محتويات المقال
الحب مش كل حاجة. بعض الناس فاكرين إن الحب لوحده كافي علشان تاخد قرار الجواز من شخص ما. لكن فيه عوامل كتير لازم نراعيها في اختيار شريك أو شريكة الحياة غير المشاعر الطيبة.
في كتاب “اعرفي راجلك وعلمي عليه” مستشار العلاقات العاطفية إسماعيل فؤاد القاسم بيرصد أهم الأسئلة اللي لازم تدوروا على اجابتها قبل قرار الجواز.
كتاب اعرفي راجلك وعلمي عليه
لعنة الانبهار
ممكن يبهرك في البداية الراجل (الكازانوفا المغازل) لكن هل ممكن تعيشي لسنوات كتير مع اللي بيبهرك دلوقت؟
اختبار القلق أو الضغوط
الحياة الزوجية رحلة مش بتخلص من المنغصات. الضغوط النفسية والمادية بتظهر المعدن الحقيقي للإنسان. ممكن يكون شريكك حمل وديع لحد ما يتعرض لاختبار الضغوط. إزاي بيتعامل الطرف الآخر مع الضغوط اليومية البسيطة زي سواقة العربية أو الاختلاف مع الجارسون في المطعم أو عمل مكالمة شكوى لخدمة عملاء؟ بالإضافة للعلاقة بالمخدرات والخمور والقمار.
الحذر واجب في بداية العلاقة. علشان كده لازم تاخدوا بالكم من السلوك الادماني. راقبوا واسمعوا شريككم في صمت.
الشخص اللي عنده اعتماديه متواطئة مع المخدرات أو الكحول. يعني لازم يتعاطاها بشكل دوري متكرر بكميات قليلة خلال فترات قليلة علشان يهدي قلقه. ممكن يبقى مدمن عليه بسهولة مع أول مشكلة كبيرة او ضغط نفسي شديد. التعاطي ده ممكن يكون قهري غير مُسيطر عليه.
العلاقات الأسرية
بلاشك احنا بنتأثر بطفولتنا وظروف نشأتنا وبتتأثر علاقتنا بالأب والأم على اختيار الطرف الآخر، في بيوتنا بنتعلم كتير عن علاقة الراجل بالست ومفهوم الحب ومعنى علاقة الزواج.
معرفة معلومات كتير عن طفولة الشريك وعلاقتهم الأسرية ونشأتهم هاتساعدك تاخدي القرار الصحيح.
الخلفة وتربية الأطفال
من أهم الأسئلة اللي لازم تطرحيها قبل ما تاخد قرار الجواز هي الأسئلة اللي تساعد على التعرف على رغبة الطرف الأخر. أو عدمها في الخلفة. ورأيه في تنظيم النسل والاجهاض، يعني لو لاقدر الله حصل حمل بالخطأ.. هل ممكن يطلب منك تنزليه؟!
من المهم مناقشة طرق ومفاهيم تربية الأطفال. لانها من أسباب المشكلات بين المتجوزين اللي ممكن نتجنبها لو اتناقشت قبل الجواز، لأنها ممكن تكون من أسباب الطلاق.
التعايش مع الانطوائية أو الانبساط
الشخص الانطوائي مش بيفضل يخرج في مجموعات كبيرة أو مع ناس مش عارفهم كويس. ويفضل يقعد لوحده كتير حتى بدون شريكه. ومش بيحب يشارك أسراره مع الأخرين. هو شخص حساس في المعتاد. أما الشخص الانبساطي بيكون على العكس.
السؤال هو: هل تقدري تعيشي مع طبع الطرف الأخر؟ يعني لو اخترتي شخص انطوائي هل هاتقدري تعيش معاه؟ ولا هاتطلبي منه يتعافى من الانطوائية؟ لأنها مش مرض يستلزم العلاج لكنها طبيعة شخصية.
الوراثة
الموضوع ده ممكن يكون غريب.. لكن ضروري نتكلم عن الأمور الوراثية في العائليتين. لأن فيه أمراض وراثية وفيه صعوبات تعلم ممكن تنتقل للأبناء. مناقشة الأمور دي وتقبلها والاستعداد للتعامل معاها حاجة بيغفلها ناس كتير.. وده مهم جدًا لو بتفكري تخلفي من الزوج الجديد.
الخناق
على الرغم من إن النصيحة دي تبان غريبة. لكني بنصح إنه مهما كانت درجة التوافق والسعادة لازم كل طرف يحاول يفتعل مناقشة حادة في أول المعرفة علشان يعرف “الوش التاني” لشريكه، أو يفتعل ليه! هي المشاكل هتيجي لوحدها بس إنتي ركزي في رد الفعل..
البعض بيصرخ أو بيشتم أو يهدد.. البعض بيستعمل ايده وفيه اللي بيستعمل التجاهل والمعاملة الصامتة. لو ما اتخانقتيش أو اختلفتي مع شريكك فا إنتي فعلا لسه ماشوفتيش الوش التاني للشخص ده.
العلاقات الاسرية المتبادلة.
لازم تتأكدي إنك قابلة التعامل مع أسرة شريكك المحتمل. وإن فيه قدر من الود بينكم حتى لو كنت بتحبهم أو موافق تماما على اللي بيعملوه. والعكس برضو صحيح ومطلوب.
الطباع الصعبة
الطباع الأصلية في الشخصية مش بتتغير أبدا مهما حاولتي. بينما ممكن تتغير بعض العادات والسلوكيات بالاتفاق. علشان كده لو كان فيه طباع واضحة في شخصية الطرف الأخر فلا تأملي إنها تتغير. إما ترضى بها أو ترفضها.
الجنس الأخر
من المهم تعرف ايه حدود الطرف الآخر مع الجنس الآخر. سواء زميلات أو صدبقات أو أفراد في الأسرة. هل الحدود دي متوافقة مع منظومة قيمك ولا لاء؟
الموقف الديني
مهما ادعيتي العكس.. المعتقدات الدينية بتأثر على العلاقة بين الزوجين. مناقشة الأمور الدينية والتأكد من عدم وجود تنافر أو تعارض بين الأفكار، حاجة لا يستهان بها.
مافيش مشكلة من بعض الاختلافات اللي ممكن يتم التعايش معاها.
السفر بره للعمل أو الهجرة
من اصعب المشاكل الزوجية هي حلم الزوج أو الزوجة بالهجرة أو رفض أحد الطرفين القاطع لترك البلد. إذا كنتي كارهة السفر وحابة الاستقرار لازم تتأكدي إن شريك حياتك عنده نفس الاهتمام وإنه مش ناوي على السفر أو بيحلم بالهجرة.
وأخيرا: بلاش تتجوز اللي مش بيحب يبص لك ومش شايفك مالية عينه.
التعليق باستخدام حساب فيس بوك