محتويات المقال
السوشيال ميديا بقالها كام يوم مفيش هاشتاج ولا بوست عادي إلا وبيتكلم عن مسلسل اسمه “ربع قيراط” (حلقات من مسلسل أكبر اسمه إلا أنا)، بطولة الفنانة ريهام عبد الغفور والفنان مصطفى درويش، المسلسل اتصدر تريند تويتر بعد عرض أول حلقاته وحقق نجاح رهيب. الحقيقة إن الفضول خلاني اتفرج على المسلسل الرهيب اللي كل الناس بتحكي عنه ده، وليه كل الناس متعاطفة قوي كده مع ريهام عبد الغفور ومش طايقين الفنان مصطفى درويش D: .. طيب برضه إيه سبب الضجة دي كلها؟ اقري المقال ده عشان تعرفي.
قضايا المرأة
المسلسل واقعي لدرجة مست حياة ناس كتير، “جه على الجرح” يعني من الآخر لستات بيحصل لهم نفس الأحداث اللي حصلت في المسلسل، المسلسل قدم لنا نماذج كتير لستات منهم الأصيلة المغلوبة على أمرها، اللي عاوزة تعيش عيشة كويسة، اللي شايفة اخواتها عايشين إزاي ونفسها تعيش عيشة أحسن منهم، اللي جوزها اتجوز عليها والخاينة وغيرهم كتير. بس هل المسلسل بيركز بس على البطلة اللي جوزها اتجوز عليها خطيبته القديمة واتبهدلت بعد اللي جوزها عمله فيها؟ مش هننكر فعلًا إن القضية الرئيسية هي قضية المرأة بس فيه دروس حياتية تانية ما ينفعش نعديها واحنا بنتفرج عليها في المسلسل وهي:
لأ يعني لأ
لما منى كانت قاعدة بتتكلم مع جدتها، قالت لها أنا غلطت في إيه يا تيتة؟ جدتها قالت لها حاجة مهمة قوي: “إنه كان كده من الأول” ومنى قالت ساعتها “بحبه” واتغاضت عن عيوبه وسكتت، لما الأم أو الأب بيبقى ليهم نظرة في موضوع أو شخص ويقولوا عليه لأ بنسبة 90% بيبقى نظرتهم للأمور صحيحة، بيبقى عندهم زي حاسة سادسة وعارفين إن الموضوع ده أكيد ما فيهوش خير.. زمان لما كنا صغيرين ونصاحب حد ويقولوا لنا خلوا بالكم منه كنا بنقف ضدهم ونقول لهم لأ دول طيبين، بيمر الوقت وبناخد مقلب عمرنا.. لما أهالينا يقولوا لأ مش بيبقوا عاوزين ينكدوا علينا وخلاص، بيبقوا خايفين علينا كتير، لأ اللي بتتقال نسمعها ونحاول نسمعهم مش نعند وخلاص.
كلهم مصطفى أبو حجر؟
التعميم في أي حاجة عمومًا مش صح، مش كل الستات نكدية ومش كل الرجالة مصطفى أبو حجر وخاينين زي ما ناس كتير فهمت المسلسل غلط، فيه نماذج كتير في المسلسل أصيلة زي فارس خطيب أختها وأخو أحمد اللي واقف معاهم وضد حبيبه القديمة وقال لها أنا باحب خطيبتي، وأخوها سندها وخطيب أختها التانية اللي بيدلها على حقوقها تعمل إيه.
الحياة حلوة بس نفهمها
منى كانت فاكرة إن الحياة حلوة على طول الخط، صعوبات الحياة بالنسبة لها كانت شوية ماديات ورفاهيات مش قادرة تحققها واتصدمت صدمة عمرها لما عرفت إن جوزها خانها واستغربت إنه حصل “فجأة كده”، منى اختارت إنها تبص على جوزها وحياتهم على إنها حلوة طول الوقت وده مش عيب ولا غلط، بس الغلط إن الحياة مش حلوة على طول الخط، فيه عيوب قاتلة في جوزها اختارت إنها تتغاضى عنها وفيه مصايب كتير ممكن تحصل وفيه أسرار كتير قوي ممكن ما نبقاش عارفينها عن أقرب الناس لينا.
ما تهمليش نفسك
فيه لقطة كانت منى بتقول إنها كانت مش بتجيب لنفسها حتى صباع روج عشان ما تحملش جوزها فوق طاقته، منى نموذج هايل للست الأصيلة اللي بتقف جنب جوزها وتساعده في الماديات، بس أهملت في حق نفسها كتير، مش معنى كده إن اهمالها في نفسها ده مبرر لجوزها إنه يخونها أو يروح يطلب الاهتمام من واحدة تانية. ومش معنى كده إن الست برضه ما تقفش مع جوزها، بس الحياة مش كلها بيت وولاد وزوج وماديات، اهتمي بنفسك وصحتك عشان تقدري تواصلي.
مش هتصلحي الكون
كل حاجة مش دورك إنك تعمليها انتي مش مطالبة بيها، انتي مش هتصلحي الكون! منى وقفت جنب جوزها ولما كان بيتزنق كانت بتقف جنبه لحد ما ده بقى الـdefault ولا صان ولا قدر العشرة، مش هينفع تحملي نفسك فوق طاقتها ودور مش دورك طول الوقت، الحياة مشاركة بين اتنين ما ينفعش حد فيهم يحمل دوره على حساب التاني من غير تعاون بين الطرفين.
التعليق باستخدام حساب فيس بوك