الحقيقة – من غير ما يزعل محبي الصيف – مكياج الصيف من أصعب الحاجات اللي هتحاولي تحافظي عليها لوقت طويل. ده بسبب إن الحرارة والعرق والرطوبة كلها عوامل ضدك وضد مكياجك. عشان كده النهارده، هنقدم لك شوية نصايح تقدري بيهم تحافظي على شكل مكياج الصيف من غير ما يسيح، نتمنى تعجبك وتنجح معاكي.
1. قبل المكياج، لازم ترطيب
مش معنى إن الجو مش برد إن الجلد مش هيحتاج ترطيب. البشرة دايمًا لازمها ترطيب. لكن بسبب الصيف وحرارته، حاولي يكون الكريم المرطب خفيف جدًا مش تقيل. الكريم المرطب لو تقيل في الصيف، هيخلي المكياج يسيح مع الحرارة. استخدمي كريم أساسه مائي مش زيتي عشان تضمني خفته.
2. بعد الترطيب، ريحي وشك
مش أول ما تحطي الكريم المرطب، تحطي الميك اب. سيبي بشرة وشك تتشرب الكريم تمامًا الأول وإلا هيتحول الكريم المرطب لطبقة زيادة على الوش ومع خفته مش هيحافظ على طبقات المكياج اللي هتيجي فوقه.
3. صيف يعني واقي من الشمس
فيه خبراء تجميل كتير بيقولوا إن حتى في الشتا، الواقي من الشمس أو الصن بلوك ضروري جدًا. لكن بما إننا في الصيف يعني الشمس مش مكسوفة تحرقنا خالص، لازم تستخدمي واقي من الشمس. اعرفي من هنا أنواع وأسعار الواقي من الشمس.
4. بلاش أفورة في كريم الأساس
الدنيا حر وبشرتك مش هتتحمل كريم أساس تقيل. حاولي تستخدمي كريم أساس مائي مش زيتي وحاولي بقدر الإمكان ما يكونش فيه أكتر من طبقة على الوش لأن بالفعل فيه طبقة الصن بلوك. فبلاش كريم أساس تقيل أو كتير. اعرفي من هنا أحسن 10 أنواع كريم أساس سعرها أقل من 500 جنيه.
5. بلاش البلاشر يكون باودر
في الحر، ومع الرطوبة بالذات، البلاشر الباودر هيعمل لنا أحلى كيك على وشنا. لو هتستخدمي بلاشر، استخدمي نوع كريمي مش باودر.
6. بلاش ميك أب كتير
لو مش رايحة مناسبة سواريه، ممكن تكتفي بميك اب خفيف ما فيهوش طبقات كتير. وممكن بس تقفي عند مرحلة الصن بلوك وتركزي بعدها على العيون والشفايف مع كونسيلر concealer خفيف وهايلايتر highlighter.
7. ركّزي على العيون
ابرزي جمال عينيكي بألوان مبهجة وجميلة وشقية. وحاولي – على عكس البلاشر – يكون الآي شادو eye shadow كريمي لإنه هيعزز شكل العين على عكس الباودر اللي مش بنفس القوة.
التعليق باستخدام حساب فيس بوك