من المراحل اللي كتير من الأمهات بتعتبرها الأصعب في حياة أطفالهم الصغيرين وبيشيلوا همها هي مرحلة البوتي تريننج potty training أو تدريب الأطفال على البوتي، كتير بيحاولوا يهربوا منها إما بالتأجيل أو بالاستعجال على الطفل من باب إنهم يخلصوا منها.
وفي النهاية، النتيجة واحدة – والطفل في يوم من الأيام أكيد هيتخلص من الحفاضة، بس فيه بعض الأخطاء اللي أحيانًا الأمهات بيقعوا فيها كلها أو في بعضها واللي بتطوّل معاهم عملية التدريب على دخول الحمام، وممكن تحوّلها لذكرى سيئة وعملية مرهقة للأم وللطفل.
في المقال ده، هنقول لك على أكتر الأخطاء الشائعة في البوتي تريننج عشان تحاولي تتجنبيها:
- حالتك النفسية: أول وأخطر خطأ هو إنك تبقي داخلة المرحلة دا وانتِ مشدودة ومتوترة. وبالتالي، هيكون سهل إنك تتعصبي وتضغطي على الطفل ويتنقل توترك لطفلك وده من الحاجات اللي هتقلل استجابته جدًا. فمن الأفضل إنك ما تبدأيش لطفلك البوتي تريننج وانتِ مرهقة أو متوترة ومتضايقة، وتفكري نفسك دايمًا إنها مرحلة طبيعية في حياة طفلك وهتعدي.
- الاستعجال: أوقات اللي حواليكي ممكن يضغطوا عليكِ بالكلام ويقارنوا طفلك بغيره ويلوموكي إنك كده متاخرة، وإن زمان كانوا بيتخلصوا من الحفاض والبيبي عنده 6 شهور! وغيره من النقد اللي يخليكي تستعجلي وتضغطي على طفلك وهو لسه مش مستعد. مع إن الحقيقة إن مفيش سن مناسب يبدأ فيه التدريب والوقت الصح بيعتمد على طفلك. وفقًا للأكاديمية الأمريكية لطب الأطفال (AAP)، الطفل ما بيقدرش يتحكم في حركة المثانة خلال السنة الأولى من عمره، وبيبدأ غالبًا في إظهار علامات الاستعداد ما بين 18 و24 شهر. لكن بعض الأطفال ما بيكونوش جاهزين لحد 30 شهر أو أكبر.
- العقاب: من أكتر الأخطاء اللي نتايجها دايمًا عكسية، بدل ما تساعد في البوتي تريننج، بتأخر قدرة الطفل علي التحكم في نفسه وبتقلل ثقته في نفسه. فقبل ما تفقدي أعصابك وتلجأي لضرب الطفل أو الصريخ في وشه، افتكري إنك هتضرّيه أكتر بكتير ما هتنفعيه.
- التوقيت الغلط: اختيار التوقيت الغلط له دور في تعطيل البوتي تريننج. زي إنك تختاري توقيت الطفل فيه بيتعرّض لتغيرات كبيرة في حياته وبالتالي نفسيته مش مستقرة، زي وصول بيبي جديد في البيت أو التغيير لبيت جديد أو دخول الحضانة أو تغييرها.
- دخول فصل الشتا: اختيار الوقت الصح من السنة من العوامل المهمة جدًا لنجاح البوتي تريننج زي وقت الصيف ونهاية فصل الشتا. لكن أوقات بنلاقي أمهات تبدأ في آخر الصيف، مع دخول فصل الشتا، وده ممكن يخلي الطفل يحصل له انتكاسة أو تأخر قدرته على السيطرة بسبب البرد.
- عدم التهيئة المناسبة للبيت: بمعنى إنك محتاجة تكوني مأمنة البيت كويس، عشان حالة التوتر من الحوادث اللي بتحصل تكون أقل. وبالتالي، تكوني أهدى مع طفلك وفي ردود أفعالك زي إنك تشيلي كل السجاجيد وكمان تفرشي على السراير والكنب طبقة من المشمع اللي بيمنع وصول المياه.
وأخيرًا بنقول لك إن تعليم الطفل مهارة دخول الحمام، زيها زي أي مهارة طبيعية في تطوره ونموه، هتحتاج صبر ووقت وتشجيع منك.
التعليق باستخدام حساب فيس بوك