أطفال كتير دلوقتي بيعانوا من مشكلة عدم تمكنهم من الكلام بالعربي، وفي أهالي حاسين بالمشكلة دي وفي أهالي مش شايفين إنها مشكلة أصلًا، وفي أهالي حاسين إن كده أحسن، طيب يا ترى هي ليه مشكلة إن طفلي يتكلم لغة أجنبية وما يتكلمش عربي؟ وازاي أخليه يتكلم عربي كويس؟ ده اللي هنقولك عليه في المقال ده:
-
إيه المشكلة في الكلام بلغة أجنبية بس؟
المشكلة إنه هيفقد التواصل مع مجتمعه ومع ثقافته، حتى لو أصحابه في المدرسة كلهم زيه أو أغلبهم، إلا إنه هيفقد التواصل مع قرايبه وخصوصًا الكبار في السن منهم، ومع أي حد بيتكلم عربي، ومع أي مصدر ثقافي باللغة العربية، سواء أفلام أو كتب، ومن أهم المشاكل على الإطلاق إنه هيفقد التواصل مع القرآن الكريم وبالتالي هيأثر على الصلاة وعلى الدين ككل، حتى لو قرأه مترجم فيما بعد، لكن اللغة العربية نعمة كبيرة في فهم القرآن بيغبطنا عليها الأجانب المسلمين، ومعروف إن اللي لغته الأم ضعيفة برضه مش هيقدر يتميز في بقية اللغات، لإنها مش لغة للنطق بس هي بتكون لغة تفكير كمان.
أهم صعوبات التعلم اللي ممكن تعيق ابنك
ازاي أخلي أطفالي يتكلموا عربي كويس؟
-
اتكلمي عربي
لإنك انتي مصدر التلقي الأول للطفل، فهيسمع ويفهم منك، وهيقلدك طبعًا وهيتكلم زي اللغة اللي بتتكلميها، وحتى طرقة نطقك فيها، حتى لو انتي في العادي بتتكلمي لغة أجنبية، فلازم مع طفلك تتكلمي عربي صافي، بدون ما تدخلي فيه كلمات أجنبية.
-
علميه ثقافة عربية
يعني أفلام الكارتون، وأغاني الأطفال، والكتب والقصص كلها تكون بالعربي، ومهم جدُا تختاري له حاجات لطيفة علشان ما يزهقش منها، ولما يشوف حاجة أجنبية يس أنها أحلى بكتير من العربي.
ولو هتدخليه حضانة قبل سن سنتين، ياريت تكون حضانة عربي، ولو ملقيتيش حاجة مناسبة، يبقى على الأقل حضانة بتدرس عربي بشكل قوي.
مفاتيح تربية طفل مبدع في الرسم على طريقة د.ّ إنجي طلعت
-
القرآن الكريم كنز اللغة العربية
القرآن الكريم أصلًا معجزة لغوية من عند ربنا، فلما الأطفال يتعرضوا له كتير من الصغر، هيفرق معاهم جدًا في اللغة، ومش معنى كده إنك لازم تحفظيه القرآن، لكن خليه يتعرض له وقت طويل، زي إنك تشغلي جنبه سورة البقرة بصوت منخفض وهو نايم، وتشغلي أذكار الصباح والمساء لإن فيها آيات قرآنية كتير، وأدعية بالفصحى، علمية أدعية الأكل والنوم واللبس والركوب، شوية شوية هتلاقي حاجات كتير في نطقه اكتسبها من كل ده.
-
ردي عليه بالعربي
لو طفلك بيستسهل اللغة الأجنبية في الكلام وبيكلمك بيها، ردي عليه بالعربي ومع الوقت اطلبي منه يكلمك بالعربي بالتدريج، يعني يقول الجملة باللغة الأجنبية ويحاول يترجمهالك بالعربي، والخطوة اللي بعدها لما تتأكدي إنه متمكن من اللغة بس مش عارف يتواصل بيها، فكّريه كل ما يتكلم معاكي إنه يتكلم عربي بدل اللغة الأجنبية.
أهم المعلومات عن عسر القراءة عند الأطفال: الديسلكسيا
-
اللغة الأجنبية مش علامة رقيّ
الطفل بيشوفنا وبيلاحظ في عنينا علامات الابتهاج لما بيتكلم لغة أجنبية، وبيسمعنا واحنا بنتفاخر بده، فمش منطقي إنه يلمح منك المشاعر دي، وترجعي تقوليله اتكلم عربي، لإنه دخل له قيمة إن اللغة ألجنبية أرقى أو بتخليكي مبسوطة منه أكتر، أو هتخليه مميز بين الناس، لازم انتي اللي تعرفي الأول إن اللغة الأجنبية علم بنتعلمه زي بقية العلوم اللي ندرسها وبنتقنها على مدار حياتنا، لكنها أبدًا مش علامة تميز ورقيّ.
الكتاب التفاعلي للبيبي .. وأماكن شرائه
التعليق باستخدام حساب فيس بوك