محتويات المقال
العشاء يا جماعة! الوجبة إلي كتير مختلفين عليها، نتعشى ولا منتعشاش؟ طيب لو أكلنا بالليل واتعشينا هنتخن والأكل مش هيتحرق كويس؟ طيب ولما نجوع قوي بالليل خصوصا في الشتا ويبقى صعب تجاهل الجوع نتصرف إزاي؟
خلينا نتفق إتفاق وهو إن أكلنا لازم يكون صحي وبكميات متوازنة على مدار اليوم، وإن في النهاية فيه سعرات حرارية هتدخل أجسامنا لو زيادة عن الحد هنتخن أكيد سواء اتعشينا أو لأ، فبلاش نظلم الوجبة دي معانا، لإنها مهمة برضه لإن مش منطقي إن الواحد يفضل يجوع نفسه طول الفترة المسائية، خصوصا إن فيه اختيارات لوجبات كتير صحية وخفيفة وقليلة السعرات نقدر ناخدها على العشا.
يفضل دايما تناول وجبة العشاء قبل النوم بـ2-3 ساعات مش بس عشان مانتخنش، لكن عشان الأكل مباشرة قبل النوم له أضرار صحية مع الوقت وكمان بيأثر على النوم وجودته.
النهاردة هنشارك معاكي 5 وجبات عشاء صحية قليلة السعرات وسهلة في تحضيرها عشان لو حسيتي بالجوع تاني تقدري تاكلي وانتي مرتاحه وتتغلبي على جوعك بدون ما تحسي بالذنب.
سلطة على العشاء
مصدر الصورة:foodandwine
السلطات بوجه عام من الأكلات المناسبة جدا للعشاء، مليانة ألياف وهتشبعك وخصوصا لو أضفتي كمان لها البروتين، زي مكعبات الجبنة الفيتا، أو صدر فرخة مشوي أو مسلوق حتى لو كان من بواقي الغداء، أو أي نوع من البقوليات زي الفاصولياء الحمراء أو البيضاء المسلوقة، أو البيض المسلوق، أو حتى شوية من القمح المسلوق كل دة هيزود قيمتها الغذائية ويساعدك على الشبع.
أما بالنسبة للدريسينج خليكي دايما في الدريسينج الصحي المكون من عصير الليمون أو البرتقان مع ضعف الكمية من زيت الزيتون، تقدري كمان تضيفي معلقة صغيرة من المستردة بأنواعها عشان تدي قوام للدريسينج ونكهي بأي توابل أو أعشاب تحبيها. كمان تقدري تعملي دريسينج صحي باستخدام الزبادي اليوناني بيكون برضة كريمي ولذيذ ومشبع.
توست الأفوكادو والجبنة الفيتا
wholeandheavenlyoven
التوست مع الجبنة من الوجبات الكلاسيكية للعشاء، جربي إضافة الأفوكادو للعشاء الكلاسيكي ده واستمتعي بكل فوايده وكمان هيساعدك أكتر على الشبع.
المقادير
- شرايح خبز توست محمص
- 1 ثمرة أفوكادو
- ملح وفلفل
- عصير ليمونة
- زيت زيتون
- طماطم شيري
- جبنة فيتا يوناني
- زيتون حلقات
الطريقة
- قشري الأفوكادو واهرسيه كويس بالشوكة، ضيفي له الملح والفلفل الإسود وزيت الزيتون وعصير الليمون.
- ضيفي طبقة من مهروس الأفوكادو وزينيها بالطماطم الشيري والزيتون وقطع من الجبنة الفيتا، وأخيرا رشة من زيت الزيتون على الوش.
شوربة على العشاء
أحلى عشوة في الشتاء هي طبق الشوربة الدافي، إحساسه وانتي ماسكاه في إيدك والدخان طالع منه في مشهد درامي شتوي كلاسيكي لوحده كفيل يبسطك ويغير مودك. أهم حاجة ابعدي عن شوربات الكريمة تماما واستبعدي الدهون والدسم من شوربتك، كتري من الخضار ثم الخضار ثم الخضار واستمتعي بمذاقه إلي خلقة ربنا. شوربة بروكلي، شوربة جزر مع شوية جنزبيل طازة، شوربة خضار مع رشة كركم، شوربة نودلز مع خضراوات متنوعة مع معلقة صويا صوص كنوع من التغيير، أنواع كتير قوي من الشوربات بدون دسم وبدون كريمة عشوة خفيفة وغنية.
ستير فراي الخضار مع المشروم
therecipecritic
الألياف ثم الألياف ثم الألياف، عشان تشبعي من غير ما تاكلي أكل كتير غير صحي، لازم تكتري من الألياف، وطبق الخضار المشكل مع شوية مشروم كمصدر للبروتين، هيشبعك ويبسطك في نفس الوقت.
المقادير
- 2 كوسة مقطعة شرايح رفيعة
- 2 جزر مقطع شرايح رفيعة
- زهرات بروكلي
- 2 بصل أخضر مقطع شرايح رفيعة
- 100 جم فاصوليا خضراء
- 150 جم مشروم شرايح
- 2 معلقة كبيرة صويا صوص
- 1 معلقة صغيرة توم مفروم
- 1 معلقة صغيرة جنزبيل مهروس
- 1/4 كوب ماء
- فلفل إسود
- زيت نباتي
- سمسم محمص
الطريقة
- في واك، أو طاسة واسعة سخني الزيت النباتي، ضيفي التوم والجنزبيل وشوحيهم لحد متطلع ريحتهم.
- ضيفي الخضراوات كلها مع التقليب المستمر على نار عالية لحد متبدأ تدبل شوية.
- ضيفي الصويا والفلفل الإسود وربع كوب الماء، وغطي الخضراوات لمدة 5 دقايق فقط لحد ماتبقى طرية لكن تفضل محافظة على لونها وقرمشتها.
- قدميها ساخنة مع رشة من السمسم المحمص.
تورتيلا الحمص مع الخضراوات
aheadofthyme
الحمص من الحاجات اللي بتساعد جدا على الشبع لإنه مليان بالألياف ومليان كمان بعناصر غذائية مهمة ومفيدة وكمان يعتبر مصدر هايل للبروتين النباتي. جربي إعملي رول من الحمص المهروس مع الطحينة والكمون وزيت الزيتون مع شرايح من الخضرة زي الطماطم والخيار والورقيات وقدميه مع شوية سلطة كعشاء خفيف، مغذي وطعمه روعة.
لبنة مع التوست (حلو أو حادق)
اللبنة ألذ ما فيها هي إنك تقدري تاكليها حادقة لو ضيفتي عليها مثلا الزيتون، أو الزعتر وزيت الزيتون، أو النعناع الأخضر ومكعبات الطماطم، وكمان تقدري تستمتعي بيها بمذاق مسكر شوية لو ضفتي معاها العسل الأبيض، والفواكة زي التبن أو الفراولة أو العنب. افرديها على التوست مع الإضافات السابقة واستمتعي بألذ وأخف وجبة عشاء.
البطاطا الحلوة المشوية
delish
يا محلاها خصوصا في الشتاء عشوة جميلة مفيش أسهل منها، ولو حبيتي تدلعيها شوية، ضيفلها رشة قرفة ومعلقة من العسل الأبيض، لوكنتي من محبي السكريات على العشاء، صدقيني البطاطا هي الخيار الأمثل عشان تتغلبي على رغبتك في أكل السكريات وتحصلي عليها من مصدر طبيعي وصحي كمان.
التعليق باستخدام حساب فيس بوك