محتويات المقال
الرز واحد من أهم الكاربوهايدرات اللي بنعتمد عليها كمصريين بشكل أساسي في أكلنا اليومي، زي مثلًا: رز وملوخية، رز وبامية، رز وسمك، وطبعًا فيه غيرهم كتير من وجبات اقترن اسمها بالرز وما تنفعش من غيره. ويمكن تكون حلة الرز هي الاختبار الأول لكل عروسة جديدة لسه هتبدأ رحلتها مع المطبخ. ودايما بتحصل حالات من الإحباط والتجارب غير الناجحة في بداية تعاملك مع الرز، وده لإن طهي الرز له أصول وأسرار، وكمان بيحتاج للخبرة يعني كل ما تطبخيه أكتر، هتبقي محترفة وهيكون صعب جدًا إنه يفشل معاكي.
النهارده، هنتكلم معاكي عن جميع أنواع الرز وطرق الطهي المختلفة له، وكمان جايبين لك وصفات جديدة ولذيذة للرز بأنواعه. تعالي نتعرف على ال3 طرق المتعارف عليها لطهي الرز، لإن لكل واحدة منهم تكنيك مختلف:
الرز البيلاف Pilaf (المفلفل)
أكتر طريقة متعارف عليها في مصر لعمل الرز، وهي إنك بتشوحي الرز مع المادة الدهنية، لحد ما الرزاية تسخن كويس، وبعدين تضيفي لها المياه أو المرقة. وبعد ما تغلي، بنهدي النار وبنسيب الرز يستوي على نار هادية تمامًا بدون ما نفتح عليه. النتيجة بتكون رز مفلفل كل حباية متفرقة عن التانية زي الرز المصري بالشعيرية والرز حبة وحبة والرز بالخلطة مثلًا.
الرز المبخر (المسلوق أو المطهي على البخار)
طريقة صحية أكتر لعمل الرز بدون مادة دهنية، يفضل غسيل الرز قبل سلقه أو تسويته على البخار للتخلص من كمية من النشا الموجود فيه عشان حباته ما تعجنش وتلزق في بعض.
الرز بطريقة الريزوتو
طريقة إيطالية لتحضير الرز، عن طريق إضافة المرقة للرز بالتدريج لحد ما تتفتح حبات الرز وتخرج المادة النشوية الموجودة فيها، وبتكون نتيجته رز كريمي جدًا ومختلف تماما عن الرز المفلفل أو البيلاف.
ودلوقتي هنقدم لك 5 طرق لذيذة وجديدة لعمل الرز. جربيها واحكي لنا إيه أكتر طريقة حبيتيها.
طريقة عمل الريزوتو بالمشروم
المصدر hellofresh
المقادير
- 250 جم من المشروم الطازة
- 1 1/2 كوب من رز الأوربوريو (ممكن يستبدل برز مصري مش مغسول)
- 2 معلقة كبيرة زبدة
- زيت زيتون
- 1/4 كوب بصل مفروم ناعم جدًا
- 2 فص توم مفروم ناعم
- 2 عود زعتر طازة
- أوراق الريحان الأخضر
- 1/2 كوب جبنة بارميزان مبشورة
- ملح وفلفل أسود
- 6 أكواب من مرقة الخضار أو الدجاج (ممكن تزيد حسب الحاجة)
الطريقة
- في حلة على النار، اغلي المرقة وسيبيها على نار هادية عشان نسقي بها الرز.
- في حلة تانية، ضيفي الزبدة والزيت وشوحي فيهم شرايح المشروم على نار عالية لحد ما يكتسب لون دهبي، ارفعيه من الحلة في طبق جانبي.
- في نفس الحلة، ضيفي البصل والتوم وأوراق الزعتر والريحان وشوحيهم لحد ما تطلع ريحتهم ويدبل البصل.
- ضيفي رز الأوربوريو وشوحيه مع البصل والتوم، لحد ما تتغلف كل حبات الرز بالزبدة والزيت وتسخن كويس.
- ابدأي ضيفي كبشتين من المرقة، مع التقليب باستمرار عشان تساعدي على استخراج النشا من الرز. وبالتالي الحصول على قوام كريمي للريزوتو.
- خلي الريزوتو بدون تغطية على نار متوسطة وكل ما يتشرب كمية المرقة اللي ضيفتيها زودي مرقة لحد ما الرز يستوي، بس يفضل فيه عضة بسيطة Aldente.
- اطفي النار وضيفي الجبنة البارميزان ومكعب من الزبدة ورشة من الفلفل الأسود المطحون طازة.
- قدميه مع أوراق الريحان الأخضر أو البقدونس المفروم.
طريقة عمل الرز المكسيكي بالذرة الحلوة
المصدر chefdehome
المقادير
- 2 كوب رز مصري مغسول ومتصفي
- 2 كوب و1/2 مرقة خضار (أو ماء)
- 1 معلقة كبيرة صلصة طماطم
- 1/2 كوب درة حلوة معلبة
- 1 بصلة صغيرة مفرومة ناعم
- 2 فص توم مفروم ناعم
- 2 معلقة صغيرة بابريكا
- 1/2 معلقة كمون
- ملح وفلفل أسود
- زيت نباتي
- مكعبات فلفل ألوان أو فلفل حار للتزيين
الطريقة
- في حلة على النار، سخني الزيت النباتي، وشوحي البصل المفروم مع التوم لحد ما تطلع ريحتهم.
