دايما لما بنتكلم عن اضطراب فرط الحركة ونقص الانتباه عند الأطفال ADHD بيكون الكلام عن المشاكل اللي بيسببها وعن حالة التشتت وعدم التركيز اللي الأطفال بيعانوا منها واللي بتأثر بالسلب على تحصيلهم الدراسي وحياتهم الاجتماعية.
في المقال ده، جيبنا لك 5 حقايق مش كتير يعرفوها عن اضطراب فرط الحركة ونقص الانتباه تساعدك تشوفي طفلك بطريقة إيجابية أكتر واللي أكيد هتفرق في طريقة تعاملك معاه.
أول حقيقة
في الدراسات اللي اتعملت على الطلبة اللي عندهم الاضطراب ده، لقوا إنهم بيكونوا مبدعين أكتر، لأنهم ببساطة بيكرهوا الروتين العادي ودايمًا بيدوروا على حاجة جديدة عشان كده بيكون تفكيرهم برة الصندوق.
الفكرة إن الطلبة المصابين باضطراب فرط الحركة وتشتت الانتباه درجاتهم الدراسية أقل من غيرهم هي إن معظم المدارس ونظام التعليم عامةً مش بيقدروا يحتووا اختلافهم لأنهم بيكونوا محتاجين نظام تعليم مختلف وفي مصر للأسف مفيش الكلام ده في أغلب المدارس.
تاني حقيقة
الدراسات وضحت إن الأطفال دول لما بيكبروا ويشتغلوا في حاجة بيحبوها بينجحوا جدًا ويببدعوا وبيثبتوا نفسهم بسهولة خصوصًا في المجالات اللي مفيهاش روتين عمل ثابت عشان كده بنشجعك تركزي أكتر على مهاراتهم ونقط قوتهم وإبداعهم وتحاولي تطوريهم من دلوقتي وتشجعيهم أنهم يكتشفوا نفسهم.
تالت حقيقة
مفيش أي دليل ملموس إن السكر والمواد المضافة للأغذية الصناعية ليها أي دور في اضطراب نقص الانتباه وفرط الحركة. ومفيش له سبب واحد، لحد دلوقتي هو اضطراب وراثي إلى حد كبير والأطفال اللي بيعانوا من اضطراب فرط الحركة ونقص الانتباه فيه احتمالية بنسبة 40 ٪ إلى 60 ٪ أن واحد من الأبوين يكون بيعاني من اضطراب فرط الحركة ونقص الانتباه. أوقات بيكون تشخيص الطفل هو أول دليل على إصابة الأب او الأم باضطراب فرط الحركة ونقص الانتباه.
رابع حقيقة
مفيش حاجة نقدر نمنع بيها إصابة الطفل باضطراب فرط الحركة ونقص الانتباه، لكن اكتشافه بدري والحصول على خطة علاج وتعليم مناسبة هيساعد الطفل كتير على معالجة الأعراض من غير ما نضغط عليه ونتهمه بالتقصير أو سوء السلوك. الاضطراب ده اضطراب قايم على المخ، الأطفال مايقدروش يتغلبوا على الأعراض “بمحاولة التركيز بقوة أكبر” أو “إنهم يعملوا مجهود عشان يبطلوا حركة”. الدراسات الحديثة بينت في تصوير المخ إن الأطفال المصابين بفرط الحركة ونقص الانتباه تكوين مخهم مختلف عن الأطفال اللي مش بتعاني من الاضطراب ده.
خامس حقيقة
مفيش اختبار معين لاكتشاف المرض ولا فحوصات دم أو فحوصات على المخ تقدر تحدد معرفة إذا كان الطفل مصاب باضطراب فرط الحركة ونقص الانتباه أو لا. التشخيص بيكون عن طريق أخذ تاريخ الطفل المرضي مع المعلومات من البيت والمدرسة ومراقبة الطفل في عيادة.
