محتويات المقال
مشغولة جدا، وعندك مليون حاجة لازم تتعمل دلوقتي، لكن كمان محتاجة هدوء وتركيز، في نفس الوقت اللي الولاد عاملين فيه دوشة كبيرة وقالبين البيت تنطيط؟ إذا ده وقت “الكارتون”، الحل السحري وتقريبا الوحيد اللي ممكن يخليهم قاعدين ثابتين في مكانهم لمدة طويلة، ماتبقيش قلقانة إنهم بيلعبوا في الكهرباء أو بيحاولوا يولعوا البوتجاز، حاجة كدا شبه زرار MUTE، ولأنه حل مريح جدا وآمن ظاهريا، وقدام كل المشاغل والمهام المرهقة اللي ورانا، أحيانا بنسيبهم لفترات ممكن توصل لـ 12 ساعة قدام التلفزيون أو التاب.
على المستوى الشخصي أعرف بعض الأصدقاء بيسيبوا أولادهم من لحظة الاستيقاظ لحد النوم قدام الموبايل، على يوتيوب، ينقضي اليوم بالكامل والاولاد حاطين عينهم في التاب أو مدققين في التلفزيون، ونفس الأصدقاء بيشتكوا من مشاكل في عملية التعلم وأزمات سلوكية ومتاعب جسدية عند نفس الأولاد!
الحقيقة إن في تغيرات سلوكية كتير جدا بتحصل للأولاد خلال الوقت الكبير اللي بيقضوه قدام الكارتون، لكن إيه هي تحديدا؟ ده اللي هنعرفه في المقال ده واللي هيتكلم عن 5 آثار بتحصل عند الأطفال بعد مشاهدة الكارتون لفترات طويلة.
العنف الشديد
في دراسة بعنوان “آثار برامج الرسوم المتحركة على التغيرات السلوكية والعادة والتواصلية لدى الأطفال” منشورة في المجلة الدولية لطب المجتمع والصحة العامة، حاول الباحثين إنهم يشوفوا أثر الكارتون على الأطفال ولاقوا نتايج مثيرة للاهتمام أهمها إن 33% من الأطفال المبحوثين ظهر عندهم زيادة في السلوك العنيف، دا بشكل عام، أما لو حاول الأب أو الأم إنهم يطفوا الكارتون بعد انتهاء وقت الشاشة، 45% من الأطفال بيرموا الحاجات ويصرخوا بعنف معترضين، ومش عاوزين الكارتون ينطفي.
مش هيسمعك
الطفل اللي بيتفرج على الكارتون كتير بيكون في عالم تاني، أي حاجة هتقوليها وهو بيتفرج على الكارتون مش هيسمعها أصلا، بحسب الدراسة السابقة 64% من الأطفال بيهملوا الأشياء اللي بيرويها الآباء أثناء مشاهدة برامج الرسوم المتحركة.
التقليد الأعمى
الطفل في سنوات عمره الأولى بيميل للتقليد، ولما بيقضي أوقات طويلة قدام التلفزيون فدا بيخليه يقلد اللي شايفه ودا اللي أثبتته الدراسة، 61% من الأطفال بيحاولوا نسخ الأعمال المثيرة من وقت بدء مشاهدة برامج الكارتون، على المستوى الشخصي أعرف طفل بيحاول يرمي إخواته بالسكاكين تقليدا لكارتون شافه، وكان هايؤذي إخواته أكتر من مرة، ومازالت مامته عاجزة عن تبطيل الكارتون بسبب سلوكه العنيف جدا لما بتمنعه.
الزن هايكتر
الطفل اللي بيتفرج على قنوات الكارتون هايزغلل عينه كمية الإعلانات اللي بتيجي ناهيكي عن الأزياء اللي بيلبسها الأبطال ويبدأ الزن “ماما أنا عاوز زي فلان”، الكلام دا تم إثباته علمية في دراسة باكستانية اتعملت سنة 2013 عن تأثير مشاهد قناة كارتون نتوورك تحديدا على الأطفال والنتيجة مكانتش بس تقليد الشخصيات لكن كمان إجبار الأمهات على شراء الأزياء والملحقات اللي ظهرت في برامج الرسوم المتحركة المختلفة على القناة.
الصحة في الباي باي
في ورقة بحثية اتعملت في بنجلادش بعنوان أثر برامج الكارتون على الصحة الجسدية والذكاء والسلوك والأنشطة عند الأطفال، اكتشف الباحثين إن صحيح الكارتون ليه بعض الفوايد زي إنه بيساعد على تعلم حاجات كتير عند الأطفال، وبيطور اللغة والسلوك وأحيانا التعليم لكن في المقابل له آثار مدمرة للطفل، بنتكلم هنا عن إصابات من الناحية الجسدية زي المشاكل في السمع والبصر، بالإضافة لأضرار تانية زي إنه بيعلمهم الكذب –أغنية جوني جوني مثال- وبيتسبب في عدم الانتباه أثناء التعلم والدراسة في الظروف العادية.
قوليلنا في التعليقات.. هل ابنك بيشوف كارتون لفترات طويلة؟
المصادر
2 تعليقان
للأسف بناتي ٣ و ٦ سنين بيتفرجوا على الكرتون كتير وبيلعبوا games على التاب والموبيل لفترات طويلة وده بسبب نزولي للشغل وهما بيبقوا قاعدين في البيت مع باباهم اللي بيشنغل من البيت وطبعا مش فاضى يشغلهم بأي حاجة تانية. الموضوع ده موترني جدا وبأدعي ربنا يحفظهم ويعدي الفترة دي على خير.
نعم اولادي الثلاث 8-5-3 بيتفرجوا على الكرتون وخاصة الكبير حتى انو لم يعد ينتبه