محتويات المقال
الأم العاملة يمكن بتتصنف كواحدة من أكتر المخلوقات المعرضة لضغوط؛ ده طبعًا مش تقليل من الضغوط اللي بتتعرض لها الأم ربة المنزل. بس النهارده، هنتكلم عن الأم العاملة، لإن الضغوط بتاعتها خارجية وداخلية ومستمرة طول اليوم وعلى مدار الأسبوع. علشان كده، قررنا نجيب لك نصائح الخبراء المتخصصين في كيفية ترتيب وإدارة الوقت علشان في الآخر، يكون عندك قدرة على التعامل مع كل عناصر حياتك المختلفة، سواءً في البيت أو الشغل.
قبل ما نبدأ، عايزاكي تعرفي نقطة مهمة وتصدقيها جدًا: ضغطك على نفسك بشكل مبالغ فيه عمره ما هيجيب لك النتيجة اللي انتي عايزاها. انتي أهم عنصر في المعادلة دي، وعلى قد ما احنا مصدقين قد إيه انتي قوية، على قد ما احنا عايزينك تصدقي إنك تستاهلى ترتاحي. فتعالي معايا نعرف أهم النصائح اللي بجد لازم تعلقيها قدامك في كل حتة، سواءً في الشغل، على باب التلاجة، في نوت على الموبايل، وأي حتة تانية علشان تفتكريها وتقدّري مفهوم إنك بشر ولكي طاقة محدودة. مش هتدي أفضل ما عندها غير بترتيب وتنظيم الوقت والمعقولية في التوقع.
نصائح تنظيم الوقت للأم العاملة
- نامي كويس
- ما تعمليش كل حاجة بنفسك.
- اعملي جدول أسبوعي.
- اتعلمي تقولي لأ.
- ابعدي عن الإنترنت والتليفزيون.
- انسي أسطورة المهام المتعددة multi-tasking.
نامي كويس
متخيلين طبعًا رد فعلك الداخلي اللي ممكن يكون فيه شوية حزن لما تشوفي الجملة دي. حلم النوم اللي أصبح بعيد المنال، واللي حتى لما ممكن يتوفر، هتلاقي نفسك بتحرمي نفسك منه بسبب إنك بتفكري في كم الحاجات اللي وراكي ومحتاجة تخلصيها. بس دي النصيحة الأهم والأولى في عالم تنظيم الوقت. مش بس لكي كأم عاملة، إنما لكل البشر.
لازم تحددي لنفسك ساعة معينة هي ساعة النوم. كل حاجة تتقفل حتى لو كنتي لسه ما خلصتيش غسيل الأطباق وتطبيق الغسيل. والساعة المحددة دي مش لكي انتي بس، إنما لكل أفراد البيت: انتي وزوجك والأولاد. مرة في مرة هتلاقي مقاومة طبعًا، بس هي دي أفضل طريقة وبداية للتنظيم. نومك لما هينتظم وتلاقي نفسك بتاخدي من سبع لتمن ساعات في اليوم، إنتاجيتك على مستوى الشغل والبيت وحتى نفسيتك هتفرق 180 درجة. في الأول، ممكن تلاقي نفسك مش بتلحقي تخلصي اللي عليكي علشان بطلتي تسهري، لكن مع الوقت وانتظام نومك، هتلاقي طاقة ووقت وحتى نفسية للإنجاز.
ما تعمليش كل حاجة بنفسك
سعيك المستمر إنك تكوني الأم والموظفة المثالية مش هيؤدي بيكي في أي حتة غير إنك مش هتنجحي في أي حاجة منهم. حاجة كده زي مسرحية المتزوجون، جيت أضبط البنطالون، الجاكتة ضربت. خليني أقولها لك بشكل تاني: مفهوم المثالية عمومًا مفهوم ضاغط على الإنسان. مش مطلوب من أي حد إنه يكون مثالي. ليه بقى تسعي لحاجة مش مطلوبة منك؟ لا وكمان آثارها السلبية هتنعكس عليكي وعلى علاقتك بزوجك وأولادك وتطورهم الشخصي. وكمان على زملائك في الشغل.
هاقول لك إزاي: انتي لا بتشتغلي لوحدك علشان تعملي كل الشغل لوحدك، ولا عايشة لوحدك علشان برضه تعملى كل حاجة لوحدك. يعني مهم لكي في الشغل إنك تشاركي زملائك في تنفيذ المهام المتوزعة عليكم، مش طبيعي حد يقرر إنه يعمل كل حاجة لوحده. وفي البيت، لما توزعي مهام البيت على كل أفراد الأسرة، ده هيزود التواصل ويقوّي العلاقة بينهم، ويخلّي أولادك يتطوروا ويقدروا يعتمدوا على نفسهم. ده غير طبعًا إن لو فيه إمكانية مادية إنك تجيبي حد يساعدك في تنظيف البيت مثلًا بشكل دوري، ما تتأخريش ولا تبخلي به على نفسك. كل فرصة إنك تتلقي المساعدة انعكاسها الإيجابي بيكون على كل حياتك.
