محتويات المقال
أجازة الأمومة قربت تنتهي وهترجعي للشغل قريب وحاسة إنك داخلة في دوامة من القلق والأفكار اللي مش بتقف؟ ياترى هقدر أوفق بين الشغل وبين مسؤوليات الأمومة؟ إيه اللي ممكن يتعمل عشان أقدر أوازن بين الشغل والمولود بأقل الخسائر؟
فيه استراتيجيات ذكية ممكن تتبعيها عشان تقدري تعملي التوازن اللي عايزاه، أو تقربي من تحقيقه على الأقل منها:
- اعملي تقويم لأسرتك.
- اختاري حضانة مناسبة.
- اطلبي المساعدة.
- خلي صباحك سهل وخفيف.
- اطلبي الدعم من بيئة العمل.
- روتين النوم للطفل.
- اهتمي بنفسك.
اعملي تقويم لأسرتك:
- في مكان واحد جمعي كل جداول الشغل الخاصة بأفراد أسرتك والمواعيد والالتزامات ومواعيد الخروج والرجوع للبيت، ده هيكون بداية إدارة الفوضى.
- التقويم ده ممكن يكون أي تطبيق على الموبايل يساعدك على تنظيم الوقت، لازم تحطي فيه كل التفاصيل الممكنة، مين هياخد البيبي لو اتأخرت، معاد الحضانة، التزامات الشغل.
اختاري حضانة مناسبة لطفلك:
- من أهم طرق تخفيف الذنب والاحساس انك هتسيبي ابنك وتروحي الشغل انك تلاقي حضانة مناسبة بتقدم رعاية كويسة للأطفال، دوري كويس واتأكدي من تقييمات الناس للمكان، من سجلات التطعيم، النضافة، واعملي زيارة مفاجئة عشان تتأكدي إن مفيش مشكلة.
ماما من غير دراما: أنا دايمًا حاسة بالذنب
- ومهم كمان إنك تفضلي على تواصل مع جليسة الطفل الموجودة في الحضانة، بشكل دائم ومجال واسع من التواصل عشان تتأكدي إنه هيتم الاهتمام بيه بشكل كافي.
اطلبي المساعدة:
- شاركي المسؤوليات مع حد تاني قد ما تقدري، اطلبي من زوجك المساعدة وأكدي عليه فكرة الترتيب المشترك قبل ما ترجعي الشغل، ما تنسيش تحطي خطة ليوم مفاجيء زي المرض مثلا لاقدر الله، مين هيهتم بابنك، الترتيب هيريحك جدا.
خلي صباحك سهل وخفيف:
- اعملي روتين صباحي متسق ليك ولطفلك ولبقية أفراد الأسرة والتزمي بيه، بالطريقة دي هتعرفي تلقائيا هتعملي إيه في اليوم ده، اعملي استعداداتك زي إنك ترتبي وجبة الغدا وسناك، جهزي زجاجات الحليب، شنطة الطفل.
اطلبي الدعم من بيئة العمل:
- احتفظي بعلاقة صريحة وصادقة مع مدرائك في الشغل، واسألي عن سياسة الشغل المتعلقة بالأجازات المرضية، أو لو تقدري تشتغلي من البيت، ولو ممكن جدولك يبقى مرن أكتر.
- اسألي عن الأجازات، أجازة رعاية الطفل، الأجازات بدون مرتب.
حقوق الأم العاملة في قانون العمل المصري
حافظي على روتين نوم لطفلك:
الاحتفاظ بروتين ثابت لنوم البيبي كل يوم هو حاجة هتريحك بشكل كبير خاصة في الليل، هتقدري تنامي كويس.
اهتمي بنفسك:
ممكن يكون الموضوع ده صعب بالنسبة لأم جديدة، بس صحتك وبعدك عن الضغوط النفسية هو الحل لكل حاجة، خصصي وقت للاهتمام بنفسك، وقت للكوافير والباديكير، تمشية في نص اليوم، غدا لطيف آخر الأسبوع.
مع تمنياتنا ليكي بحياة ناجحة وموفقة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك