ساعات كدة الواحدة فينا بيجيلها أفكار تعملها ومش دايمًا بتكون الأفكار دي أفكار كويسة وعادة بتنتهي نهاية تضرنا.. في مقال لطيف قرأته على موقع Thought Catalog عرضوا مجموعة من الأفكار دي.. أفكار ملهاش أي لازمة وضررها أكبر من نفعها، عجبني كتير منها وضفت عليهم شوية أفكار من عندي لايقة مع ثقافتنا..
يلا بينا..
1-إنك تروحي تتكلمي مع حد وإنتي متنرفزة، صحيح مممكن يكون معاكي حق بس أكيد هتعكي كتير.. استني لما تهدي الأول دايمًا وبعدين اتكلمي.
2-تدخلي علاقة عاطفية مع راجل باين مع الأول إنه نرجسي وكل الـRed Falgs باينة ومنوّرة وتقولي هيتغير معايا.
3-إنك تثقي في أي حد وتقولي حاجات: ممكن تفضحك لو اتعرفت- ممكن تسجنك- ممكن تدمر علاقتك بجوزك.
4-تسلّفي فلوسك لناس ما بيرجعوش الفلوس أو بيرجعوها ناقصة.. (يستثنى من الكلام ده الصدقات المالية).
5-تبدأي تتكلمي وتبعتي رسايل للEx بتاعك وإنتي عارفة إنك مش المفروض ترجعيله.
6- تقرري تحملي علشان تحسني علاقتك إللي زي الزفت بجوزك.
7-تنشري صورك وإنتي بتعملي حاجات غير قانونية ومتحررة على السوشيال ميديا ممكن تتسبب بإعتقالك أو تنهي وظيفتك.
8-تفضفضي بأسرار شخصية مع حد ما بيتبلش في بقه فولة وبيحب الـGossiping.
9-تقولي لنفسك إنك هتطبقي لحد بكرة وتنامي بدري علشان نومك يتظبط.. غالبًا مش بتعرفي تطبقي وبتنامي ساعتين متأخر قوي وبرضه مش بتنامي بدري.
10-تبعتي صور ليكي بلبس خليع على الموبايل -هتسبب لك مصيبة لو اتسربت- لأي حد حتى لو صاحبتك او جوزك..
11-تحاولي تسعدي الكل وترضي الجميع.
12-التسويف.. إنك كل ما تعوزي تبداي حاجة تقولي هبدأ من بكرة.
13-تاكلي كل إللي نفسك فيه النهاردة علشان بكرة هتبدأي دايت..
14-تسألي واحدة: “مفيش حاجة جاية في السكة” أو “إيه ده! إنتي حامل”؟ صدقيني مفيش حاجة مستاهلة تحرجي نفسك ولا حد كدة.
15-كل يوم تقومي وتقفلي الـمنبه وتكملي نوم وتضيعي النهار.
16-تدخلي في مشروع شركة مع أنتيمتك أو حد عزيز من عيلتك.. عادة بتحصل خلافات.
17-عدم التركيز في وسيلة منع الحمل إللي بتستخدميها وعدم حساب معاد التبويض وإنك ما تبقيش عارفة موعد دورتك الشهرية.
18-تغيري شخصيتك وتمثلي وتلبسي ماسك مش بتاعك علشان تعجبي راجل.
19-تفضفضي مع راجل في أمور شخصية جدًا في وقت متأخر علشان حاسة إنه جوزك مش فاهمك ومحتاجة حد يسمعك..هتقلب غم!
20-تجربة المخدرات بدافع الفضول والأسوأ لو مش عارفة هي إيه..
21-تحسي بحاجة في جسمك بتوجعك فتدخلي تدوري على جوجل علشان تشوفي عندك مرض إيه.
22-تدخلي على موقع تعارف زي تيندر أو هارمونيكا تتعرفي على شخص وإنتي بتعيطي ومنهاردة وحاسة بضعف ونفسك مكسورة.. لإنك غالبًا هتكلمي أي حد وخلاص.
23-تعملي تاتو دائم باسم حبيبك / جوزك على جسمك.
24- تمشي توزعي كلمة السر بتاعة الكريدت كارد بتاعك على صاحباتك.
25- تضربي شعرك بلون غريب لمجرد إنه طلع حلو على صاحبتك.
26-تجيبي فستان أصغر منك بنمرتين تلاتة وتعلقيه في الدولاب لحد ما تخسيله..
27-تدخلي السوبر ماركت تشتري أكل وإنتي جعانة جدًا.
28-يكون عندك أي مرض جسدي أو نفسي مزمن محتاج أدوية وتلعبي فيها من دماغك من غير استشارة دكتور.
29-تعملي عملية تجميل صعبة خطر على حياتك من غير سبب حقيقي بيأثر على حياتك بشكل جذري.
30-تبصي لبيبي لسة مولود وتقولي :”إيه الوحاشة دي”.
التعليق باستخدام حساب فيس بوك