محتويات المقال
حاسة بالإرهاق الشديد، عاطفيًا ونفسيًا وبدنيًا، حاسة إن عقلك خلاص مش عارف يعمل ستوب، دخلتي جوه حالة من الإجهاد اللي مالهوش أول ولا آخر، وحاسة إن كل قواكي مستنزفة، حياتك كأم بقت كابوس، ومع ذلك مطلوب منك تكملي عشان ما ينفعش تقفي والنتيجة التوتر بيزيد مع الوقت، صحتك النفسية في خبر كان، وبتلاقيكي بقيتي شبه الماكينة، بتقدمي المطلوب لكن بدون روح، بتفقدي الاهتمام والدافع، ومع الوقت ما بتبقيش تقدمي أبسط الحاجات اللي اتعودتي تقدميها بمنتهى الحب والنشاط، لو كل الكلام ده ينطبق عليكي فانتي بتعاني غالبا من ظاهرة الـ Burnout.
علامات وأعراض الإرهاق المزمن أو الـ Burnout
من أول لحظة في اليوم كل حاجة تقيلة، مش قادرة تشيلي نفسك من على السرير عشان تبدأي اليوم، كل حاجة تقيلة ورخمة، وكل المطلوب محسسك بخنقة، مش متحملة كلمة أو حركة من حد، منهكة جدا، والموضوع ما بيتحسنش بالنوم أو حتى بتغيير الجو، بل بيزيد أكتر وأكتر، ده اسمه Burnout وليه علامات مختلفة
يعني مثلا ليه علامات وأعراض جسدية زي:
- الصداع المتكرر
- الآلام العضلية
- تغير الشهية
- تغير عادات النوم
- الشعور بالتعب والاستنزاف معظم الوقت
- انخفاض المناعة والأمراض المتكررة
ليه علامات عاطفية زي:
- فقدان الدافع
- الشعور بالفشل والشك في النفس
- النظرة المتشائمة والسلبية لكل حاجة (مفيش فايدة)
- الشعور بالعجز والحصار والهزيمة
- قلة الرضا والشعور بالإنجاز
- الانفصال والشعور بالوحدة في العالم
ليه كمان أعراض سلوكية زي:
- استخدام الطعام أو المخدرات أو التدخين عشان تتأقلمي
- الانسحاب من المسؤوليات مع الوقت
- إخراج إحباطاتك في الآخرين وطبعًا أقرب حد بيكون ولادك
- عزل نفسك عن الناس مش عاوزة تشوفي حد
- التأخير على الشغل
- المماطلة يعني بتاخدي وقت أطول من الطبيعي في حاجات ممكن تخلص بسرعة جدًا
أسباب الـ Burnout
الحقيقة إننا لو اتكلمنا عن أسباب هذا القاتل الصامت مش هنلاحق، يعني تقريبا كل تفصيلة بتعدي علينا في اليوم بتساهم في ده جدا يعني مثلا:
في أسباب متعلقة بالشغل زي:
- الشعور بقلة التقدير
- الشعور بالفوضى
- إن الشغل يكون ممل أو صعب
- ضغوط كتير في وقت قليل
- توقعات أكبر منك
ممكن يحصل بسبب نمط الحياة زي:
- الشغل الكتير جدا مع غياب أي وقت للتواصل الاجتماعي أو الاسترخاء
- مفيش في حياتك علاقات وثيقة تدعمك وتسندك بجد
- شايلة مسئوليات أكبر منك ومفيش مساعدة من حد
- مش بتنامي كويس
وطبعا في بعض السمات الشخصية اللي ممكن توصلك وانتي مستريحة للـ Burnout زي:
- المثالية الشديدة ورغبتك المستمرة في الكمال
- نظرتك المتشائمة لنفسك وللعالم
- شعورك بالرغبة في السيطرة وعدم قدرتك على تفويض الآخرين في أي حاجة
إيه الحل؟
التعامل مع الإرهاق المزمن أو الـ Burnout مش سهل، سواء كنت في على وشك الانهيار أو خلاص عديتي المرحلة ودخلتي في المرحلة الغامقة، ففي الحالتين محتاجة تعرفي إزاي تتعامل مع الموضوع لأنك ممكن تحاولي تقللي الارهاق فتلاقي الموضوع جاي بالعكس، المسألة محتاجة منك 5 حاجات مبدئيا، أولا تراجعي العلامات المذكورة فوق وتشوفي انتي فعلا عندك ده أو لأن ثانيا فورا تلتمسي الدعم النفسي وتلاقي استراتيجيات لإدراة التوتر، وتالت وأهم حاجة ابتدي ابنك دفاعاتك الحقيقية وصمودك في وش الاحتراق الذاتي من خلال:
