من أهم مميزات أطباق المكرونة هي إن أغلبها بتتحضر بسرعة وما بتستهلكش وقت طويل ومجهود كبير في تحضيرها. عشان كده، كل أم وست بيت بتحبها مش في مصر بس، لكن العالم كله بيعشق أطباق المكرونة. على قد ما أطباق المكرونة وتحضيرها سهل وبسيط، لكن جودة المكونات دايمًا بتعمل فرق كبير قوي، وجودة نوع المكرونة اللي بنستخدمه مهم جدًا لنجاح أبسط الأطباق. عشان كده، إيطاليانو بتقدم لكل ست بيت وأم مكرونة مصنوعة من أجود أنواع قمح الديوروم، عمرها ما تعجن معاكي أو تتكسر وانتي بتسلقيها وهتحافظ على قوامها وكمان أشكالها متنوعة جدًا عشان تديكي الفرصة إنك تنوعي وتبدعي في وصفات مالهاش عدد.
ولإن إيطاليانو عارفة قد إيه يوم الأم دايمًا مشغول حتى وهي قاعدة في البيت، بنقدم لك النهاردة مجموعة وصفات سحرية هتحضريها بس في 15 دقيقة: وصفات متنوعة ولذيذة هتقلل عليكي مجهود وإرهاق وقفتك في المطبخ بالساعات وخصوصًا واحنا داخلين على فترة الصيف وارتفاع حرارة الجو وبنحتاج ناكل وجبات خفيفة، لذيذة، وسريعة التحضير.
سباجيتي بزيت الزيتون والتوم Spaghetti Aglio E Olio
مكرونة – المصدر damndelicious
المقادير
- 1 كيس مكرونة سباجيتي إيطاليانو
- مياه لسلق المكرونة
- 1/3 كوب زيت زيتون نوعية ممتازة
- 8 فصوص توم مقطعة شرايح رفيعة
- 1/2 كوب بقدونس مفروم ناعم
- فلفل أحمر حار أو رقائق الفلفل المجففة
- ملح وفلفل أسود
- 1/2 كوب جبنة بارميزان مبشورة
الطريقة
- اسلقي مكرونة سباجيتي إيطاليانو في كمية وفيرة من المياه المضاف ليها الملح حسب التعليمات المكتوبة على الغلاف وحافظي دايمًا على تسوية المكرونة Aldente.
- احتفظي بكوب ونص من مياه سلق المكرونة على جنب.
- في طاسة كبيرة على نار متوسطة، سخني زيت الزيتون وضيفي شرايح التوم وشوحيها لحد ما تاخد لون دهبي فاتح.
- ضيفي الفلفل الحار أو رقائق الفلفل المجففة لو مستخدماها وشوحيها وبعدين ضيفي مياه سلق المكرونة.
- سيبي المزيج يغلي شوية لحد ما يتقل وبعدين ضيفي السباجيتي وقلبيها كويس مع الصوص.
- ضيفي البقدونس والبارميزان والملح والفلفل واطفي النار.
مكرونة بينا أرابياتا Penne Arabiata
مكرونة – المصدر Italiano facebook
المقادير
- 1 كيس مكرونة بينا إيطاليانو
- مياه لسلق المكرونة
- 2 عبوة طماطم مقشرة مع العصير
- 5 فصوص توم مقطعة شرايح رفيعة
- 1 فلفل أحمر حار
- أوراق ريحان طازة مفرومة
- 1/2 كوب جبنة بارميزان
- زيت زيتون
- ملح وفلفل
الطريقة
- اسلقي مكرونة بينا إيطاليانو في كمية وفيرة من المياه المضاف ليها الملح حسب التعليمات المكتوبة على الغلاف وحافظي دايمًا على تسوية المكرونة Aldente.
- احتفظي بكوب من مياه سلق المكرونة على جنب.
- في طاسة كبيرة على نار متوسطة، سخني زيت الزيتون وشوحي التوم والفلفل الحار مع بعض لحد ما تطلع ريحتهم.
- ضيفي الطماطم المعلبة مع العصير واهرسيها بشوكة أو هراسة البطاطس.
- ضيفي الملح والفلفل الأسود ومياه سلق المكرونة وهدي النار وسيبي الصوص يتقل قوامه.
- ضيفي المكرونة المسلوقة وقلبي كويس مع الصوص، ضيفي البارميزان وورق الريحان وظبطي الملح والفلفل وتبقى جاهزة للتقديم.
