مهم واحنا بنتعامل مع الأطفال نعرف هما مزاجهم العام عامل ازاي. لأن طباع ومزاج الأطفال بيختلف حسب عوامل كتير من أسرة لأسرة، هل طفلك مثلًا هادي ولا شعنون؟ نشيط ولا مش بيتحرك كتير؟ وغيرها من الصفات والسمات الشخصية اللي بتمثل المزاج العام أو الطبع. لكن للأسف احنا لإننا مش بنكون عارفين هي إيه الصفات دي وتأثير كل صفة منهم على الطفل، وازاي نتعامل معاها. بالتالي، ده بيسبب إن استجابتنا للطفل في مواقف مختلفة بتأثر تأثير سلبي وممكن تسبب في نفسية الطفل نتائج عكسية غير ما احنا متخيلين. خلينا نعرف في الأول إنهم 9 سمات والسمات دي بنتولد بيها. لكن في نفس الوقت، الأسرة والبيئة والتعليم وكل الظروف المحيطة بيكون لها تأثير على الصفات دي واللي في النهاية بتكون طريقة تعامل الطفل مع العالم الخارجي.
السمات التسعة لـ طباع ومزاج الأطفال
- معدل النشاط
- الإيقاعات البيولوجية
- الحساسية
- مقدار الطاقة للتعبير عن المشاعر
- القدرة على التأقلم والتكيف
- المبادرة والانسحاب
- الإصرار والتصميم على هدف أو مهمة
- التشتت
- المزاج العام
-
معدل النشاط Activity level
معدل نشاط الطفل بنحدد عن طريقه طباع ومزاج الأطفال وده معناه مستوي نشاط الطفل الجسدي والبدني. يعني فيه طفل بيحب يتحرك كتير ويتنقل من مكان لمكان وفيه طفل أكثر هدوء.
فيه أطفال مستوى النشاط عندهم عالي وبيتنقلوا من نشاط لآخر ممكن يظهروا للآخرين على أنهم مزعجين وبيواجهوا مشكلة مع الجلوس لفترة طويلة وده بيسبب لهم توتر. وفيه أطفال مستوى النشاط عندهم قليل وهم بيميلوا أكثر للأنشطه الهادئة واللي ما فيهاش حركة كتير وبيقدروا يقعدوا فترة أطول أثناء النشاط.
يا تري ابني شقي ولا عنده فرط حركة؟
بالنسبة لأولياء الأمور مطلوب منهم يكونوا مع الأطفال ذوي النشاط العالي إنهم يحترموا ده في أنشطتهم اللي بتحتاج لفترة طويلة إنه يكون فيه فترات راحة يكون فيها أنشطة خفيفة يقدورا يحرقوا فيها طاقتهم. أما بالنسبه للأطفال اللي نشاطهم قليل، فلازم أهتم إني أحط لهم أنشطة مناسبة زي القراءة أو الألعاب المعتمدة على قطع التركيب زي البازل. حاول نحط في الجدول اليومي للأطفال أنشطة تتناسب مع طبيعتهم وسماتهم الخاصة. وده عشان أقدر أقوّي نقط قوتهم وأقلل نقط الضعف عندهم. وفي نفس الوقت، اتجنب على قد ما أقدر التوتر ويكون فيه تلبية لاحتياجات الطفل النفسية.
-
الإيقاعات البيولوجية Biological Rhythms
دي خاصية بتخلينا نحدد إذا كان الطفل من النوع اللي له نظام وإيقاع منتظم ثابت ولا ما عندهوش إيقاع منتظم؟ وهنا بيكون فيه أطفال إيقاعاتهم منتظمة: يقدر ياكل في وقت ثابت وينام ويذاكر في جدول منظم، وفيه أطفال إيقاعهم غير منتظم: بيكون عندهم الالتزام بروتين ثابت صارم شئ صعب جدًا.
روتين النوم للأطفال: إزاي أعود ولادي علي النوم بدري قبل المدارس
بالنسبة لأولياء الأمور محتاجين إنهم يفهموا إيقاع أولادهم، ولما يحطوا جدول يكون فيه تعبير عن احتياجات الطفل. فلو إيقاعه منتظم، يبقى سهل في الحالة دي، التعامل مع روتين ثابت أما بالنسبة للأطفال اللي إيقاعهم مش منتظم بيبقى أفضل أكون أكتر مرونة. يعني مثلًا الطفل في وقت معين حس إنه عايز ينام غير مواعيد الجدول اليومي. ممكن أسمح له بده. يبقى هنا أنا باحترم طبيعته وباتجنب التوتر في حالة إرغامه على عكس طبيعته. محتاجين تبقى توقعاتنا وترتيباتنا تكون ملائمة للخاصية اللي عند الطفل مش عكسه تمامًا.
