محتويات المقال
بنات وستات كتير بتهتم بإنها تحط مكياج كل يوم وهي نازلة الشغل أو خارجة. لكن ساعات بتبان مشاكل مكياج في الشتاء وعشان كده في المقال ده هنقول لك نصايح عن طريقة وضع المكياج في الشتاء.
أول نصيحة: التنضيف يكون بنعومة
كفاية الشتا على جلدك، الهوا الجامد الساقع بيوجع وشك ومع الرطوبة وقت المطر ممكن جدًا يعمل مشاكل لبشرتك. عشان كده لازم وانتي بتنضفي بشرتك، تنضفي بنعومة. وبعد ما تغسلي وشك (خصوصًا في آخر اليوم – وانتي بتشيلي المكياج) تستخدمي مياه ورد عشان بيكون ناعم ولطيف على البشرة. حطي قطنة في مياه الورد وامسحيها على وشك ومش لازم تشطفيها من عليها.
تاني نصيحة: الترطيب
إحساس البشرة في الشتا بيكون ناشف، عشان كده لازم تترطب دايمًا. من مرطبات البشرة سيروم الوجه وده بيتحط على الوش وهو مبلول. وطبعًا استخدام كريمات الترطيب مهم جدًا وأساسي في الشتا. ويفضل لو تكوني بتستخدمي كريم نهار وكريم ليل. ويستحسن برضه تكوني بتستخدمي كريم خفيف في النهار وكريم أتقل في فترة الليل. وكمان من أكتر طرق الترطيب الفعالة هي إنك تستخدمي ماسك في فترة الليل.
تالت نصيحة: التلميع
البشرة في الشتا مش بس بتكون ناشفة وخشنة، إنما كمان بتكون باهتة ومش مشرقة قوي. وعشان كده، بننصحك إنك تستعملي كريم أساس بيلمع أو يكون البرايمر اللي في الخدود بيلمع فيشيل البهتان ويديكي إشراق.
رابع نصيحة: سبراي التثبيت
أيوة احتمالية العرق ضعيفة جدًا في الشتا وده مش هيخلي المكياج يبوظ. لكن كمان مفيش مانع من إنك تثبتي المكياج عشان يفضل أطول فترة معاكي. أسهل وأسرع طريقة لده طبعًا هو سبراي التثبيت. رشي بعض رشات على وشك بعض ما تخلصي كل المكياج عشان تفضلي محافظة على اللوك أطول وقت.
خامس نصيحة: ابعدي عن الباودر
أكتر مشاكل المكياج في الشتا بتكون بسبب الباودر وإن شكله على الوش بيكون مجير. وعشان كده بننصحك إنك تستبدلي أي كريم أساس باودر بكريم أساس سايل وإنك ما تستخدميش بودرة في الخدود ويفضل استخدام البرايمر الكريمي والسايل بدلها.
وفي النهاية، نتمنى لك لوك رائع في الشتا وفي كل أوقاتك. قولي لنا في التعليقات إيه اللي انتي بتعمليه عشان تحافظي على مكياجك في الشتا.
التعليق باستخدام حساب فيس بوك