محتويات المقال
في الشتاء دايما بيجيلنا الإحساس بالتعب والرغبة في النوم أغلب الوقت، بس في الحقيقة إحنا مش بنحتاج ساعات نوم أكتر في شهور الشتاء.
الإحساس بالتعب ده بيكون نتيجة إن ساعات النهار بتقل، وضوء النهار بيقل، قلة أشعة الشمس بتخلي دماغنا يفرز هرمون الميلاتونين أكتر وهو هرمون مسؤول عن النوم والصحيان في الجسم، ميلاتونين أكتر يعني هتحسي إنك محتاجة تنامي أكتر.
النهارده جمعنالك 5 نصائح عشان تنامي نوم عميق ومريح في الشتاء:
ماتدفيش أوضة نومك أوي:
ممكن نصيحة زي دي تبان غريبة خاصة وأغلبنا بيحس إن لازم أدفي الأوضة كويس عشان أنام، لكن في الحقيقة درجة حرارة جسم الإنسان بتحتاج تنزل شوية عشان يبدأ في النوم، لو بتستخدمي الدفايات ما تزوديش درجة الحرارة عن 18 مئوية، ده هيساعدك على نوم أعمق وتوفير فواتير الكهربا كمان.
مارسي الرياضية باستمرار:
لو بتعملي تمارين هتحسي إن صعب جدًا تكملي في الجو البارد، لكن الحقيقة إن التمارين بتحسن جودة نومك، عشان كده حاولي تفضلي نشيطة خلال شهور الشتاء، احضري دورة تدريبية أو روحي الجيم لو كنتي بتفضلي الأماكن المقفولة، ممكن تخرجي تتمشي الصبح أو بعد الغدا، ساعتها هتحسي بتعب أقل ونشاط في وقت الصبح.
وتقدري تمارسي الرياضة في البيت عن طريق برنامج راحة بالي الرياضي: Fit Mama at Home Program
قللي الأكل الدسم:
في الشتاء بتبقى حاجة حلوة بالنسبة لنا إننا ناكل أكل دسم، وكتير خاصة مع جو المطر والبرودة بس زيادة الأكل في الشتاء هتقلل من راحة نومك للأسف، لو في أكل تقيل عايزة تاكليه حاولي تخلي المعاد بعيد عن وقت النوم، عشان جسمك مايكونش مشغول بهضم الوجبة الدسمة اللي جاتله وما تقدريش تنامي كويس.
5 طرق لتقوية المناعة في الشتاء
قللي شوية من النوم الطويل في الأجازة:
النوم في أجازة آخر الأسبوع بتبقى حاجة ما تتعوضش، وبنبقى حاسين إننا في النعيم المقيم وإحنا نايمين، وبيبقى صعب جدًا إن الواحد يسيب السرير، للأسف حاجة زي دي ممكن تخرب كل ترتيب النوم اللي عملتيه قبل كده، لو بوظتي نظام النوم ده هيأثر على جودة نومك بقية الأسبوع، و هيكون صعب بس حاولي تثبتي معاد صحيانك كل الأيام.
قضي وقت مشمس أكتر:
حاولي تاخدي وقت كويس مع الشمس خلال اليوم، ضوء الشمس هيساعدك على النوم بشكل كويس في الليل ووجود شباك في أوضة النوم الشمس بتدخل منه هيأثر بشكل كويس جدًا على صحة نومك.
10 طرق لتقليل الإحساس بالجوع في الشتاء
وبنتمنالك نوم مريح وأحلام سعيدة.
المصادر:
التعليق باستخدام حساب فيس بوك