- ضيفي البهارات للبصل وحمصيهم على نار هادية. وبعدين ضيفي الرز وشوحي كويس مع البصل والبهارات لحد ما تتغلف كل حبات الرز بالزيت.
- ضيفي الصلصة والمرقة وقلبيهم مع الرز كويس، غطي الحلة وسيبي الرز يغلي.
- بعد ما يغلي الرز ويتشرب معظم المرقة، ضيفي الذرة الحلوة وقلبيها مع الرز وانقليه على نار هادية جدًا لحد ما يستوي تمامًا.
- قدمي الرز ساخن مع أوراق الكزبرة الخضراء ومكعبات الفلفل الألوان أو الحار.
طريقة عمل الرز البسمتي المبهر باللحمة المفرومة
المصدر amiraspantry
المقادير
- 2 كوب رز بسمتي مغسول ومصفى
- 3 أكواب مرقة لحم أو خضار
- زيت نباتي
- 150 جم لحم مفرومة
- 1 بصلة صغيرة مفرومة ناعم
- 2 معلقة صغيرة بهارات لحمه
- 1 معلقة صغيرة قرفة
- 2 ورقة لورا
- 2 عود قرنفل
- ملح وفلفل
- مكسرات محمصة وفواكة مجففة للتقديم
الطريقة
- في حلة على النار، سخني الزيت وضيفي اللحمه المفرومة وشوحيها لحد ما تبدأ تغير لونها.
- ضيفي البصل المفروم وكل التوابل والورق اللورا والقرنفل، وقلبيهم كويس مع اللحمة المفرومة.
- ضيفي الرز البسمتي وشوحيه كويس مع باقي المكونات.
- ضيفي المرقة السخنة وقلبي كل المكونات مع بعض وغطي الحلة لحد الرز ما يغلي.
- لما يبدأ الرز يتشرب المرقة، انقليه على نار هادية جدًا وسيبيه لحد ما يستوي تمامًا.
- قدميه مع المكسرات والفواكه المجففة.
طريقة عمل الرز البسمتي بالشبت والليمون
mypersiankitchen
المقادير
- 2 كوب رز بسمتي مغسول ومتصفي
- 3 أكواب مرقة خضار أو الميه
- 2 معلقة كبيرة زبدة
- زيت نباتي
- 1 معلقة كبيرة بشر الليمون
- 2 معلقة كبيرة عصير ليمون
- 1 كوب شبت مفروم
- ملح وفلفل أبيض
الطريقة
- في حلة على النار، سخني الزيت وضيفي الرز وشوحيه كويس مع الزيت.
- ضيفي المرقة أو المياه والملح والفلفل الأبيض، وغطي الرز لحد ما يغلي ويبدأ يتشرب المرقة.
- انقلي الرز على نار هادية جدًا لحد ما يستوي تمامًا. اطفي النار وضيفي معلقتين الزبدة، عصير وبشر الليمون، والشبت المفروم.
- قلبي كل المكونات مع الرز وقدميه فورًا مع شرايح الليمون، يقدم مع الأسماك والبحريات.
طريقة عمل الرز المقلي بالدجاج والخضار
المصدر africanbites
المقادير
- 1 كوب رز مصري مسلوق أو مطبوخ بطريقة البيلاف (وصفة هايلة لاستغلال بقايا الرز البايت)
- زيت نباتي
- 1 معلقة كبيرة صويا صوص
- 1 معلقة أويستر صوص
- 1 كوب خضار مشكل مجمد
- 2 فص توم مهروس
- 1 معلقة صغيرة جنزبيل طازة مبشور
- 1/4 كوب بصل أخضر
- 1 بيضة
- 1 معلقة صغيرة زيت السمسم
- سمسم محمص
- أوراق الكزبرا الخضرا والبصل الأخضر للتزيين
الطريقة
- في واك أو طاسة واسعة، ضيفي الزيت النباتي وشوحي البصل الأخضر والتوم والجنزبيل، لحد ما تطلع ريحتهم.
- ضيفي الخضار المشكل وشوّحيه مع باقي المكونات.
- ضيفي الرز المستوي وقلبيه كويس مع الخضار، ضيفي الصويا والأويستر صوص.
- قومي بعمل تجويف في نص كمية الرز واخفقي البيضة مع رشة فلفل أسود وضيفيها في التجويف.
- حركي البيضة بمعلقة خشب، ولما تبدأ تتماسك وتستوي، دخليها مع الرز وقلبيها فيه.
- اطفي النار وضيفي معلقة صغيرة من زيت السمسم وقدمي الرز مع أعواد البصل الأخضر، الكزبرة الخضرا والسمسم المحمص.
أطعمة ممنوع تخزينها في الفريزر.. خلي بالك
التعليق باستخدام حساب فيس بوك