1 كوب مرقة لحم أو خضار
- ملح وفلفل
- 1 كوب أوراق نعناع طازة
طريقة عمل صلصة الزبادي
- 400 جم زبادي يوناني
- 2 معلقة صغيرة توم مفروم
- 2 معلقة كبيرة زيت زيتون
- ملح وفلفل
- 2 معلقة صغيرة نعناع ناشف
لتزيين وتقديم الفتة
- عيش بلدي أو لبناني محمص للتقديم
- لوز محمص أو صنوبر للتقديم
- حبوب رمان وورق نعناع
طريقة عمل فتة الريش الضاني بالنعناع
- هنتبل الريش بكل مكونات التتبيلة، ونسيبها على الأقل ساعة في التتبيلة، قبل ما نشوحها في الزبدة في طاسة سخنة جدًا، وممكن نشويها على الجريل.
- هنخلط كل مكونات صلصة الزبادي ونسيبها في التلاجة لحد وقت التقديم.
- هنجهز الطشة: نشوح التوم مع الكزبرة والنعناع الناشف في الزبدة وبعدين نضيف الخل والمرقة ونتبل ملح وفلفل.
- نجمع الفتة: العيش المحمص هنسقيه بشوية من الطشة وصوص الزبادي وفوقه الرز، ونرص على الوش الريش مع باقي الطشة وصلصة الزبادي وأوراق النعناع والمكسرات المحمصة.
وبكده بنكون قدمنا لك طرق لعمل الفتة جديدة غير التقليدية. يا رب تكون الوصفات عجبتكم. يهمنا دايمًا رأيكم في الوصفات، ولو جربتوها صوروها وشاركونا إبداعاتكم، كل سنة وانتم طيبين.
التعليق باستخدام حساب فيس بوك