PCA جهاز صغير بيخفف آلام الولادة .. اعرفي أكتر عنه

أوقات كتير بنلاقي بوستات على جروب الأمهات من حوامل قربت تولد بتسأل على جهاز اسمه الـ PCA، وهل هو حلو وبيسكن الألم بعد الولادة القيصرية ولا لأ؟ والحقيقة أول معرفتي بجهاز الـPCA كانت عن طريق جروب راحة بالي بعد لما لقيت أمهات كتير جدًا بيشكروا فيه وبيقولوا إنه كان سحر بالنسبة ليهم في التعافي بعد الولادة القيصرية، طيب إيه هو الجهاز اللي ناس كتير بتتكلم عنه وإيه هي استخداماته؟ اتعرفي أكتر عن الPCA في الموضوع ده.

إيه هو جهاز الـ PCA؟

PCA

PCA هو اختصار لـ Patient-controlled analgesia أو جهاز تسكين الألم بتحكم المريض، وهو عبارة عن جهاز بيسمح للمريض إنه ياخد جرعة من المسكن من خلال الضغط على زر موجود في الجهاز بدون مساعدة التمريض. الجهاز بيتكوّن من جرعات محددة بيوصفها الدكتور من المسكنات القوية وبتخنلف من شخص للتاني بحسب شدة الألم وحجم العملية، الجهاز بيتركب في الوريد باستخدام الكانيولا الخاصة بالمريض وسهل التنقل بيه. وبيتم استخدامه في أغلب الأوقات بعد عمليات الولادة القيصرية أو العمليات الكبيرة اللي بتكون حدة الألم فيها كبيرة وكمان بيستخدم بعد جراحات السمنة والمناظير.

اعرفي طريقة النوم الصحيحة بعد الولادة القيصرية من هنا.

ازاي بيتم استخدام جهاز الـ PCA؟

PCA

الجهاز بيتركب في الوريد عن طريق الكانيولا وعند الشعور بالألم. بيتم الضغط على الجهاز وبيضخ المسكن للمريض في حدود الجرعة المسموحة فقط وحسب حالته الصحية وتاريخه المرضي وطبعًا الجرعات دي بتم تحت إشراف الطبيب، لو المريض ضغط على الجهاز أكتر من مرة أداة تصريف المسكن مش هتضخ جرعة تانية غير بعد مدة زمنية محددة، وبالتالي هتحمي المريض من الجرعة الزيادة.

لو الدكتور حدد لك ولادة قيصرية، لازم تكوني مستعدة لها. اعرفي ازاي تستعدي قبل الولادة القيصرية.

مميزات جهاز الـPCA

PCA

• مسكن قوي للألم وله فعالية كبيرة في التخفيف من آلام انقباضات الرحم بعد الولادة القيصرية أو الولادة الطبيعية.
• بيساعد المريض على التعافي بشكل أسرع.
• الجهاز حجمه صغير فبالتالي سهل الحمل والتحرك بيه وخصوصًا بعد الولادة القيصرية لما الطبيب بينصح الأم بالمشي.
• يستمر مفعوله كذا يوم وممكن الرجوع للمنزل بيه.

الدكتور هيستعجلك تدخلي الحمام بعد الولادة، هنا نصائح للتبول بعد الولادة مباشرة

سعر جهاز الـPCA

سعر الجهاز ممكن يبدأ من 1000 جنيه ممكن تزيد أو تقل بحسب كل مستشفى وبحسب أنواع الأدوية المسكنة الموجودة بداخل الجهاز.

زي ما وضحنا في المقال جهاز الـPCA بيتم وصفه من الطبيب المعالج وهو اللي بيحدد مدة استخدامه، اتكلمي قبل الولادة مع دكتور النساء الخاص بيكي عشان تحطي خطة للولادة وازاي هتقدري تتغلبي على الألم وبنتمنى ليكم دوام الصحة والسعادة.

اعرفي أنواع فوط النفاس بعد الولادة من هنا.

مصادر ساعدتنا في كتابة المقال:
Webteb
Mayoclinic

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.