سنة 2016 منظمة الصحة العالمية كانت قلقانة جدا بسبب الأنيميا ارتفاع معدلات المرض والوفاة في الحمل بنسب اعتبرتها “غير مقبولة” رغم التقدم الكبير اللي بلاد كتير بتشهده وكان واحدة من أهم أسباب المرض وأحيانا الوفاة هو نقص الحديد عند الأم الحامل.
من المعلومات المزعجة جدا إن فقر الدم واحد من أهم مشاكل الصحة العامة في إقليم شرق المتوسط، كفاية نقول ليكي إن 50% من النساء الحوامل و 63% من الأطفال أقل من خمس سنين عندهم فقر دم ناجم عن نقص الحديد! عشان كده، جمعنا ليكي كل النصايح اللي ممكن تساعدك عشان تتفادي الأنيميا أثناء الحمل.
نصائح لتفادي الأنيميا أثناء الحمل
- اعرفي وضعك
- حافظي على نفسك
- كلي كويس
- كفاية مكيفات
- تجنبي الغلطات الشهيرة
- ما تستهونيش
- ركزي على الحديد
- حمض الفوليك
- فيتامين ب12
اعرفي وضعك
لو بتخططي للحمل لازم قبل أي حاجة تعرفي مخزونك من الحديد قد إيه وحالة الحديد في جسمك عاملة إزاي، المواظبة على فحص الهيموجلوبين مهمة جدا عشان تقدري تبدأي رحلة الحمل في سلام
حافظي على نفسك
في عوامل بتساهم في الأنيميا زي التعرض للأمراض المعدية أو المسببة لفقر الدم زي الزيف الداخلي والخارجي أو الإصابة بأمراض زي الملاريا والالتهابات الفيروسية، الكلام ده كله بيضعف خلايا الدم الحمراء وبيخليكي أكثر عرضة للأنيميا. عشان كده لازم تحافظي على نفسك كويس جدًا من الحاجات دي كلها ولو حصل لك حاجة منهم لازم تراجعي وضع الحديد في جسمك من أول وجديد وتظبطيه.
- ركزي في أكلك على مصادر فيتامين سي لأنك حتى لو بتاخدي حديد بنسبة كويسة جسمك مش هيمتصه ويستفيد منه إلا إذا كان واخد حصة كافية من فيتامين سي سواء في صورة مكملات غذائية كابسولات أو أقراص فوارة أو في صورة أكل.
أهمية فيتامين سي لصحة شعرك وبشرتك
كلي كويس
عارفين إن نفسك مسدودة في الحمل، مش مهم تاكلي كتير، المهم تاكلي بشكل متوازن وصحي حتى لو كمية قليلة المهم يكون في تنوع في أكلك.
كفاية مكيفات
لو انتي من عشاق القهوة والشاي والكاكاو، و الكافين عموما فاحنا بننصحك إنك تبطلي فورا وترشدي الاستهلاك بعد استشارة الدكتور، لأنه بيعوق امتصاص الحديد وبيساهم بشكل أو بآخر في الأنيميا خصوصا وقت الحمل.
تجنبي الغلطات الشهيرة
في غلطات شهيرة بتكون سبب في عدم امتصاص الحديد في جسمك سواء من خلال الأكل، أو لو بتاخديه في صورة أقراض أولها إنك تاخدي قرص الكالسيوم مع الحديد، أو تاخدي دوا الحموضة أو أدوية هشاشة العظام أو الغدة الدرقية أو الباركنسون أو المضادات الحيوية مع الحديد أو بعد الأكل، كدا إنتي مش هاتستفيدي من الحديد الموجود في الوجبة أو في الكبسولات!
ما تستهونيش
لو مفيش تحسن في نسبة الحديد بعد لما تاخدي الدواء عن طريق الفم، أو لو تم الكشف عن فقر الدم بعد الأسبوع 36 في الحالة دي لازم تراجعي الدكتور وما تسكتيش على نفسك لأن غالبا بيكون في احتياج لتعويض النقص ورفع مستوى الهيموجلوين عن طريقة الوريد مباشرة.
ركزي على معدن الحديد
معدن الحديد موجود في أكلات كتير لكنه متركز في بعض الأكلات بالذات زي اللحوم الحمراء والكبدة – لكن بينصح بتجنب تناول الكبدة في الشهور التلاتة الأولى من الحمل- وكمان ليه مصادر نبادية زي العدس والزبيب الأسود والخضروات الوراقية الغامقة زي السبانخ، وعصير البرقوق والفاصوليا.
حمض الفوليك أساسي
من أول لحظة بتعرفي إنك حامل فيها أول خطوة الدكتورة بياخدها معاكي هو إنه يوصف ليكي حمص الفوليك في صورة أقراص، حمض الفوليك مش بس بيمنع التشوهات الخلقية لكنه كمان بيساهم في توازن نسبة الحديد في جسمك وهاتلاقيه في أكلات زي الأفوكادو والخضروات الورقية والبروكلي والعدس والبنجر.
فيتامين ب12
واحدة من أهم العناصر اللي بتساهم في توازن الفيتامينات والمعادن في الجسم هو بـ 12 واللي بيتوافر في أكلات زي البيض واللحوم والأعشاب البحرية.
التعليق باستخدام حساب فيس بوك