-
دوري على ناس تسندك
لما تحسي بإرهاق شديدة وتحسي إن خلاص مفيش أي حاجة راضية تتحل وكل حاجة متكومة فوق راسك، اتصلي بحد من اصحابك، التواصل الاجتماعي الحقيقي مش الإلكتروني حل سحري، الكلام وجها لوجه مع صديقة أسرع الطرق اللي ممكن تهدي جهازك العصبي وتخفف التوتر عندك، بنتكلم هنا عن أصحاب، أو زوج، أو زملاء عمل علاقتنا بيهم كويسة، لو مفيش كل دول هيكون مفيد لو انضمينا لمجموعات شبهنا بتحب الحاجات اللي بنحبها، سواء مجموعة دينية أو اجتماعية أو مجموعة دعم، وطبعا ما نسيبش فرصة إلا ونكون فيها صداقات ومعارف جديدة، وفي المقابل هتحتاجي تقللي من تواصلك مع الأشخاص السلبيين اللي بيحسسوكي إن العالم بينهار.
-
عيدي نظر في الطريقة اللي بتشتغلي بيها
لو حالة الاحتراق اللي انتي واصلة ليها حاصلة بسبب شغلك، فأول خطوة لازم تاخديها إنك تقرري فعلا عاوزة تكملي ولا لأ، لو شغلك ممل وغلس فكري انتي ازاي بتساعدي الناس من خلاله وإزاي بتقومي بدور مهم ده هايقلل كتير من غضبك، لكن لو حاسة إنك حرفيا مش بتنفعي حد، واستمرار بيأذيكي نفسيا وبدنيا من شدة الضغط، ففي الحالة دي هيكون مفيد إنك تحاولي تلاقي شغل تاني غيره، صحيح حاجة عظيمة إن يكون عندنا شغل بيدينا مرتب ندفع منه الفواتير لكن حالتك الذهنية والنفسية أهم لأن النتايج في حالة استمرار الوضع على ما هو عليه هتكون كارثية.
-
رتبي أولوياتك
الإرهاق علامة ماينفعش تتجاهليها، خدي وقتك في التفكير في نفسك وادي روحك وقت للراحة والتفكير والشفاء، حطي حدود، وماترهقيش نفسك، خدي استراحة يومية من الموبايل والكومبيوتر، جربي حاجات جديدة، خلي عندك وقت للاسترخاء والتأمل، نامي كويس جدا، اقري حاجة جديدة، وارتاحي على قد ما تقدري، وطبعا اتنفسي ببطئ وقاومي التوتر بكل الطرق الممكن زي اليوجا والتأمل وتدريبات الاسترخاء.
-
اتمرني
صحيح وقتك ضيق وحياتك صعبة خلقة، وجسمك مرهق وعلى آخرك، لكن اللي ماتتخيليهوش إن ممارسة الرياضة ترياق قمي للتوتر والإرهاق، وبتساهم بشكل كبير في تحسين المزاج، يعني لو مشيتي 10 دقايق بس مزاجك هايتحسن لمدة ساعتين قدام.
التمارين الإيقاعية، التدريب بأوزان، كورسات الدفاع عن النفس، الرقص، المشي، الجري، كل دي حاجات بتخفف التوتر وبتخليكي تركزي أكتر على جسمك ومشاعرك وبتحرر غضبك وتخليكي تتصرفي بشكل أهدى.
-
عيشي حياتك بطريقة صحية
كل حاجة بتدخل بقك بتأثر على مزاجك وحالتك العامة، يعني هتقللي سكر وكربوهيدرات مكررة هاتتلاشي التدهور العنيف في حالتك المزاجية، هاتقللي كافيين وتدخين،توترك هيقل، هاتزودي اوميجا 3 وأكل صحي جسمك هيكون في حالة أفضل وبالتالي هاتقدري تتعاملي بشكل أحسن مع الضغوط وبمجهود أقل.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصدر: Help guide
التعليق باستخدام حساب فيس بوك