محتويات المقال
أفلام كتير قدرت إنها تلهمنا وتأثر فينا وتحكي قصص أشخاص حقيقية بنقابلهم كل يوم، ومن ضمن الأفلام دي هي الأفلام اللي بتحكي عن حياة أصحاب الهمم (ذوي الاحتياجات الخاصة) ومعاناتهم اليومية وبتعرفنا على شجاعتهم وعزيمتهم في التغلب على صعوبات الحياة..
في المقال ده هنعرفك على أفلام بتحكي عن قصص أصحاب الهمم اللي بتعرفنا على بساطتهم وطيبة قلبهم وعزيمتهم القوية اللي بتدي كل طفل منهم وكل أم من أمهاتهم أمل في بكرة..
Forrest Gump
الفيلم بيحكي عن قصة فوريست جامب اللي بيقوم بدوره الفنان العالمي توم هانكس، فوريست بيعاني من تأخر ذهني وإعاقة جسدية بتخليه يحط دعامه في رجليه، والدته بتصر إنها تدمجه في مدرسة عادية ودايمًا بتقف جمبه وبتشجعه، بيتميز فوريست في مجالات الرياضة زي الجري والبينج بونج اللي بتأهله إنه ينجح في عالم الرياضة، فوريست كمان بينضم للجيش وبيحقق نجاح في عالم الأعمال.
Wonder
الفيلم بيحكي قصة الطفل أوجست المصاب بمتلازمة نادرة بتسببله تشوهات في وجهه وبيعمل 27 عملية جراحية عشان يقدر يعيش حياته بصورة طبيعية، أهله بيقرروا انهم يدخلوه مدرسة عادية عشان يقدر يتعامل مع الأطفال التانيين وبنلاقي المضايقات اللي بيتعرض ليها أوجست منهم ودعم أهله وأخته ليه عشان يقدر يتغلب على الصعوبات وفي النهاية بنلاقي إن أوجست قدر إنه يكون صداقات ويخلي كل الناس اللي حواليه تعرف إنه شخص جميل الروح.
Rainman
الفيلم مقتبس عن قصة حقيقية وحصل على 4 جوايز أوسكار.. الفيلم بيحكي قصة رايموند المصاب بالتوحد وبالرغم من مرضه إلا أنه عبقري في العمليات الحسابية المعقدة وعنده ذاكرة قوية، رايموند عنده أخ شاب أصغر منه اسمه تشارلي بيتعرفوا على بعض لأول مرة لما والدهم بيتوفى وبيكتشف تشارلي إن ليه شريك في الميراث، تشارلي كان بيحاول يستحوذ على نصيبه في الميراث لكن لما يتقرب من راي وتتطور الأحداث هيراعيه ويفضل يسانده.
My name Is Khan
الفيلم من بطولة الممثل العالمي شاروخان وبيحكي قصة رضوان خان اللي بيعاني من متلازمة أسبرجر وهي نوع من أنواع اضطرابات طيف التوحد اللي بتخليه يواجه صعوبة في التفاعل مع المجتمع لكن بالرغم من كده فهو ذكي ووالدته بتدعمه وبتساعده في تنمية مهاراته، بتطور أحداث الفيلم وبنتعرف على معاناة خان الشاب المسلم بعد أحداث 11 سبتمبر في أمريكا وسعيه لتغيير العنف والعنصرية ضد المسلمين وبالفعل هيقدر خان إنه يوصل صوته للعالم كله.
I am Sam
الفيلم من بطولة الممثل العالمي شون بين بيحكي قصة الأب سام اللي بيعاني من إعاقة ذهنية بتخلي تصرفاته وتفكيره زي طفل عمره 7 سنوات، سام بيتعرض لمصاعب كتيرة في المجتمع خصوصًا مع تربية بنته الصغيرة لوحده.. أحداث الفيلم بتطور والدولة بتصدر قرار بسحب بنته منه بحجة فشله في التعامل معاها وتأثيره السيىء عليها وهنتعرف على صراع سام ولجوئه للقضاء عشان يقدر يثبت أحقيته في تربية بنته.
التعليق باستخدام حساب فيس بوك