محتويات المقال
المشروم أو عيش الغراب زي ما بيتقال عليه في اللغة العربية يعتبر وافد جديد على مطابخنا العربية. غالبًا كنا بنشوف استخدامه بشكل كبير في المطبخ الأوروبي وشرق آسيا. واللي عن طريقهم عرفنا إن له أنواع كتير جدًا. فيه منها الصالح للأكل وفيه منها السام طبعًا اللي بنتجنبه. بس هو كده كده احنا هنا بنجيبه إما معلب أو بيتباع فريش في أطباق صغيرة، فجزئية تجميعه من الطبيعة دي مش واردة قوي. بيتميز المشروم إنه من عيلة الفطريات وإن فوائده الغذائية عالية جدًا سواء من البروتين أو فيتامين د. المشروم يعتبر إنه النبات الوحيد اللي بيتواجد فيه فيتامين د. علشان كده، يعتبر خيار مناسب وأساسي للأشخاص اللي بيتبعوا النظام النباتي كنظام غذائي ليهم. ولأن فوايده كتير بس فيه مننا مش عارف يدخله في وجباته الغذائية ازاي. جبنا لك 5 طرق سهلة ولذيذة هتخليكي تنبسطي جدًا بطعمه وما تتحرميش من فوايده. فتعالي نشوف الطرق دي.
طرق استخدام المشروم في وجباتك
- الخضار السوتيه
- البيض
- السي فوود
- الشيش طاووق
- الليمون والتوم
إضافة لذيذة للخضار السوتيه
بكل بساطة، قطعيه شرايح وشوحيه في معلقة زبدة لحد ما لونه يبقى بني خفيف وشوية ملح وفلفل على أي خضار سوتيه إني عملاه واستمتعي بطعمه اللذيذ.
مع البيض
استخدمي معلقة زبدة وسخنيها. ضيفي شرايح المشروم مع قطع الفلفل الألوان، وضيفي عليهم بيض مخفوق، وقلبيهم مع بعض مع شوية ملح وفلفل وسيبيه يستوي على نار هادية، وتقدري تضيفي شوية جبنة موتزاريلا وتغطيهم لحد ما يستوي وتدخليه الفرن تحت الشواية. هيكون عندك فطار غني بالبروتين ومشبع جدًا.
ضفيه على السيفوود
يمكن مش أول فكرة هتخطر على بالك إنك تستخدمي المشروم مع الأسماك، بس جربي وصفة سهلة جدًا من فليه السمك البلطي مع الليمون والفلفل والزبدة مع شرايح المشروم. وصفة سهلة جدًا وسريعة مش هتاخد منك أكتر من 25 دقيقة.
مع الشيش طاووق
فكرتي قبل كده تسخدميه مع أسياخ الشيش طاووق؟ يعني زي ما بتضيفي الفلفل الألوان والبصل وممكن الطماطم، ضيفي شرايح من المشروم الطازة واشويها مع الفراخ دي. هتلاقي إن طعمها لذيذ جدًا وإضافة حقيقية للطعم والقيمة الغذائية.
مع الليمون والثوم
أسهل وصفة على الإطلاق للمشروم، والحلو فيها مش بس طعمها. إنما كمان إظهارها لطعم المشروم. كل اللي هتحتاجيه شوية زيت زيتون، فصين توم مفرومين، شوية بقدونس طازة، عصير ليمون وتقلبيهم مع المشروم وتشوحيهم وفي 10 دقايق هيكونوا جاهزين للأكل. ضيفي طبعا الملح حسب الرغبة.
دي أسهل طرق لأكل المشروم، بس اللي بننصحك بيه فعلًا هو المشروم الطازة أكتر من المعلب، لإنه مش بس بيكون لسه محافظ على قيمته الغذائية، إنما كمان محافظ على طعمه. لو جبتي منه كمية وعايزة تحافظي عليها، كل اللي عليكي إنك تقطعيه شرايح وتشوّحيه بالزبدة، ولما يبرد حطيه في الأكياس المخصصة للتلاجة في الفريزر، واسحبي منه على قد احتياجك وحطيه مباشرة على النار. يعني ما تستنيش إنه يفك من تجميده وبعد كده تستخدميه.
قولي لنا أنهي طريقة عجبتك، ولو انتي عندك طرق تانية، اكتبيها لنا في الكومنتات تحت.
التعليق باستخدام حساب فيس بوك