بييجي فصل الصيف ونبدأ معاه ندور على أفضل منتجات التجميل، لإن التغيرات اللي بتحصل للشعر والبشرة والجسم في فصل الصيف بتكون كبيرة، بسبب حرارة الجو، وأشعة الشمس وروتين الأكل في الصيف والمصيف والأجازات، لكن الحقيقة إن أجمل لوك صيفي هو اللوك الطبيعي، أو الأقرب للطبيعي قدر الإمكان، وطبعًا لما بنقول طبيعي مش معناه إنك تفضلي بدون حلول لمشاكل المظهر اللي بتعاني منها، لكن معناه إنك تلاقي حلول فعّالة تساعدك للوصول لـ المظهر الطبيعي اللي بتحلمي بيه، علشان كده هنقولك على 5 طرق لمظهر طبيعي وصحي في فصل الصيف:
5 نصائح هتخلي المظهر الطبيعي أجمل
-
التغذية
الأكل الصحي
علشان خروجاتنا وسفرنا كتير في الصيف، فمش بنكون مركزين قوي في الأكل اللي بناكله، وبناكل وجبات وسناكس مش صحية طبعًا، وكتير فاهمين إن المنتجات أو المواد الطبيعية اللي بنستخدمها خارجيًا هي الحل الوحيد، لكن الحقيقة إن بداية المظهر الطبيعي الصحي هو من داخل الجسم، من التغذية الصحيحة المتوزانة، والأكل الصحي والبعد عن المأكولات غير الصحية وغير المفيدة اللي مليانة سعرات ودهون ومواد مصنعة، عشان كده لازم تراعي إن أكلك يكون فيه خضروات وفواكه وبروتين، وتدخلي فيه الشوفان والحبوب الكاملة.
-
الشعر
المؤثرات السلبية على الشعر في الصيف كتير، زي مياه البحر وحمامات السباحة، غير الشمس القوية والحر اللي بيخلونا نغسل شعرنا بشكل يومي تقريبًا، مع استخدام منتجات الفرد الكيميائية، أو الفرد بالحرارة، ومعروف إن مظهر الشعر بيتحكم في المظهر العام للست بنسبة كبيرة جدًا، وبيدل على اهتمامها بنفسها وصحتها، لإن كل ده بيأثر في مظهر الشعر، وبيبان عليه اللون اللامع من الباهت، وصحته من تلفه، وأكيد بتأثر فيه المنتجات غير المناسبة لطبيعته، والصبغات اللي بترهقه. أفضل الزيوت الهندية لتطويل وتكثيف الشعر .. بالأسعار والأماكن
-
البشرة
البشرة من الحاجات اللي بتتأثر جدًا في الصيف، بسبب الحر والشمس والعرق، وبتتأثر من الضغوط النفسية ومن سوء التغذية، ومن السهر، ومن كل حاجة بمعنى أصح، علشان كده محتاجة تكون العناية بالبشرة روتين يومي ليكي، مش وقت تركزي فيه وبعدين تنسي وتقطعي الروتين، من أول لما بتغسلي وشك الصبح لحد ما تحطي بالليل كريم ليلي قبل ما تنامي، وطبعًا ما تنسيش أهم حاجة في الصيف: الكريم الواقي من أشعة الشمس “الصن بلوك”.
5 خطوات بسيطة لعمل مكياج لوك طبيعي No Makeup Look
-
الأظافر
معروف إن المانكير والأسيتون ومنتجات تجميل الأظافر، بتأثر على مظهرها سلبًا مع الوقت، وفي الصيف سيدات كتير بيحبوا يعملوا ضوافرهم على حسب الترند، ومنتجات تلوين الأظافر والمواد اللاصقة اللي بتتحط عليها بتضعف الضوافر بشكل كبير، علشان كده مهم جدًا تعتني بضوافرك على طول، علشان متلاقيش لونها اتحول للأصفر أو حصل لها تشققات، أو ضعفت وبقت معرضة للكسر.
-
شرب المياه
شرب المياه في الصيف، من أهم المفاتيح السحرية لمظهر طبيعي وصحي، لإنها بتحتوي على معادن وعناصر بتفرق جدًا إيجابيًا في شكل البشرة والشعر والأظافر، ولو إنتي عاملة دايت فكمان شرب المياه مهم جدًا، ومع زيادة إفراز العرق في الصيف، لازم تزودي كمية المياه اللي هتشربيها علشان تعوضي السوائل اللي جسمك فقدها، ونصيحتي ليكي: خلي معاكي دايمًا إزازة مياه مش بتفارقك حتى لو انتي مش عطشانة، ده هيفرق جدًا في مظهرك وصحة جسمك.
التعليق باستخدام حساب فيس بوك