أوقات بنكون محتارين في اللي بيدور جوا دماغ ولادنا ومش قادرين نفهم هم بيفكروا إزاي وفي إيه. كل ما طفلك بيكبر وبيتعرض أكتر للعالم الخارجي سواء في المدرسة أو التمارين، كل ما دايرة التأثر بتاعته بتزيد وبيبقى أصعب علينا نفهم التغيرات اللي بتحصل في شخصيته وسببها.
في المقال ده، هنقول لك على شوية أسئلة تساعدك في الإجاية عن السؤال الصعب: “كيف أعرف شخصية طفلي”؟ وهتوريكي جوانب شخصية الطفل.
- قل لي خمس كلمات توصف بيهم نفسك؟
السؤال دا تقدري تفهمي من خلاله طفلك شايف نفسه إزاي وكمان صورته عن نفسه في عيون باقي الناس ومقدار ثقته وتقديره لنفسه.
- إيه أحسن أو أوحش حاجة حصلت في حياتك؟
تقدري تعرفي من السؤال ده أهم الأحداث اللي مؤثرة في نفسية طفلك وإذا كان فيه حدث فارق بطريقة إيجابية معاه أو مؤثر سلبًا على نفسيته، ومنها تقدري تفهمي طريقة استجابته وتقبله للمواقف الحياتية. السؤال دا مفيد كمان بعد كل يوم دراسي إن كل واحد في البيت يشارك باقي أفراد الأسرة بأحسن حاجة وأكتر حاجة ضايقته في اليوم. منها تفهمي اللي بيدور مع أولادك في يومهم ومنها تشجعيهم على فتح حوار معاكي.
- إيه أكتر حاجة عندك تحب تشكر ربنا عليها؟
السؤال ده تقدري تفهمي منه نظرة طفلك للنعم والحاجات اللي بيملكها في الحياة وهل هو مقدّر وحاسس باللي حواليه والامتيازات اللي عنده ولا لأ، وهل هو عنده صفة الرضا ولّا دايمًا حاسس إن ناقصه حاجة، وده يشمل نعمة العيلة والأصحاب والمدرسة وكل حاجة عند الطفل. ومنها تقدري تفتحي حوار مع طفلك تساعديه بيه إنه يتعود يشكر ربنا على الحاجات الجميلة اللي عنده وإنه يبص للجانب الإيجابي اللي في حياته.
- مين أكتر واحد في أصحابك بتحبه وليه؟
السؤال ده يخليكي تقدري تعرفي مين في أصحاب ابنك له التأثير الأكبر في حياته وقريب منه ومنه هتقدري تفهمي أسباب بعض التغيرات في شخصية طفلك وردود أفعاله لأن غالبًا الصديق اللي هيجاوب باسمه هيكون أكتر واحد هو بيحبه ومتعلق بيه ومتأثر بشخصيته سواء بالسلب أو الإيجاب.
- لو بتحب حد أوي، تحب تعمل له إيه عشان يكون مبسوط؟
إجابة الطفل عن السؤال ده غالبًا بتكون تعبير عن أكتر حاجة هو بيحب إنها توصله كتعبير عن الحب فهتساعدك تفهمي لغة الحب بتاعته، اللي يحب إنك تعبري له بيها سواء كانت هدايا أو تقديم خدمات أو كلمات التشجيع أو أحضان وبوس أو تقضية وقت خاص معاه.
- ممكن ترسم لي رسمة أو تحكيلي حدوتة؟
الرسم والكتابة من أكتر الحاجات اللي بتساعد الكبار والأطفال يعبروا عن نفسهم، اطلبي من ابنك يحكي لك حدوتة أو يكتب قصة أو يرسم رسمة من خياله، لأن الرسمة والقصة هتكون تعبير عن اللي بيدور في حياته إذا كان خايف أو حاسس بالأمان أو بيتعرض لأي شكل من أشكال الإساءة وتعبير عن شخصيته ورد فعله تجاه الموقف أو تجاه الشخص المسيء.
قولي لنا انتِ كمان في التعليقات بتعملي إيه عشان تقربي من طفلك أكتر وتقدري تفهمي شخصيته؟
مصادر:
momjunction
Lifehack
