محتويات المقال
“رمضان جانا وفرحنا به بعد غيابه أهلاااا رمضان” طيب اعترفي إنك قريتيها بصوت العيال في مسرحية العيال كبرت D: ، رمضان ليه روح جميلة وذكريات قديمة عمرنا ما بننساها دايمًا بتخلينا فرحانين بيها لما نفتكرها أو نشوفها وبنعيشها من أول وجديد مع كل مرة بنشوفها.. وفي الموضوع ده هناخدكم في رحلة لطفولتنا نفتكر بيها أيام رمضان الجميبلة لما كان بيبقى في المدرسة وأيام رمضان اللي في الشتا والفوازير والأغاني الحلوة.
أغاني رمضان القديمة
أغاني رمضان القديمة مهمًا كبرنا عليها برضو هتفضل من الأساسيات اللي بنسمعها في الراديو أو التليفزيون كل سنة وهندندن معاها كمان.
فوازير رمضان
فاكرين فوازير نيللي وشريهان وعمو فؤاد بأغنيته الشهيرة عمو فؤاد عمو فؤاد بيلف بلاد ولا فوازير فطوطة اللي كنا بنستناها كل يوم.
بوجي وطمطم
الكارتون اللي كنا بنستناه عشان نتفرج على مغامرات بوجي وطمطم وطماطم الصغيرة وعم شكشك وزيكو وزيكا كمان.
بكار
أبو كف رقيق وصغير ومعزته رشيدة وصاحبه حسونة،تقريبًا من أحلى ذكريات طفولتنا اللي كنا بننستناه وقت الفطار عشان نشوف المغامرات الجديدة مع بكار.
المسحراتي
من أحلى الذكريات اللي مفتقدينها هي المسحراتي اللي بيلف على البيوت ويخبط على طبلته ويغني اصحى يا نايم وينده على أسامي الجيران عشان يصحيهم يلحقوا السحور.
زينة الشوارع في رمضان
مصدر الصورة: اليوم السابع
فاكرين زينة الشوارع البسيطة بتاعت زمان والفانوس الكبير اللي بيتعلق في نص الشارع والجيران اللي كانوا بيتلموا قبل رمضان بأيام ويزينوا الشوارع.
مسلسلات رمضان زمان
مصدر الصورة: صدى البلد
زمان كان بيبقى فيه مسلسل واحد بس كلنا بنتفرج عليه ونتجمع كلنا بعد الفطار عشان نشوفه مع الكنافة والقطايف زي مسلسل ارابيسك والضوء الشارد وليالي الحلمية.
فانوس رمضان زمان
مصدر الصورة: مصر العربية
مصدر الصورة: فيسبوك
كلنا كان عندنا الفانوس الحلو أبو شمعة ونغنيله وحوي يا وحوي ولما الموضوع اتطور شوية بقا عندنا الفانوس اللي بالبطارية وجواه العصفورة اللي لونها أصفر.
التعليق باستخدام حساب فيس بوك