من الأسئلة المطروحة في فترة الحمل الأسئلة المتعلقة بالرضاعة الطبيعية ويا ترى هترضعي طبيعي ولا هتستخدمي شفاط الثدي وتحفظي اللبن في ببرونة عشان البيبي ولا هترضعي صناعي. ومع إن حل الرضاعة الطبيعية بيكون عادةّ الاختيار الأول، إلا إن فيه حاجات بنسمعها بتخوفنا من اختيار الرضاعة الطبيعية. في المقال دا، هنكلمك عن أشهر 5 خرافات عن الرضاعة الطبيعية ممكن تسمعيهم وحقيقة كل واحدة فيهم.
الرضاعة الطبيعية مش هتخليني أحمل:
والحقيقة هي إن الرضاعة ممكن تغير الهرمونات وممكن تأخر الدورة الشهرية، لأن الهرمونات اللي بتساعد على إدرار اللبن بتمنع التبويض لمدة ممكن توصل 14 شهر. معنى كدا إن الدورة ممكن تتقطع شهور إنما مش معناه إن الأم مش ممكن تحمل تاني. الرضاعة مش من وسائل منع الحمل. لو عايزة تطمني إنك ما تحمليش، لازم تروحي لدكتور النسا ويوصف لك أفضل وسيلة منع حمل.
لو الصدر حجمه صغير، البيبي مش هيشبع:
الحقيقة إن حجم الصدر مالهوش علاقة بكمية الحليب اللي بتتفرز. أثناء فترة الحمل، الغدد والقنوات اللبنية المسؤولة عن إفراز اللبن بتكبر بغض النظر عن النسيج الدهني وحجمه. ما تقلقيش من حجم الصدر لأنه ما لهوش تأثير.
۸ أعراض لسرطان الثدي روحي للطبيب فورًا لو ظهرت
لازم تغسلي صدرك قبل الرضاعة:
الحقيقة إن البيبي بيبقى عارف ريحة مامته وهالة الثدي بتفرز ريحة مميزة للطفل. كمان الحلمات بتفرز بكتيريا بتساعد على تقوية جهاز المناعة عن الطفل. حتى كريمات ومراهم تشققات الحلمات مكتوب على بعضها إن مش لازم يتغسل قبل الرضاعة.
لو بتاخدي مضاد اكتئاب، ما ينفعش ترضعي:
الحقيقة إن فيه أدوية ما تنفعش مع الرضاعة وبيبقى مكتوب في النشرة اللي جواها دا. لكن فيه مضادات اكتئاب – اللي بعض الأمهات بتحتاجها لإصابتها باكتئاب ما بعد الولادة – مش ممنوع استخدامها في الرضاعة. اطلبي من الدكتور نوع يكون آمن للرضيع.
شوفي هنا.. دليل أشهر استشاريين الرضاعة الطبيعية في القاهرة
الأم اللي ما بترضعش طبيعي ظالمة:
ساعات بنسمع من الناس تعليقات بتوبخنا وبتتهمنا إننا ظالمين وما نستاهلش نبقى أمهات لأننا لسبب أو لآخر مش قادرين نرضع أولادنا طبيعي. طبعًا الرضاعة الطبيعية كويسة للأم وكويسة للطفل، لكن مش دايمًا بنقدر عليها. في كل الأحوال، انتِ أم وتستاهلي التقدير وتستاهلي احترام اختياراتك. وفيه بدايل صناعية ممكن تستخدميها وتوفر لطفلك اللي هو محتاجه.
مصادر ساعدتنا على كتابة المقال:
صحتك
https://bit.ly/2MDlZMO
صحتك
https://bit.ly/2W6ZfYv
ويب طب
https://bit.ly/2BFqmQY
ويب طب
https://bit.ly/32Sghfu
التعليق باستخدام حساب فيس بوك