-
الحساسية Sensitivity
ده مدى مقدرة الطفل وتأثره بالعوامل الخارجية. وإن الأطفال الحساسين بيتأثروا بسهولة للضوء والملمس والشم والتذوق، وبتكون ردود أفعالهم تجاه العناصر دي قوية ممكن يكون بيتضايقوا من العلامات اللي في لبسهم وبيتضايقوا من الصوت العالي. ممكن مصدر صوت صغير يبقى مصدر استجابة عالية منهم. فيه أطفال عندهم الخاصية دي خفيفة. وبالتالي ردود أفعالهم خفيفة ولا يتأثروا بسهولة بالمؤثرات اللي ذكرت فوق.
-
مقدار الطاقة للتعبير عن المشاعر Intensity Of Reaction
فيه أطفال بيتولدوا بيكون عندهم طاقة كبيرة وقوية وبيلجؤوا لاستخدامها في التعبير عن المشاعر وردود أفعالهم العاطفية سواء في الغضب أو الفرح أو الحزن بتكون قوية في جميع الحالات. وفيه أطفال طاقتهم صغيرة ودول بيكونوا أهدى. في الحالة الأولى، الأطفال بيشعروا بالإحباط والضيق لو ما تمش تلبية رغباتهم بسرعة أو يزعقوا بصوت عالي لو فرحوا مثلًا. على الناحية التانية، وعشان كده، هم ممكن يكونوا مصدر إحباط وتحدي للآباء والأمهات. وعشان كده، محتاجين أننا نساعدهم في التعبير عن مشاعرهم.
- مثلًا نديهم الكلمات اللي بتعبر عن أنواع المشاعر المختلفة عشان يعبروا بيها.
- أو نصر على إنهم يلاقوا حلول يعدّوا بيها واحنا معاهم برضه.
- نساعدهم على إنهم يخرجوا الطاقة اللي عندهم في طرق منتجة وهادفة زي الألعاب الرياضية أو مشغولات يدوية أو أي نشاط يكونوا بيحبوه.
طبعًا أحيانًا ده بيحصل وسط الناس فيبقى الحل إني أعبّر له عن إني متفهم رد فعله ده وحاسس بيه، لكن محتاجين ناخد مساحة من الوقت نهدى فيها وبعدين نتصرف. وبعد كده، تتكلموا معاهم في الموقف لكن الجميل في الوضع إن الأطفال دول بيكونوا مميزين. وبيكتشفوا العالم بشكل أعمق وأكثر ثراء من الآخرين. وده مهم نعرفه عشان نعرف أنهم متفردين مش بس مصدر للتحدي أو الإحباط في بعض الأوقات
-
القدرة على التأقلم والتكيّف Adaptability
هي مدى مقدرة الطفل على تقبل الأوضاع الجديدة أو الظروف المختلفة. أو أن ينتقل من نشاط إلى نشاط آخر بسهولة. وهنا بيكون فيه أطفال القدرة على التكيف عندهم قليلة، وبالتالي بيحتاج لوقت أطول في إنه ينتقل من حال لحال أو من ظرف لظرف أو من مكان لمكان. بيكون أصعب من الأطفال اللي عندهم قدرة عالية على التكيف دول بيكون مريحين أكتر وسهل التعامل معاهم.
أما بالنسبة لتعامل أولياء الأمور فبيكون إني أمهد لطفلي اللي عنده مرونة قليلة للحدث اللي بيحصل بعد شوية أو أدي له وقته قبل ما ننقل من مكان لمكان جديد أو أقعد أتكلم معاه وأشوف مشاعره وأحاول أحترم ده في الجدول اليومي، والروتين وده هيجنبنا احنا الاتنين التوتر ويخلي ابني يلاقي احتياجاته اللي بتمشي مع خصائصه الشخصية.
-
المبادرة/الانسحاب Approach/Withdrawal
هي مدى مقدرة الطفل على المبادرة والمواجهة والتأقلم مع وضع جديد ومقابلة أشخاص جدد وعمل أنشطة جديدة. البعض بيكون ده سهل بالنسبة لهم. اكتشاف أنشطة جديدة. مواجهة ناس مختلفة وجديدة على المجموعة المتعارف عليها. والبعض الآخر بالعكس تمامًا، محتاج وقت لغاية لما يحصل تأقلم وأحيانًا ممكن ينسحب لفترة لغاية لما يعرف يتأقلم أو يتردد قبل ما يعرف ناس جديدة.
المطلوب من أولياء الأمور مراعاة كل طبيعة على حدة. فالأطفال اللي في حالة إقدام ومبادرة محتاجين فرص أكتر يستكشفوا بيها العالم ويدخلوا تجارب أكتر وإن الأب أو الأم يقللوا خوفهم عليهم والقلق الزيادة. أما الأطفال اللي طبيعتهم بتميل للانسحاب. محتاجين إننا نتقبل طبيعة خصائصهم ونديهم مساحة من الوقت والفهم عشان يعدوا المواقف بسهولة أكتر. زائد يكون فيه سماح لهم بإنهم يتراجعوا. ولو في الأول بس وهم لسه خايفين من التجربة ونحتويهم وما نضغطش عليهم.
