من أكتر المواقف المزعجة لكل ست في المطبخ هو انسداد حوض المطبخ. بتكون أزمة حقيقية وبتحسي إن البيت كله اتعطل. والغريب إن فيه تقريبًا اتفاق سري بين أحواض المطابخ في العالم كله إنهم يتسدوا في أكتر وقت محرج وصعب ومفروض يكونوا شغالين فيه عادي. ما تعرفيش إيه سبب روح الاضطهاد دي. عشان كده، جبت لك كذا طريقة تنقذ موقفك، وترحمك من انتظار السباك، وتوفّر عليكي الأرقام الفلكية اللي بيطلبوها. كل الطرق دي جربتها بنفسي، وهاقول لك في الآخر على إجراء باعمله كل فترة مخليني بعيدة عن موقف الحوض المسدود. تعالي الأول اعرفي أفضل وأسهل وأكثر الطرق أمانًا لتسليك حوض المطبخ المسدود.
طرق تسليك حوض المطبخ المسدود
- ملح ومياه مغلية
الطريقة دي هتتطلب منك إنك تعملي نزح أو رفع للمياه الموجودة في الحوض. هتحتاجي لنص كوباية من الملح، وهتحطيها بشكل مباشر على صرف الحوض. وبعد كده، صبي 2 لتر من المياه المغلية. سيبيه على الأقل ساعة، هتلاقي إن وضع الحوض اتحسن وتقدري تغسليه بمياه سخنة، وبشكل اعتيادي، وهيرجع لوضعه الطبيعي.
- خل وصودا الخبز (بيكربونات الصوديوم)1. قومي برضه بإزالة المياه الواقفة في الحوض.
2. كمية من بيكربونات الصوديوم بمقدار كوباية كبيرة وتحطيها في صرف الحوض.
3. هاتي كوباية خل أبيض وصبيها على البيكربونات.
4. هتلاحظي فوران كبير بين الخل والبيكربونات. سيبيه يهدى خالص واقفلي الصرف بسدادة الحوض وسيبيه لمدة ربع ساعة
5. بعد كده، شغلي المياه السخنة في الحوض علشان تتأكدى إن الحوض تم تسليكه تمامًا ورجع لطبيعته.
- صودا الخبز (بيكربونات الصوديوم) والملحأ. هنقوم دايمًا بالإجراء الاعتيادي: لو الحوض مليان مياه، لازم نفضيه.
ب. هاتي خليط من البيكربونات والملح بشكل متساوي
ج. حطيه على صرف الحوض
د. صبي عليه مش أقل من 2 لتر مياه سخنة وسيبيه يتفاعل ويسلك الحوض
طريقة فعالة وصديقة للبيئة، ومفيش فيها أي خطر عليكي وانتي بتستخدميها.
- صودا كاويةالطريقة دي فيها نسبة خطورة. علشان كده، هتحتاجي شوية إجراءات حماية، زي إنك تستخدمي قفزات بلاستيكية أو مطاطية سميكة.1. جهزي لتر إلا ربع من المياه الباردة مع تلات كوبايات من الصودا الكاوية المعروفة باسم هيدروكسيد الصوديوم أو فلاش أو حتى مياه نار
2. قلبيهم بمعلقة خشب قديمة وهتلاقي إنها ابتدت تتفاعل بحكم الحركة
3. صبي مباشرة في الحوض وسيبيهم من 20 دقيقة لـ30 دقيقة واغسلي الحوض بمياه سخنة بعد كده. وهتلاقي الحوض رجع لطبيعته تاني.
- الشماعة
ممكن تستغربي الفكرة، بس لو عندك شماعة ملابس معدنية من النوع السهل التشكل، قومي بفردها بحيث إنها تكون عاملة زي السلك شبه المستقيم وتعملي في آخرها زي خطاف رفيع قادر يدخل في بلاعة الحوض بحيث إن هدفك يكون هو إزالة أي شعر أو أي شيء صلب أو شبه صلب مسبب الانسداد ده، مش إنك تدخليها. هيكون إجراء مزعج شوية ومحتاج صبر لكن بيجيب نتيجة فعالة. بعد كده، اغسلي الحوض بمياه سخنة لتنضيف الحوض.
اعرفي من هنا طريقة تنضيف كل الأجهزة الكهربائية
في الآخر، زي ما وعدتك، هاقول لك أنا بعمل إيه كل فترة في حوض المطبخ والحمام والبانيو علشان أتفادى انسدادهم. كل فترة، باجيب ما يوازي كيلو بيكربونات صوديوم بيتباع عند أي عطار، وإزازتين خل من الخل العادي اللي بنستخدمه في الأكل، وباقوم بتوزيع كمية البيكربونات على الأحواض وباصب عليهم الخل، وباسيبهم يتفاعلوا مع بعضهم طول الليل. ودي طريقة لها ميزة إنها بتمنع ظهور أي رائحة مزعجة سواء في الحمام أو المطبخ. باكون حريصة على إزالة الشعر المتساقط في البانيو. وباستخدم مصفاة الحوض في المطبخ. والإجراءات البسيطة دي لها أثر في تفادي مشكلة الانسداد دي. قولي لنا أي طريقة من دول نفعتك. ولو عندك خبرة غيرهم، شاركينا بها.
التعليق باستخدام حساب فيس بوك