مكرونة لينجويني بالجمبري وصوص الزبدة والليمون
مكرونة – المصدر simplydelicious
المقادير
- 1 كيس مكرونة لينجويني إيطاليانو
- مياه لسلق المكرونة
- 1/2 ك جمبري متوسط الحجم متقشر
- 1/4 كوب عصير ليمون
- 100 جم زبدة
- 1/4 كوب كريمة حامضة
- 5 فصوص توم مفرومين ناعم
- ملح وفلفل
- 1/4 كوب كابري مخلل
الطريقة
- اسلقي مكرونة لينجويني إيطاليانو في كمية وفيرة من المياه المضاف ليها الملح حسب التعليمات المكتوبة على الغلاف وحافظي دايمًا على تسوية المكرونة Aldente.
- احتفظي بكوب من مياه سلق المكرونة على جنب.
- في طاسة كبيرة على نار متوسطة ضيفي نص كمية الزبدة وشوحي الجمبري مع رشة من الملح والفلفل لحد ما يتغير لونه.
- ارفعي الجمبري من الطاسة وضيفي التوم المفروم وشوحيه لحد ما ريحته تطلع وبعدين ضيفي الكريمة الحامضة ومياه سلق المكرونة وعصير الليمون.
- رجعي الجمبري للصوص وضيفي المكرونة المسلوقة وقلبيها كويس قوي مع الصوص.
- اطفي النار وضيفي باقي الزبدة وسيبيها تسيح بحرارة المكرونة وتتقل قوام الصوص وتخليه كريمي.
- ضيفي البقدونس والكابري وتبقي جاهزة للتقديم.
مكرونة فوسيلي بالمشروم مع صوص الخل البلساميك الكريمي
مكرونة – المصدر: Italiano Facebook
المقادير
- 1 كيس مكرونة فوسيلي إيطاليانو
- 400 جم مشروب مقطع شرايح
- 1 بصلة مفرومة ناعم جدًا
- زعتر طازة
- 1/2 كوب خل بلسمي
- 1 كوب كريمة
- زبدة وزيت زيتون
- ملح وفلفل
- 1/2 كوب بقدونس مفروم
- 1/2 كوب جبنة بارميزان
الطريقة
- اسلقي مكرونة فوسيلي إيطاليانو في كمية وفيرة من المياه المضاف ليها الملح حسب التعليمات المكتوبة على الغلاف وحافظي دايمًا على تسوية المكرونة Aldente.
- احتفظي بكوب من مياه سلق المكرونة على جنب.
- في كمية من زيت الزيتون والزبدة، شوحي المشروم على نار عالية لحد ما ياخد لون ذهبي وارفعيه من على النار وسيبيه على جنب.
- ضيفي البصل المفروم في نفس الطاسة وشوّحيه كويس وضيفي الزعتر ورشة من الملح والفلفل الأسود ومعلقة صغيرة من البقدونس.
- ضيفي الخل البلسمي ومياه سلق المكرونة وسيبي الصوص يتقل ويتكثف.
- ضيفي الكريمة والمشروم اللي حمرتيه وسيبي الصوص يغلي ويتكثف.
- ضيفي المكرونة وقلبيها كويس وبكده تكون جاهزة للتقديم مع الجبنة البارميزان والبقدونس.
سلطة الأورزو أو لسان العصفور
مكرونة – المصدر Italiano facebook
مكرونة – المصدر jocooks
المقادير
- 200 جم لسان عصفور إيطاليانو
- 1 كوب طماطم شيري مقطعة أنصاف
- 1/2 كوب بصل أحمر مفروم ناعم
- كوب ونص فلفل أخضر مقطع مكعبات صغيرة
- 1/2 كوب حمص مسلوق
- 1/4 كوب زيتون حلقات مخلي
- أوراق ريحان مفرومة ناعم
- أوراق نعناع مفرومة ناعم
- جبنة فيتا يوناني للتقديم
للدريسينج
- 1/4 كوب زيت زيتون
- عصير ليمون
- معلقة صغيرة توم مفروم
- ملح وفلفل
- 1/4 كوب خل بلساميك
- 1 معلقة صغيرة عسل
الطريقة
- اسلقي لسان العصفور بنفس طريقة سلق المكرونة وحافظي على تسويته Aldente.
- سيبي لسان العصفور يبرد تمامًا قبل إضافة المكونات عليه.
- اخلطي مكونات الدريسينج كلها مع بعض.
- اخلطي كل الخضراوات مع الأورزو في بولة كبيرة وضيفي الدريسينج قبل التقديم مباشرة وقلبيه كويس مع باقي المكونات.
- زيني بقطع الجبنة وأوراق الريحان.
التعليق باستخدام حساب فيس بوك