-
المثابرة والتصميم على هدف Persistence
ودي مدى مقدرة الطفل على العمل وبذل المجهود لغاية لما يوصل لهدف أو ينهي مهمة. فيه أطفال بتكون القدره دي عالية جدًا. وبيستمر في العمل مهما كانت التحديات ومهما كانت الصعوبات. والبعض الآخر، بتبقى مشكلته أنه عند مواجهة التحديات ولما تشد عليه يسيبها ويروح لحاجة جديدة تانية وبيصابوا بالإحباط. بسرعة وبيطلبوا المساعدة من الأكبر منهم.
أما بالنسبة لأولياء الأمور، فبيلاقوا الأطفال اللي عندهم قدر من المثابرة عالي بيعملوا المهام بتاعتهم لوحدهم في الأغلب. وبيقدروا يحلوا المشاكل اللي بتقابلهم وبيكونوا مستقلين. وده مش بيشكل تحدي ليهم (الأب والأم). أما الأطفال اللي المثابرة عندهم أقل بيصابوا بإحباط وبيحتاجوا من وقت للتاني مساعدة من الأب أو الأم. وهنا بيكون دورهم إنهم يعلموهم ازاي يتأقلموا مع مشاعر الإحباط أو الإرهاق اللي بيحسوا بيها.
-
التشتت Distractibility
مدى سهولة تشتيت الطفل أو لا. فيه بعض الأطفال التشتت عندهم عالي. بالتالي بسهولة بيتشتت انتباهك من وقت للتاني بالعالم الخارجي والبيئة المحيطة سواءً ضوضاء أو ناس أو أي حاجة في الخلفية. وفيه بعض الأطفال بيقدروا يركزوا مهما كان الوضع المحيط ومش بيتشتتوا بسهولة، وبيقدروا يكملوا المهمة اللي في إيديهم بدون تشتت في الانتباه.
وعشان كده، دور الأب والأم في فهم طبيعة ابنهم إنهم لو بيتشتتوا بس هو إني أوفر الجو الملائم والمكان الهاديء، وابعد عن أي ضوضاء مثلًا وهم بيعملوا الواجب أو بيقوموا بعمل محتاجين تركيز فيه وأتعامل معاهم لما يتشتت انتباهه لإن ده مش سوء سلوك منه. دي سمة شخصية عندهم بل بالعكس هم لهم القدرة على ملاحظة الأشياء في بيئتهم. أما قليلي التشتت أو اللي بيتشتت بسهولة بيكون عنده قدره على التركيز جدًا لكن بيكونوا بيميلوا للتركيز على المشاعر السلبية. ومش بيعرفوا يعبروا عنها، هنا دور الاسرة إنها تساعدهم وتديهم الأدوات عشان يعبروا ويخرجوا المشاعر بتاعتهم. وفي جدول الروتين اليومي، محتاج يكون فيه مرونة تراعي طبيعة كل طفل ومميزاته
-
المزاج العام Mood
طباع ومزاج الأطفال العام وازاي بيتعاملوا مع المواقف والأمور في حياتهم. البعض بيتعامل بشكل أكثر سعادة وفيه إيجابية في نظرته للأمور ورضا. والبعض بيكون أكثر سلبية للأمور وبتكون نظرته فيها عدم رضا أو قليل من الحزن. النوع الأول بيكون أسهل في الانتقال في الفترات الأتعس وبيتجاوزها بشكل أسرع وبيكونوا أكتر تفاؤل وسعادة، أما النوع التاني بيكون أكثر هدوء وتعبير عن المشاعر الايجابية.
ومطلوب من الأسرة استيعاب طبيعة كل طفل لإن أحيانًا الناس بتتوقع. الطفل أنه يكون سعيد طول الوقت. محتاجين نحترم كل طبيعة على حدة وإن كل مشاعر الطفل صح محتاجين ندعمهم ونساعدهم إنهم يظهروا مشاعرهم بطرق مختلفة إيجابية ونقلل توقعاتنا عنهم وأنه مافيش حاجة غلط في الطفل اللي مش سعيد دائمًا أو عنده مشاعر سلبية أكتر من الآخرين. ومش معنى إنه مش بيظهر السعادة أو الفرحة إنه لا يشعر بيهم لا هو بس محتاج يتعلم ازاي يظهرهم وده دورك في الأسرة.
وبكده نكون اتكلمنا عن 9 سمات وخصائص لـ طباع ومزاج الأطفال اللي بتكون موجودة بدرجات متفاوتة في الأطفال يعني كل توليفة ممكن تكون شخصية مختلفة تمامًا حتى لو كانوا أخوات في بيت واحد. ومن هنا، محتاجين نبعد عن المقارنة وإننا نبص للطفل على إنه كيان مستقل بذاته وأحترم كل صفاته الشخصية وأحاول أنا ككبير اتعامل معاها وأحل مشاكلها.
التعليق باستخدام حساب فيس بوك