عارفة لما تبقي داخلة التويلت وابنك الصغير ينهار علي الباب كإنك هتهربي من الشباك؟ أو لما تنزلي تجيبي حاجة وتسيبيه مع باباه نص ساعة ترجعي تلاقيه كإنه مخطوف؟ أنا عارفة قد إيه لزقة العيال غير المبررة فينا دي بتكون أوقات كتير حاجة مرهقة نفسيًا وجسديًا لينا قوي. في المقال ده، هنعرف قلق الانفصال عند الأطفال أو separation anxiety إيه سببه وإيه أحسن طريقة تساعدنا نتعامل معاه عشان نساعدهم يتغلبوا عليه ونعرف احنا كمان نشم نفسنا شوية.
متى يبدأ قلق الانفصال؟
قلق الانفصال بيبدأ عند الأطفال من سن 9 شهور تقريبًا لإن بيكون خلاص قدر يحدد الناس المسؤولة عنه واللي بيراعوه، وفي نفس الوقت ما يقدرش يفهم عامل الزمن، ففكرة عدم وجود الأم ده بالنسبة له اختفاء وبس، وممكن يكمل قلق الانفصال مع الطفل لحد سن 4 سنين حسب شخصية كل طفل وحسب الظروف المحيطة بيه وتعاملنا معاه.
نصائح التعامل مع قلق الانفصال
هنا هاقول لكم على شوية نصايح تساعدكم في التعامل مع المرحلة ده عشان تخلص بأسهل طريقة وأقرب وقت ممكن:
- أول خطوة في التعامل هي إننا نبقي مدركين إن دي مرحلة طبيعية جدًا كل الأطفال بيعدوا بيها عشان نقدر نبقى رايقين وهاديين واحنا بنتعامل معاهم، وما نضغطش أعصابنا لإن ده حاجة مش هتفضل مكملة معاه على طول لكن رد فعلنا وطريقة تعاملنا مع قلق الانفصال هو ده اللي هيأثر في تشكيل الطفل علطول.
- واحدة واحدة وتدريجي:
يعني لو خلاص هترجعي شغلك مثلًا أو هتغيبي عن طفلك وقت طويل، يبقي لازم تعوّديه تدريجي على غيابك فترات قصيرة في الأول وتزيد بالتدريج.
- ما تختفيش أبدًا من قدامه فجأة على أساس إنه مش هياخد باله أو يتشتت بحاجة تانية، لأن ده من أكتر الحاجات اللي بتزود قلق الانفصال عند الأطفال وبتحسسهم بعدم الأمان.
- قبل ما تسيبي المكان اللي طفلك فيه، مهما كان صغير، عرفيه هترجعي امتي بالظبط حتي لو هتعلميها له برسمة أو بطريقة سهلة على الساعة وفهميه يومه هيمشي ازاي بالظبط من غيرك وهتعملوا إيه لما ترجعي.
- خليكي حازمة بعدها وما ترجعيش في كلامك لما تلاقيه بيعيط. احضنيه جامد وكرري كلامك اللي قولتيه عليه ونفذيه وامشي. وفي نفس الوقت، نفذي بالظبط اللي اتفقتي معاه عليه عشان يصدق كلامك بعد كده.
- ونفس الكلام لو قاعدين في البيت: قبل ما تقومي من قصاد الطفل حتى لو داخلة المطبخ، عرفيه هتعملي إيه وهتيجي تقعدي جنبه تاني امتى وقدمي له حاجة يتشغل بيها لحد ما ترجعي بس برضه ما تختفيش فجاة من قدامه مهما حصل.
- في التجمعات أو الأماكن الزحمة، ما تحاوليش تدفعي طفلك إنه يندمج ويلعب علطول، لإن الزحمة دايمًا بتزود القلق عندهم، سيبي له فرصته لما يرتاح ويبقي مستعد يندمج لوحده.
وما تقلقيش من المرحلة دي، ولا تتضايقي لإن معناها إن طفلك بيكبر، لكن لو كملت معاه بعد دخوله المدرسة وبقى يظهر عليه أعراض زي اضطرابات في النوم أو شكوى من مغص أو صداع أو ألم مستمر عشان ما يبعدش عنك وقت الحاجة، أو خوف ورفض المشاركة في أي نشاطات مهمة عشان ما يبعدش عن الأب والأم، فده ممكن يكون معناه إنه بيعاني من “اضطراب قلق الانفصال” ومحتاج تدخل من متخصص.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك