محتويات المقال
فجأة بتلاقي نفسك قاعدة في العربية انتي والأولاد مستنيين نهاية العالم في الإشارة اللي مش بتفتح أو الزحمة اللي مش بتخلص. وبالنسبة لأطفال ممكن يكونوا راجعين من يوم طويل مدرسي أو تمرين شاق، بيكون الموضوع مرهق وممل. في المقال ده، جمعنا لك 9 ألعاب ممكن تلعبيهم انتي والأولاد، هيقضوا الوقت بشكل أسرع وزهق أقل.
لعبة الأشكال:
حد واحد هيقول الشمس، والدونات، والخاتم، والباقيين هيخمنوا الشكل (الدايرة). وممكن تتلعب بطريقة تانية: إن حد يقول اسم شكل معين، والباقيين يخمنوا أكبر عدد من الحاجات اللي موجودة بالشكل ده.
أنا باراقب:
كل لاعب بيقرر في دوره إنه يكتشف حاجة على الطريق، ويقول الحرف الأول من اسم الحاجة دي: أنا باراقب بعيوني حاجة بتبدأ بحرف كذا، الباقيين بيحاولوا يخمنوا إيه الحاجة دي.
اسم الدولة:
اللعبة دي ممتعة جدًا وممكن تتلعب بأسماء بلدان أو حيوانات أو أطعمة أو أي حاجة عايزينها. حد هيبدأ يقول اسم بلد زي مصر مثلًا والباقيين يفكروا في اسم دولة بتبدأ بحرف الراء اللي هو الحرف الأخير من مصر، وهكذا.
20 سؤال
اللعبة دي ممكن تكون ممتعة في الطرق الطويلة، وبتبدأ إن حد يفكر في حاجة في دماغه، والباقيين بيحاولوا يخمنوا إيه هيا عن طريق إنهم بيسألوا أسئلة عن الحاجة دي، زي مثلًا “هي حيوان؟” أو “ممكن يكون موجود في البيت؟” أو “بيتاكل؟”
لعبة الذاكرة:
لو كان عندك أطفال أكبر من سن 5 سنين وهيقدروا يركزوا فعلًا، فاللعبة دي ممكن تبقى مسلية عن طريق إن اللاعب الأول يقول كلمة زي “رحت السوبر ماركت” والتاني يزود جملة على الجملة الأصلية “رحت السوبر ماركت واشتريت لبن” والتالت يزود جملة تالتة على الحملتين “رحت السوبر ماركت واشتريت لبن ووقفت قدام الكاشير” وهكذا. وأول واحد يغلط هيكون هو الخسران.
وقت القصة
الغرض من من اللعبة دي هو إن الأطفال يبنوا قصص على قصص بعض والتفكير المشترك في قصة كلهم بيألفوها سوا وبيضيفوا سطر واحد في كل دور لحد ما تطلع لنا قصة كاملة.
لحظات موسيقية:
شغّلي الراديو وحاولوا تخمنوا الأغنية اللي شغالة عن طريق سماع 10 ثواني بس من الأغنية والفايز هو اللي بيخمن صح.
نوع العربية:
اختاري ماركة عربية ولونها وحاولوا تدوروا على واحدة زيها على الطريق وأول حد هيلاقي العربية المماثلة بيبقى هو اللي بيحدد نوع العربية الجديدة.
تهجئة الكلمات:
ودي طريقة رائعة لتحسين مهارات التهجئة عند طفلك. قولي كلمة وخلي أطفالك يحاولوا إنهم يتهجوها.
التعليق باستخدام حساب فيس بوك