أنا شيماء الجمال، خسيت 40 كيلو من وزني وبدوّن معاكم تجربتي في سلسلة مقالات عن التغذية والصحة والرياضة بعنوان #من_الكرش_للكيرفي..

يلا بينا نبدأ..

في المقال السابق اتكلمت عن النشويات المصنعة أو النشويات البسيطة وإزاي هي أول حاجة محتاجين نفهم عنها أكتر ونخلّي بالنا منها لو عايزين نخس..  ممكن تقرأي المقال السابق من هنا

دلوقتي هقولك على 4 طرق للقضاء على نهم الحلويات أو النشويات أو مشكلة الـCraving

1-ظبّطي مكونات الوجبة.. بلاش يبقى أغلبها نشويات

النهم أو الـCraving  وإحساسك إنك عايزة تاكلي حاجة مسكّرة أو حاجة مليانة نشويات بييجي لما وجبتك إللي فاتت تكون مليانة نشويات وتكون مفيهاش بروتين ودهون صحية كفاية وخضار.. لازم الوجبة يكون أغلبها بروتين وخضار والقليل من الدهون الصحية والنشويات دي تكون أقل حاجة بعد كدة وممكن تمنعي النشويات تماما في بعض الوجبات. لو زودتي البروتين والدهون الصحية وقللتي النشويات في كل وجباتك إحساسك بالجوع هيقل على مدار اليوم.. على ضمانتي..

2-امنعي تناول السكر والسكر الخفي

كل ما تاخدي سكر كل ما هتجوعي زيادة.. سواء سكر تحطيه عالمشروبات أو حلويات مسكرة أو أكل مليان سكر خفي.

امنعي فورا: السكر – العيش المخبوز بالدقيق- المكرونة – الشيبسيات والمقرمشات- أغلب الحبوب الجاهزة زي الكورن فليكس- الدقيق – العصاير والبيبسي -ا لمربى – زبدة الفول سوداني الجاهزة-  الصوصات إللي فيها سكر زي الهوني ماسترد والفاكهة الكتير -كفاية ثمرة واحدة في يومك كله).

3-عبّري عن  غضبك والمك

مش كل ما تفكري في حاجة تضايقك تفكري في الأكل وتروحي تاكلي.. هدي غضبك والمك بالحاجات دي:

الكلام مع حد من أصحابك.

اكتبي مشاعرك واحكي إللي حاسة بيه عالورق أو الموبايل.

اكتبي 5 حاجات ممتنة وسعيدة إنها موجودة في حياتك..

اكتبي 5 أسباب ليه عايزة تخسي..

شوفي فيلم أو العبي رياضة أو ارقصي.

4- قبل ما تاكلي استخدمي تكنيك  H.A.L.T

لما تجوعي، اسألي نفسك أربع أسئلة :  هل أنا

Hungry: هل أنا جعانة أو عطشانة؟  لو الإجابة آه روحي كلي وفي كل الأحوال اشربي لإنه العطش بيعطي إحساس كاذب بالجوع.. مبدئيًا اشربي ولو جعانة فعلا كلي حاجة مع مراعاة النقاط المذكورة فوق في أكلك.

Angry: هل أنا غضبانة من حاجة؟   لو غضبانة ولسة واكلة قريّب ما تاكليش.. انزلي امشي أو اكتبي أو العبي رياضة أو كلمي حد فضفضي فورًا.

Lonely:  هل أنا وحيدة؟ بلاش تاكلي لإنك زهقانة ومش لاقية حاجة تعمليها روحي كلمي صديقة في التيلفون.. ولو ضعفتي قوي اقعدي اعملي طبق سلاطة خضرا هتتسلي وهيكون مفيد.

Tired: هل أنا تعبانة؟  ساعات الواحد وهو مرهق بيتهيأله إنه مفرهد وجعان وعايز أكل.. لو حسيتي إنك مرهقة وعندك إحساس الهفتان والدوخة مع إنك لسة واكلة من شوية.. مددي عالسرير واشربي كوباية مية ساقعة منعشة أو كوباية حاجة سخنة من غير سكر أو بمعلقة سكر دايت.

اعرفي السعرات الحرارية الموجودة في أغلب الأنظمة الصحية واعملي نظام عذائي لنفسك

ودلوقتي قوليلنا رأيك في الكلام ده في خانة التعليقات تحت المقال ده ولو عندك سؤال اسأليني كمان..