محتويات المقال
الشوكولاتة عشق، مزاج، سِحر. لما تتاكل مع فنجان قهوة الصبح وانتِ بتحاولي تسرقي لحظات لنفسك قبل ولادك ما يصحوا أو لما بتسرقيها بالليل من التلاجة بعد ما يناموا الولاد وتاكليها وانتِ حاسة إنك ملكتي الدنيا في لحظات من الهدوء والسلام النفسي. الشوكولاتة مش بس ممتعة، هي كمان لها فوائد كتير، المهم تختاريها صح. وأصح شوكولاتة تقدري تاكليها هي الشوكولاتة الداكنة أو الدارك والنهارده في يوم الشوكولاتة 28 أكتوبر، اختارنا نكلمك عن فوائد الشوكولاتة الداكنة بالتفصيل.
فوائد الشوكولاتة الدارك
الشوكولاتة الدارك أو الداكنة هي اللي نسبة الكاكاو فيها 70% أو أكتر. الأنواع الكويسة منها بتكون فيها نسبة سكر قليلة ودا تقدري تعرفيه بإنك تقرأي المغلف بتاع الشوكولاتة. هتلاقي دايمًا الكاكاو في بداية المكونات والسكر في نهايتها. ترتيب كتابة المكونات على المغلف دايمًا بيكون من المكوّن اللي نسبة وجوده أعلى للأقل.
كمان كل ما نسبة الكاكاو بتزيد، السكر نسبته بتقل جدًا. عشان كدا الأنواع اللي فيها 90% كاكاو بتكون مش مسكرة ومُرّة ودي صحية جدًا وليها عشاقها.
-
الشوكولاتة الداكنة للسكري وللقلب:
الشوكولاتة الغامقة تعتبر من أفضل مصادر مضادات الأكسدة على كوكب الأرض ودا بيساعد جدًا في الحد من أعراض الشيخوخة وأمراضها زي السكر وأمراض القلب والزهايمر. كلي شوكولاتة وخليكي شباب على طول.
-
فائدة الشوكولاتة بدون سكر:
من فوايد الدارك شوكليت كمان إننا لما بناكلها بانتظام، بتحسن الدورة الدموية بشكل عام وبتقلل ارتفاع ضغط الدم. يعني حتى مرضى الضغط يقدروا ياكلوا شوكولاتة داكنة باعتدال وده هيحسّن جدًا من حالتهم الصحية.
شوفي هنا فوائد الرمان الصحية هتخليكي ما تبطليش تاكليه
-
فوائد الشوكولاتة الدارك للبشرة:
فيه دراسات بتقول إن فيه مواد في بذور الكاكاو بتساعد على وصول الدم بصورة أفضل للبشرة ودا بيحميها من آشعة الشمس وأضرارها. خلّي بالك المرة الجاية لما تسافري المصيف تاخدي معاكي صن بلوك ودارك شوكليت.
-
فوائد الشوكولاتة الداكنة للرجيم:
خلّي بالك إن نسبة الدهون في الشوكولاتة الغامقة بتكون عالية. عشان كده، لازم تاكليها باعتدال عشان تستفيدي بيها من غير ما يزيد وزنك.
-
فائدة الشوكولاتة للحالة المزاجية:
فيه دراسة عملتها University College London واتنشرت في جريدة Depression and Anxiety بتقول إن استهلاك الشوكولاتة بكميات معتدلة وخاصة الشوكولاتة الداكنة بيقلل كتير أعراض الاكتئاب وبتحسّن المزاج بشكل عام.
تعرفي على الفوائد الغذائية للبن الأم
التعليق باستخدام حساب فيس بوك