اعملي جدول أسبوعي
من أكتر الأمور اللي باعتبرها بشكل شخصي طوق نجاة: الجدول الأسبوعي. ده اللي بيخليكي هادية وعندك قدرة على التحكم في مجريات اليوم. يعني من خلاله، هتقدري تقسمي امتى تشتغلي، امتى تساعدوا بعض في ترتيب البيت وتجهيز الأكل، امتى تخرجوا، امتى تناموا. كل حاجة هتكون مترتبة قدامكم، وده هيحط كل واحد قدام مسؤوليته. يعني مش هتلاقي نفسك لوحدك مطلوب منك كل حاجة، وباقي شركائك في البيت والشغل دورهم غير مفعل، وبالتالي هيخلق عليكي عامل ضغط لازم تتجنبيه.
اتعلمي تقولي لأ
يعني إيه تقولي لأ؟ زي ما قلت لك قبل كده، رغبتك في المثالية وإنك تريحي كل اللي حواليكي بتخليكي تتراجعي عن رفض الطلبات اللي بتتطلب منك علشان بس تتجنبي الشعور بالتقصير. بس الحقيقي وانتي بترفضي إنك ترفضي، بتقصري في حق نفسك اللي زي ما باقول لك هي أهم عنصر في المعادلة. مش مطلوب منك أبدًا إنك توافقي على كل مهمة بتتطلب في الشغل منك طالما إن فيها ضغط مبالغ فيه عليكي. وفي البيت، ما ينفعش يتطلب منك تعملي كل شغل البيت وزيادة، كإنك عايشة لوحدك في البيت، وانتي اللي عاملة كل الفوضى، وبالتالي مطلوب منك التنظيم. قولي لأ لما تكوني تعبانة، لما تكوني محتاجة ترتاحي، لما تكوني حاسة إن اللي قدامك لازم يعتمد على نفسه، وسقف توقعاته المبالغ فيه منك لازم ينزل. قولي لأ علشان تقدري تعملي كل اللي عليكي.
ابعدي عن الإنترنت والتلفزيون
أيوه، انتي محتاجة تسيبي الموبايل من إيدك وتقفلي التلفزيون. مش بس انتي ده كمان باقي أفراد أسرتك. متابعة الأخبار والسوشيال مديا وتقليب القنوات قادر على إنه يضرب يومك في مقتل: كمية وقت غير طبيعية بيتم سرقتها في النشاطين دول بس. وقت غالي جدًا ومهم لو تم استغلاله بشكل صحيح وبشكل جماعي، هتلاقي كم الإنجاز في حياتك ممتاز. حددي وقت محدد ومحدود لهم خلال اليوم لكي ولأفراد أسرتك. حقيقي فيه مليون نشاط ممكن يتعمل بينكم في الوقت ده، حتى لو هتتكلموا مع بعض. هتفرق جدًا في قدرتكم على التواصل وهتتعرفوا على بعض بشكل أفضل وأقوى.
انسي أسطورة تعدد المهام Multi-tasking
في فترة من الفترات، تم إعتبار تعدد المهام (بمعنى تنفيذ كذا مهمة في وقت واحد) كمفهوم ممتاز لتنظيم الوقت. لكن اكتشفوا إن المفهوم ده بيخلي كل المهام دي مفيش حاجة منهم بيتم تنفيذه بشكل كامل ودقيق. علشان كده، تراجعوا عنه، وقرروا إن التركيز في مهمة واحدة هو اللي بتوصل للكمال في النتيجة. ده غير طبعًا الكلام المستمر عن إن عقل المرأة قادر على استيعاب تنفيذ كذا مهمة في نفس الوقت.
حتى لو الكلام ده صحيح، فاحنا هنعتبره غير صحيح لسبب بسيط: تخفيف الضغط على الأعصاب. عمومًا لو لقيتي نفسك تقدري تقومي بمهمة بسيطة خلال مهمة كبيرة، اعملي كده. زي مثلًا إنك تعملي مكالمة تليفونية وانتي بتطبقى الغسيل، بتسمعي كتاب وانتي بتغسلي الأطباق، بتعملي ماسك لبشرتك وانتي بتذاكري للأولاد. لكن مش إنك تعملي مكالمة شغل وانتي بتجهزي الأولاد للنادي.
حاولنا نجيب لك أكتر نصائح ذهبية متفق عليها من الخبراء والمتخصصين. بس النصيحة الأخيرة لأنها الأهم أجلناها لهنا: اهتمي بنفسك وبصحتك على كافة الجوانب. ما تختبريش قدراتك النفسية والجسدية في التحمل، ده تصرف ظالم لكي، خدي فيتاميناتك، راجعي طبيبك بشكل دوري، اهتمي بجسمك ونفسيتك، كلي كويس. وكل فرصة للراحة والهدوء ما تبخليش بيها على نفسك. وما تنسيش انتي أهم عنصر في المعادلة، وأي تأثير سلبي عليكي سلبي على الباقي.
التعليق باستخدام حساب فيس بوك