محتويات المقال
بداية الأكل للبيبي بتكون مرحلة جديدة وتجربة غريبة عليه لإنه كان بيبقى متعود على الرضاعة الطبيعية أو الببرونة وفجأة بنقدمله حاجة جديدة عليه وممكن يكون مستغرب في الأول مرحلة الأكل بالمعلقة.. بس قبل ما تدخلي المرحلة دي طبعًا هتستشيري دكتور الأطفال عن المرحلة العمرية المناسبة لطفلك عشان تدخليله الأكل اللي دايمًا بتكون وفقًا لتوصيات منظمة الصحة العالمية بعد الشهر السادس وكمان دكتور الأطفال هيعرفك إزاي تدخليله الأكل على مراحل وكمان هيقولك على أفضل أنواع الأكل الصحي المناسب لطفلك وخصوصًا لو عنده حساسية معينة.. بعد ما تطمني إن إبنك معندوش حساسية من نوع أكل معين ممكن تقدميله كذا نوع مع بعض زي الفراخ مع الخضروات والفواكه مع الشوفان وفي المقال ده هنعرفك على وصفات أكل للبيبي فوق الـ6 شهور.
قبل ما نعرفك على وصفات الأكل بنفكرك تاني إنه لازم تتأكدي إن طفلك معندوش حساسية من نوع أكل معين وفيه بعض الموانع اللي مينفعش تقدميها للبيبي قبل السنة ومنها:
- الملح
- السكر
- العسل
- اللبن
بيوريه الجزر والبطاطس مع الفراخ
مصدر الصورة: Parents.com
الطريقة:
- هتسلقي الجزر والبطاطس في شوية ميه قليلة أو يفضل إنك تسلقيهم على البخار.
- هتسلقي الفراخ بالطريقة العادية بس تراعي إنك متحطيش ملح أو فلفل وتقطعيها قطع صغيرة وبعدين تضربي المكونات في الهاند بليندر أو الخلاط.
بيوريه الأفوكادو مع الموز
مصدر الصورة: Pinterest
الطريقة:
هتهرسي الموز مع الأفوكادو كويس وتقدميه لطفلك بس تخلي بالك إن المزيج ده ممكن يسود بسرعة فيفضل إنك تقدميه لطفلك بعد ما تهرسيه على طول.
بيوريه الشوفان مع البلح والموز
مصدر الصورة: Pinterest
الطريقة
هتسلقي الشوفان مع البلح في شوية ميه صغيرين وبعدين تضربيهم كويس أوي في الهاندبليندر وتتأكدي إن مفيش قطع صغيرة وتهرسي معاهم موزة ورشة قرفة وتقدميه لطفلك.
سمك فيليه مع رز بالبصل
مصدر الصورة: simplemommie
الطريقة
- هتجيبي سمك فيليه وتحطيه في صنية وتتبليه بشوية كمون وليمون ورشة صغيرة من التوم الباودر ورشة زيت زيتون وتسويه في صنية في الفرن.
- هتجيبي حلة وتحطي فيها شوية زبدة صغيرة وتحمري البصلة شوية وبعدين تحطي الرز المغسول وتحطي الميه عليه وتسويه بطريقتك العادية.
ملحوظة مهمة: الأكلة دي مناسبة للعمر الأكبر من 10 ل 12 شهر لو حابة تعودي إبنك على المضغ وراعي إنك تهرسي الرز والسمك كويس لو إبنك مش بيمضغ كويس.
بيوريه الجزر والقرع والذرة
مصدر الصورة: Pinterest
الطريقة:
هتسلقي المكونات مع بعض أو تسويها على البخار وتهرسيهم مع بعض كويس أوي.
التعليق باستخدام حساب فيس بوك